Akatarhwa na Mateu

25 “Hino Umambo we kudenga ungaezaniswa no mhandwe gumi, dzakatora zvibani zvadzo dzoenda koosongana no mwanarume waicata. 2 Shanu dzainga dzakapusa, uye shanu dzainga dzakangwara. 3 Dzainga dzakapusa dzakatora zvibani zvadzo, asi adzizi kutora mafuta, 4 asi dzakangwara dzakatora zvibani zvadzo, no mafuta amweni pa muceto. 5 Mwanarume uya waicata paakanonoka kuuya, mhandwe dzese dzakatanga kuzwa hope uye dzakawata. 6 Pakati pe usiku, kakazwika izwi recidainzira kuti: ‘Mwanarume uri kucata waapano! Budai muuye kozomutambira.’ 7 Mhandwe dzese dzakamuka uye dzakagadzirira zvibani zvadzo. 8 Dzainga dzakapusa dzakati kune dzakangwara: ‘Tipungurireiwo mafuta enyu, ngokuti zvibani zvedu zvaakuda kudzima.’ 9 Dzakangwara dzakadaira dzeciti: ‘Pamweni aazokwani kupungurirana na imwimwi. Hino endai kootenga mafuta enyu kaanotengeswa.’ 10 Padzainga dzaenda kootenga mafuta, mwanarume waicata wakaguma. Mhandwe dzainga dzakagadzirira dzakapinda naye mu mabiko e mucato, uye musuwo wakafungwa. 11 Pedzepo, dzakazogumawo mhandwe dzimweni dzeciti: ‘Tenzi, Tenzi, tifungurireiwo musuwo!’ 12 Iyena wakaadaira eciti: ‘Ndinomubvunzai zvirokwazvo kuti, andimuzii.’

13 “Hino rumbwai makarinda, ngokuti amurizii zuwa kana nguwa yakhona.

14 “Ngokuti zvakaezana no mwanarume wekuti asati aita rhwendo, wakadainza aranda ake oasiira upfumi wake. 15 Iyena wakapasa umwe matarento* mashanu, umweni mairi, uye umwenizve rimwe, maererano no zvaikwaniswa no umwe na umwe wawo, uye wakaenda. 16 Uya wakapaswa matarento mashanu, wakaenda kooita bhizi no kukasika uye wakaonazve mashanu. 17 Zvimwezvoo, uya wakapaswa mairi, wakaonawo amweni mairi. 18 Asi uya wainga wapaswa rimwe, wakaenda, wocera rindi, wofushira mare* ya tenzi wake.

19 “Mumasure me nguwa yakareba, tenzi uya wakazohwirira kuti aone kuti aranda ake aiitei no mare yake. 20 Uya wainga wapaswa matarento mashanu, wakauya no amweni mashanu eciti: ‘Tenzi, makandisiira matarento mashanu; onai, ndaona amweni mashanu.’ 21 Tenzi wake wakati kaari: ‘Waita zvakanaka muranda wakanaka uye wakatendeka! Watendeka pa zviro zvidoko. Ndicakugadza kuti ugare muonereri we zviro zvakawanda. Pfara pamwepo na tenzi wako.’ 22 Pedzepo, uya wakapaswa matarento mairi wakauya eciti: ‘Tenzi, makandisiira matarento mairi; onai ndaonazve amweni mairi.’ 23 Tenzi wake wakati kaari: ‘Waita zvakanaka muranda wakanaka uye wakatendeka! Watendeka pa zviro zvidoko. Ndicakugadza kuti ugare muonereri we zviro zvakawanda. Pfara pamwepo na tenzi wako.’

24 “Pakupedzesera, uya wainga wakapaswa tarento rimwe basi wakaguma, woti: ‘Tenzi, ndaiziya kuti muri munhu wakaoma mwoyo, munokorora pamusikazi kusima uye munounganidza pamusikazi kukusa. 25 Ndiyo ndaa, ndakathya ndoenda koofushira tarento renyu. Tambirai tarento renyu iri.’ 26 Tenzi wake wakamudaira kuti: ‘Muranda wakashata uye uno nungo, kureya kuti waitozviziya kuti ndinokorora pandisikazi kusima uye ndinounganidza pandisikazi kukusa? 27 Hino waidikana kuigisa mare* yangu mu bhanko, uye pandaizohwirira, ndaizoiona yabarira.

28 “‘Hino, mutorerei tarento iri, moripasa uya ano matarento gumi. 29 Ngokuti uya anazvo acapaswa zvimweni uye acagara no zvakawanda. Asi uya asina, acatorerhwa kunyazi zviya zvaanazvo. 30 Khandirai kunza ku cidima muranda uu usikabetseri. Ikona ndiko kaacacema no kurumanisa mazino ake.’

31 “Mwana we munhu paanouya mu rukudzo rake, ane ngirozi dzese, acagara pa cigaro ce umambo cinokudzwa. 32 Madzinza ese acaunganidzwa pamberi pake, uye iyena acaparadzanisa anhu, hingana kuparadzanisa kunoita muushi mabira no mbudzi. 33 Uye acakanda mabira ku moko wake kwawo, asi mbudzi ku moko we boshwe.

34 “Hino, Mambo anozoti kune aya ari ku moko wake kwawo: ‘Uyai imwimwi makakomborerhwa na Baba angu, garai nhaka ye Umambo wamakagadzirirhwa kubvira pakutanga ke nyika. 35 Ngokuti, pandainga ndino nzara, makandipasa cekurhya; ndainga ndino mukhaha, makandipasa zvokumwa. Mainga musikandizii, asi makanditambira zvakanaka; 36 ndainga ndisikazi kupfeka,* makandipfekedza. Ndakarhwara, makandibetsera. Ndainga ndiri mu kadheya, makauya koondiona.’ 37 Hino, anhu anatsi anozomudaira eciti: ‘Tenzi, takamuonai riini muno nzara, tomupasai zvokurhya, kana kuti muno mukaha, tomupasai zvokumwa? 38 Takamuonai riini tisikamuzii uye tomutambirai zvakanaka, kana kuti musikazi kupfeka tomupfekedzai? 39 Takamuonai riini mecirhwara, kana kuti pamainga muri mu kadheya uye touya kuzomuonai?’ 40 Mambo acaadaira kuti: ‘Ndinomubvunzai zvirokwazvo kuti, kana makazviitira umwe we hama dzangu dzidoko idzi, makazviitira inini.’

41 “Iyena acati ku aya ari ku dii re moko we boshwe: ‘Budai pandiri imwimwi makatukwa, muende mu muriro usikaperi wakagadzirirhwa Dhiyabhurosi no ngirozi dzake. 42 Ngokuti ndainga ndino nzara, asi amuzi kundipasa zvekurhya; ndainga ndino mukaha, asi amuzi kundipasa zvokumwa. 43 Mainga musikandizii, asi amuzi kunditambira zvakanaka; ndainga ndisikazi kupfeka, asi amuzi kundipfekedza; ndainga ndecirhwara uye ndiri mu kadheya, asi amuzi kundibetsera.’ 44 Hino awona acamudairawo kuti: ‘Tenzi, takamuonai riini muno nzara, kana no mukaha, kana kuti tisikamuzii, musikazi kupfeka, mecirhwara, kana kuti muri mu kadheya uye atizi kumubetserai?’ 45 Iyena acaadaira kuti: ‘Ndinomubvunzai zvirokwazvo kuti, zvese zvamusikazi kuitira umwe we adoko aya, amuzi kundiitirawo.’ 46 Aya acaenda kootsakatswa nokusikaperi, asi anatsi ku upenyu usikaperi.”