Rute
3 Naomi nyazani a Rute, akamubvunza kuti: “Mwana wangu, ndinodikana kukupsvakira mwamuna* kuti ugare zvakanaka. 2 Bhoazi ndi nyaukama wedu. Ndiye ano aseenzi e anakadzi awainga unawo. Nyamasi madekoni ano, iyena ucaenda koourusa sevhadha ku mbuto yekupurira. 3 Hino samba, wodzora mafuta anonuhwirira; pedzepo pfeka macira akanakisisa* aunawo uye enda ku mbuto yekupurira. Usasiye kuti iyena akuone dakara apedza kurhya uye kumwa. 4 Kana iyena akaenda koowata, nyasa kuona kaacawatira uye ona kuno tsoka dzake, wowata ikona. Uye iyena acakubvunza zvaunodikana kuita.”
5 Rute wakadaira kuti: “Ndicaita zvese zvamandibvunza.” 6 Hino iyena wakaenda ku mbuto inopurirhwa uye wakaita zvese zvaainga abvunzwa na nyazani ake. 7 Pa nguwa iyona, Bhoazi wairhya no kumwa uye mwoyo wake wainga wakapfara maningi. Hino iyena wakaenda koowata padhuze no mututu* wo sevhadha. Mumasure mazvo Rute wakakhwedera ecinyasa kungwarira, iyena wakaona kainga kuno mirenje dzake, wowata ikona. 8 Pakati pe usiku, Bhoazi wakatanga kutetemera ngo mhepo, uye paakamuka wogara pasi wakaona mwanakadzi akawata padhuze no mirenje dzake. 9 Bhoazi wakabvunzisa kuti: “Ndiwe ani?” Iyena wakadaira kuti: “Ndini Rute museenzi wenyu. Fukidzai museenzi wenyu ngo djira renyu, ngokuti imwimwi muri musudzunuri.” 10 Iyena wakati: “Djehovha ngaakukomborere mwana wangu. Iwewe wanyasa kupangidza rudo rakagondeka zvino kudarika rawakapangidza pakutanga, ngokuti auzi kuteera anarume madjaha, angadai ari apfumi kana arombo. 11 Uye zvino mwana wangu, usathye. Ndicaita zvese zvawandibvunza, ngokuti ese mu thaundi anoziya* kuti iwewe uri mwanakadzi wakanaka. 12 Izvirokwazvo kuti inini ndiri musudzunuri, asi pano musudzunuri umweni uno ukama we padhuze kudarika inini. 13 Wata pano usiku uno, kana iyena akakusudzunura mangwana macibesi, zvakanaka! Ngaakusudzunure. Asi kana akatama kukusudzunura, ndinopika na Djehovha* mupenyu kuti inini ndicakusudzunura. Wata pano dakara kaedza.”
14 Ngokudaro, iyena wakawata dhuze no tsoka dzake dakara kaakuedza uye wakamuka kucakasvipa kuti asaziikanwe no munhu. Hino Bhoazi wakati: “Apana unodikana kuziya kuti kauya mwanakadzi kuno ku mbuto yekupurira.” 15 Uye wakatizve: “Unzisa djira rawakafuka uye riware.” Hino wakariwara uye Bhoazi wakamukandira midida mitanhatu* yo sevhadha, uye wakamuthika, pedzepo Bhoazi wakapinda mu thaundi.
16 Rute wakahwirira kuna nyazani ake uye awona akamubvunzisa kuti: “Zviro zvakuhambira kudini* mwana wangu?” Rute wakaapanganidzira zviro zvese zvaainga aizirhwa na Bhoazi. 17 Rute* wakatizve: “Iyena wandipasa midida mitanhatu yo sevhadha, uye iyena wati: ‘Usaende kuna nyazani ako usina ciro.’” 18 Hino Naomi wakati: “Etsera mwana wangu dakara waziya kuti nyaya yakhona icahamba kudini, ngokuti mwanarume uu aazozorori dakara agadzirisa nyaya ii nyamasi.”