Djoshuwa

22 Hino Djoshuwa wakadainza Arubheni, Agadhi, uye hafu ye dzinza ra Manase 2 uye wakaabvunza kuti: “Imwimwi makaita zvese zvakabhuiwa na Mozesi museenzi wa Djehovha, uye makazwira izwi rangu pa zvese zvandakamubvunzai. 3 Imwimwi amuzi kusiya hama dzenyu pa nguwa yese ii dakara nyamasi; uye makazwira mitemo yese ya Djehovha Mwari wenyu. 4 Zvino Djehovha Mwari wenyu, azorodza hama dzenyu hinga zvaakapikira. Hino imwimwi mungahwirira ku matenda enyu, ku nyika yamakapaswa na Mozesi museenzi wa Djehovha hinga nhaka ku dii rimweni* re Djorodhani. 5 Asi nyasai kuzwira nhungamiriro uye Mutemo wamakapaswa na Mozesi museenzi wa Djehovha, nge kuda Djehovha Mwari wenyu, nge kuhamba mu makwanza ake ese, nge kuzwira nhungamiriro yake, nge kunyasa kugara dhuze naye, uye kumuseenzera no mwoyo wenyu wese uye no mwiya* wenyu wese.”

6 Hino Djoshuwa wakaakomborera uye wakaasiya kuti aende, uye awona akahwirira ku matenda awo. 7 Ku hafu ye dzinza ra Manase, Mozesi wainga wakaapasa nhaka ku Bhazani, uye ku hafu imweni ye dzinza ra Manase, Djoshuwa wakaapasa mbuto ku dii re kumadokero e Djorodhani, padhuze no hama dzawo. Uye Djoshuwa paakaabvunza kuti aende ku matenda awo, iyena wakaakomborera 8 uye wakaabvunza kuti: “Hwirirai ku matenda enyu no upfumi wakawandisisa uye no zvipfuyo zvakawandisisa, no prata, oro, kobre, simbi, uye no macira akawandisa. Kowanisanai no hama dzenyu zviro zvamakatora kubva ku azondi enyu.”

9 Mumasure mazvo, Arubheni, Agadhi, uye hafu yo dzinza ra Manase akasiya Aisraeri amweni ku Siro, mu nyika yo Kanani, uye akahwirira ku nyika ye Giriyadhi, mu nyika yaakapaswa kuti atore uye agaremo, maererano no mutemo wa Djehovha eciseenzesa Mozesi. 10 Paakaguma mu mutanha we Djorodhani mu nyika yo Kanani, Arubheni, Agadhi, uye hafu yo dzinza ra Manase akawaka artari ipona padhuze no Djorodhani, artari yakakura uye inoshamisa. 11 Nokuhamba ke nguwa, Aisraeri amweni akabvunzwa kuti: “Onai! Arubheni, Agadhi, uye hafu yo dzinza ra Manase awaka artari ku mugano we nyika yo Kanani, ku mutanha we Djorodhani, ku mbuto iri ku dii re Aisraeri.” 12 Aisraeri paakazwa izvi, ungano yese ye Israeri yakaungana ku Siro kuti aende kooarhwisa.

13 Hino Aisraeri akatuma Fineya mwana we mupristi Ereazari ku Arubheni, ku Agadhi, uye ku hafu ye dzinza ra Manase mu nyika ye Giriyadhi, 14 kutobatanidzawo atungamiriri gumi, mutungamiriri umwe na umwe waibva ku nyumba imwe na imwe ye ku dii ra baba ku madzinza ese e Israeri, uye umwe na umwe wawo wainga ari musoro pa nyumba ye ku dii ra baba pakati pe mamirionji e Israeri. 15 Paakaguma ku Arubheni, ku Agadhi, uye ku hafu ye dzinza ra Manase, ku nyika ye Giriyadhi, awona akaabvunza kuti:

16 “Izvi ndizvo zvinobhuiwa no ungano yese ya Djehovha: ‘Ngei imwimwi maita ciito ici ce kutama kutendeka kuna Mwari we Israeri? Imwimwi masiya nyamasi kuteera Djehovha nge kudziwakira artari uye kupandukira Djehovha. 17 Cishaishi cakaizwa ku Peori acizi kutikwanira here? Dakara nyamasi atisati tanyasa kuceneswa kubva paciri, kunyazi hazvo dambudziko rakauira ungano ya Djehovha. 18 Uye imwimwi zvino muri kuda kusiya kuteera Djehovha? Kana nyamasi imwimwi mukapandukira Djehovha, hino mangwana iyena acanyangadzwira ungano yese ye Israeri. 19 Hino kana cikonzero ciri cokuti nyika yamapaswa hinga nhaka aizi kucena, birai muende ku dii re nyika ya Djehovha, kuno tabhernakuro ya Djehovha, uye garai pakati pedu, asi musapandukire Djehovha uye musaite kuti tigare apanduki nge kudziwakira artari imweni kunza ke artari ya Djehovha Mwari wedu. 20 Akani mwana wa Zera paakaita ciito ce kutama kutendeka panocokuita no zviro zvainga zvakasanangurirhwa kutsakatiswa,* ungano yese ye Israeri aizi kutsamwirhwa here? Uye iyena andiepi ega wakafa nge ndaa ye cishaishi cake.’”

21 Hino Arubheni, Agadhi, uye hafu ye dzinza ra Manase akadaira misoro ye mamirionji e Israeri, eciti: 22 “Mwari we anamwari, Djehovha!* Mwari we anamwari, Djehovha! Iyena anozviziya, uye Israeri icazviziyawo. Kana isusu tamupandukira uye atizi kutendeka kuna Djehovha, ngatisazwirhwe usisi naye pa zuwa iri. 23 Kana isusu tadziwakira artari yedu kuti tisiye kuteera Djehovha uye kuti tiitire ipona mipiro inopiswa, mipiro ye zvirimwa, uye zvibairo zve kuita kuti pagare no runyararo, Djehovha acaita kuti tiphanicwe. 24 Haiwa, isusu taita izvona kuitira kuti, kana mune ramangwana, ana enyu akazobvunza ana edu kuti: “Cinyi camunaco panocokuita na Djehovha Mwari we Israeri? 25 Djehovha akakanda Djorodhani hinga mugano pakati pedu na imwimwi Arubheni uye Agadhi. Imwimwi amuna dii panocokuita na Djehovha.” Ngokudaro, ana enyu anozopingaidza ana edu kunamata* Djehovha.’

26 “Ndiyo ndaa takati: ‘Ngatiwake artari, haiwa kuti tiitirepo mipiro inopiswa kana zvibairo, 27 asi kuti igare upupuri pakati pedu isusu na imwimwi, uye pakati pe ana edu no ana* enyu, kuti ticaseenzera Djehovha pamberi pake no mipiro yedu inopiswa uye zvibairo zvedu zve kuita kuti tirekererhwe zvitema, uye no zvibairo zvimweni, kuitira kuti mune ramangwana ana enyu asazobvunze ana edu kuti: “Imwimwi amuna dii panocokuita na Djehovha.”’ 28 Nge ndaa yazvo takati: ‘Kana awona akazotibvunza izvona uye ozobvunzawo ana* edu mune ramangwana, isusu ticaabvunza kuti: “Onai artari yakagadzirhwa no madzitsekuru edu yakaezana no ya Djehovha, haiwa kuitira kuti paizwe mipiro inopiswa kana zvibairo, asi kuti igare upupuri pakati pedu na imwimwi.”’ 29 Atizopandukiri Djehovha kana kusiya kuteera Djehovha nyamasi nge kuwaka artari kuti iizirhwe mipiro inopiswa, mipiro ye zvirimwa, kana zvibairo, kusiya artari ya Djehovha Mwari wedu, iri pamberi pe tabhernakuro yake!”

30 Mupristi Fineya uye atungamiriri e ungano, no misoro ye mamirionji e Israeri ainga anaye paakazwa zvakabhuiwa no ana a Rubheni, a Gadhi, uye a Manase, akagutsikana. 31 Ngokudaro, Fineya mwana we mupristi Ereazari, wakabvunza ana a Rubheni, a Gadhi, uye a Manase kuti: “Nyamasi taakuziya kuti Djehovha ari pakati pedu, ngokuti imwimwi amuzi kuita ciito ce kutama kutendeka pamberi pa Djehovha. Zvino imwimwi masudzunura Aisraeri mu nyara dza Djehovha.”

32 Hino Fineya mwana we mupristi Ereazari no atungamiriri, akasiya Arubheni uye Agadhi mu nyika ye Giriyadhi uye akahwirira ku nyika yo Kanani, ecitora masoko awona ku Aisraeri amweni. 33 Uye Aisraeri akagutsikana no masoko aakazwa. Aisraeri akakudza Mwari, uye aazi kubhuyazve ngezve kurhwisa Arubheni no Agadhi kuti atsakatise nyika yaaigara.

34 Hino Arubheni no Agadhi akapasa zina* artari iyona, ngokuti awona akati: “Artari ii i mupupuri pakati pedu kuti Djehovha ndi Mwari we zvirokwazvo.”