Rute
4 Bhoazi wakaenda pa musuwo mukuru we thaundi uye wakagara ipona. Musudzunuri wainga abhuiwa na Bhoazi paaidarika ndipo, Bhoazi wakati: “Ngana, uya kuno uye gara apa.” Iyena wakaenda uye wakagara. 2 Hino Bhoazi wakadainza akuru gumi e thaundi uye wakati: “Garai apa.” Uye awona akagara.
3 Ngokudaro, Bhoazi wakati ku musudzunuri: “Naomi wakabva ku Moabhi, unodikana kutengesa munda wainga uri we hama yedu Erimereki. 4 Hino inini ndaona kuti ndaidikana kukuziisa ngezve nyaya ii, uye kukubvunza kuti: ‘Utenge pamberi pe agari e muno uye pe akuru e anhu angu. Kana iwewe ukakwanisa kuutenga, utenge. Asi kana iwewe ukatama kuutenga, ndibvunze kuti ndizviziye, ngokuti iwewe uno citenderhwa ce kuutenga, uye inini ndinozoteera sure kako.’” Iyena wakadaira kuti: “Ndakagadzirira kuutenga.” 5 Bhoazi wakati: “Pa zuwa raucatenga munda wa Naomi, unodikanawo kutenga munda wa Rute we ku Moabhi, mukadzi we mwanarume wakafa, kuitira kuti zina re mwanarume wakafa rihwirinzwe pa nhaka yake.” 6 Paakazwa izvi, musudzunuriwo wakati: “Andikwanisi kuutenga, kuitira kuti ndisatsakatise nhaka yangu. Utenge iwewe no citenderhwa cangu ce kutenga, ngokuti inini andikwanisi kuutenga.”
7 Mu nguwa dzo kare, tsika yo Israeri inocokuita no citenderhwa ce kusudzunura uye no kucinja citenderhwa cino munhu kuti acipase munhu umweni, cainga ciri ici: Munhu wainga ano citenderhwa waidikana kukhumura sandariya uye oipasa munhu uya waaiita naye citenderano, ngokudaro zvaigara pamhene kuti atenderana mu Israeri. 8 Hino paakabvunza Bhoazi kuti: “Utenge hako iwewe,” musudzunuri wakakhumura sandariya yake. 9 Bhoazi wakabvunza akuru uye anhu ese kuti: “Muri kupupurira nyamasi kuti ndiri kutenga na Naomi zvese zvainga zviri zva Erimereki uye zvese zvainga zviri zva Kirioni na Maroni. 10 Uye ndiri kutora Rute we ku Moabhi wainga ari mukadzi wa Maroni kuti agare mukadzi wangu kuti ndihwirinze zina re mwanarume wakafa pa nhaka yake, kuitira kuti zina rake risatsakatike pakati pe hama dzake uye pa musuwo mukuru we thaundi rake. Imwimwi nyamasi ndimwi apupuri.”
11 Ngokudaro, anhu ese ainga ari pa musuwo mukuru we thaundi uye akuru akati: “Tiri apupuri! Djehovha* ngaaite kuti mukadzi ari kuuya mumba mako aezane na Rakeri uye Reya, awo akabambisa nyumba ye Israeri. Budirira mu Efrata uye gara no zina rakanaka* mu Bheterehema. 12 Ana aunozopaswa na Djehovha eciseenzesa musikana uu, ngaite kuti nyumba yako iezane no nyumba ya Perezi, mwana wa Djudha waakabara na Tamari.”
13 Ngokudaro, Bhoazi wakatora Rute uye iyena wakagara mukadzi wake. Iyena wakawata* naye uye Djehovha akatendera kuti abate pamwiri uye wakabara mwana we mwanarume. 14 Uye anakadzi akati kuna Naomi: “Djehovha ngaakudzwe, ngokuti iyena aita kuti nyamasi uwone musudzunuri. Zina ro mwana uu ngariziiswe mu Israeri! 15 Iyena* wamunyaradzai mu upenyu wenyu,* iyena unozomubambisai pakucembera kenyu, iyena wabarhwa no murora wenyu uya unomudai uye iyena wakanaka maningi kudarika ana e anarume anomwe.” 16 Naomi wakatora mwanewo, womubata mu nyara uye wakamurera*. 17 Hino anyacigarisano akamupasa zina. Awona akati: “Naomi wabarirhwa mwana,” uye akamupasa zina rokuti Obhedhi. Iyena ndi baba a Djesee, baba a Dhavhidhi.
18 Mubarirhwana wa Perezi ndi uu*: Perezi wakabara Esroni; 19 Esroni wakabara Ramu; Ramu wakabara Aminadhabhi; 20 Aminadhabhi wakabara Naasoni; Naasoni wakabara Sarimoni; 21 Sarimoni wakabara Bhoazi; Bhoazi wakabara Obhedhi; 22 Obhedhi wakabara Djesee; uye Djesee wakabara Dhavhidhi.