Akatarhwa na Ruka
4 Hino, Djesu akadzara no mwiya mucena, akabuda mu Djorodhani, uye akaendeswa ku renje no simba ra Mwari, 2 iyena akagara ikona ke mazuwa 40. Ngokuti iyena aazi kurhya ciro pa mazuwa aya, akazwa nzara, ngokudaro Dhiyabhurosi wakamuedza. 3 Hino Dhiyabhurosi wakamubvunza kuti: “Kana iwewe uri mwana wa Mwari, bvunza buwe iri kuti riphinduke kuti rigare pau.” 4 Asi Djesu akamudaira eciti: “Zvakatarhwa kuti: ‘Munhu aadikani kurarama no pau basi.’”
5 Hino iyena wakamutora woenda naye pa dunhu rakarebesesa, womupangidza umambo wese we nyika inogarhwa pa nguwa doko basi. 6 Dhiyabhurosi wakamubvunza kuti: “Ndicakupasa simba pamusoro pe umambo wese uu no mbiri yawo, ngokuti ndakazvipaswa uye ndinopasawo wandinoda. 7 Hino, kana ukandihwararira wondinamata kamwe basi, zvese izvi zvicagara zvako.” 8 Djesu akamudaira kuti: “Zvakatarhwa kuti: ‘Djehovha* Mwari wako ndiye waunodikana kunamata, uye ndiye ega waunodikana kuitira basa rakacena.’”
9 Uye iyena wakamutora woenda naye ku Djerusarema, womukanda pa mbuto yo pamusoro-soro yo tempro uye wakamubvunza kuti: “Kana iwewe uri mwana wa Mwari, dzikhandire pasi, 10 ngokuti zvakatarhwa kuti: ‘Iyena acatuma ngirozi kuti dzikudziirire,’ 11 uye: ‘Idzona dzicakuthwara, kuti tsoka dzako dzisadzipondere pa buwe.’” 12 Djesu akamudaira eciti: “Zvakabhuiwa kuti: ‘Usaedze Djehovha* Mwari wako.’” 13 Hino Dhiyabhurosi paakapedza kumuedza, wakamusiya dakara aona mukana umweni wokumuedza.
14 Djesu akahwirinzwa ku Garireya no simba ra Mwari. Uye masoko akanaka nge zvake akabararika mu mutanha wese. 15 Uyewo, iyena akatanga kufundisa mu masinagoga awo, uye anhu ese aimureremedza.
16 Hino iyena akaenda ku Nazareta, kaakakurira, uye maererano no zvaaigara eciita mu Sabudu, iyena akapinda mu sinagoga uye akapurumuka kuti aerenge. 17 Hino iyena akapaswa mupumburu we muphorofita Isaya, uye iyena akaufungura oona painga pakatarhwa kuti: 18 “Mwiya wa Djehovha* uri pandiri, ngokuti akandidzodza kuti ndiziise masoko akanaka ku arombo. Akandituma kuti ndiziise ngezve kusudzunurhwa kune aya akataphwa uye kuti ndifungure madziso e mapofu, kuitira kuti ndisudzunure akadzvinyirirhwa, 19 no kuparidza ngezve nguwa ya Djehovha* yaanozozwira anhu nyasha.” 20 Paakapedza kuerenga, iyena akafunga mupumburu, ouhwirinza ku mubetseri, oenda koogara pasi; uye anhu ese ainga ari mu sinagoga akarumbwa akamuringira. 21 Hino iyena akatanga kuabvunza kuti: “Nyamasi Matarhwa aya amapera kuzwa adzadzika.”
22 Uye ese akatanga kureketa zvakanaka nge zvake uye aishamiswa no masoko anopfadza aaireketa, uye awona aibhuya kuti: “Uu andiepi here mwana wa Zuzee?” 23 Ngokudaro, iyena akaabvunza kuti: “Apana mubvunzo kuti imwimwi mucandibvunza kuti: ‘Murapi, dziporese. Zvese zvatakazwa kuti wakazviita ku Kafarnau, zviitewo mu nyika* yako ino.’” 24 Hino iyena akaabvunza kuti: “Ndinomubvunzai zvirokwazvo kuti, apana muphorofita anoreremedzwa mu nharaunda yake. 25 Ndinomugondesai kuti: Kainga kuno afirhwakadzi akawanda ku Israeri mu mazuwa a Eriya mvura payakatama kunaya ke makore matatu no mwedzi mitanhatu, uye kakaoneka nzara yakakura mu nyika yese iyona. 26 Kunyazi zvakadaro, Eriya aazi kutumirhwa ku umwe we anakadzi aya, asi wakatumirhwa ku mufirhwakadzi we ku Sarefaa ku nyika ye ku Sidhoni. 27 Uyewo, kainga kuno anhu akawanda ainga ano mapere ku Israeri mu nguwa ye muphorofita Erizeu; asi apana umwe wawo wakaporeswa,* kunza ka Naamani basi we ku Siriya.” 28 Uye ese aizwa masoko aya mu sinagoga akanyangadzwa, 29 awona akamutora oenda naye kunza ke thaundi nokukasika, oenda naye pa muceto pe dunhu rainga riri mu thaundi irona kuti amukhandire pasi. 30 Asi iyena akapinda pakati pawo otoenda.
31 Iyena akaenda ku Kafarnau, thaundi re Garireya. Uye aiafundisa mu Sabudu, 32 uye awona aishamiswa no mafundisiro ake, ngokuti iyena aiafundisa zvaibva kuna Mwari. 33 Mu sinagoga mainga muno mwanarume wainga uno dhimoni kana kuti mwiya wakashata, uye wakakhuwa eciti: 34 “Haa! Munodei na isusu,* Djesu we ku Nazareta? Mauya kuzotitsakatisa here? Ndinonyasa kuziya kuti ndimwi ani, muri Mucena wa Mwari.” 35 Asi Djesu akarisumurura eciti: “Nyarara, uye buda mu munhu uu.” Hino mumasure me kumbwedzera pasi mwanarumewo pakati pawo, dhimoniro rakabuda risikazi kumukuwadza. 36 Ngokudaro, ese akashamiswa uye akatanga kubvunzana kuti: “Masoko aya nge e mukhaindii? Ngokuti iyena anobhuya no simba kuti madhimoni abude, uye awona anobuda!” 37 Masoko anocokuita naye akabararika mu nharaundeyo yese.
38 Mumasure me kubuda mu sinagoga, iyena akapinda mumba ma Simoni. Ambiya a Simoni ainga akaferuka maningi, uye anhu akakumbira Djesu kuti aabetsere. 39 Hino iyena akakotama paainga aari, akasumurura nhendeyo, uye iyona yakapera. Ambiyewo akapurumuka uye pa nguwa imweyo akatanga kuabikira.
40 Asi zuwa parainga raakudoka, ese ainga ano anhu ari kurhwara nhenda dzakasiyana-siyana akaenda nawo kaari. Iyena akaatsanzikira nyara eciaporesa. 41 Madhimoni aibudawo mu anhu akawanda, aikhuwa eciti: “Ndimwi Mwana wa Mwari.” Asi iyena aiasumurura uye ainga asikatenderi kuti awona arekete, ngokuti awona aimuziya kuti ndi Kristu.
42 Pakainga kaedza, akabuda oenda kake ega. Asi anhu akatanga kumupsvaka uye akaguma kaainga ari, awona akaedza kumupingaidza kuti asaasiye. 43 Asi iyena akati kaari: “Ndinodikanawo kuziisa masoko akanaka e Umambo wa Mwari ku mathaundi amweni, ngokuti ndizvo zvandakatumirhwa.” 44 Ngokudaro, iyena akaenderera mberi eciparidza mu masinagoga e Djudhiya.