Rute
2 Naomi wainga ano nyaukama we mwamuna wake wainga akapfuma maningi; iyena waizwi Bhoazi uye wainga ari nyaukama wa Erimereki.
2 Rute we ku Moabhi wakati kuna Naomi: “Ndapota, ndisiyei kuti ndiende koopsvaka tsangwa mu munda me munhu ucandizwira nyasha.” Ngokudaro, Naomi wakati: “Enda mwana wangu.” 3 Hino iyena wakaenda uye wakatanga kupsvaka tsangwa mu munda ari sure ke akorori. Asikazvizii, iyena wakaenda koopsvaka mu munda wainga uri wa Bhoazi, uwo wainga ari nyaukama wa Erimereki. 4 Pa nguwa iyona, Bhoazi wakaguma ecibva ku Bheterehema uye wakati ku akorori: “Djehovha* ngaagare na imwimwi.” Uye awona akadaira eciti: “Djehovha* ngaamukomborerei.”
5 Bhoazi wakabvunzisa mutungamiriri we akorori kuti: “Musikana uwo ngewe kupi?” 6 Mutungamiriri we akorori wakadaira eciti: “Musikana uwo ngewe ku Moabhi, iyena wakauya na Naomi kubva ku nyika ye Moabhi. 7 Iyena wandibvunzisa kuti: ‘Ndapota, munganditenderawo here kuti ndipsvake tsangwa ndecinongera zviri kusiiwa no akorori?’ Iyena uri kuseenza kubvira paaguma macibesi, watombogarawo zvino pa bvute kuti ambozorore padoko.”
8 Hino Bhoazi wakabvunza Rute kuti: “Izwa mwana wangu. Usasaende koopsvaka tsangwa ku munda umweni, kunyazi kuenda ku mbuto imweni; gara padhuze no aseenzi angu e anakadzi. 9 Nyasa kuona kuti ari kukorora munda upi, uye enda nawo. Ndabvunza aseenzi angu e anarume kuti asakuvhiringidze. Kana waano mukaha, enda kuno jaro dze mvura womwa mvura yacerhwa no aseenzi.”
10 Ngokudaro, iyena wakagodama ohwarara uye womubvunzisa kuti: “Ngei mandizwira nyasha, uye ngei mandionawo sezvo inini ndiri we nyika imweni?” 11 Bhoazi wakamudaira kuti: “Ndakazwa zvese zvawakaitira nyazani ako mumasure me kufa ke mwamuna wako, kuti wakasiya baba ako na mai ako uye nyika ye anyaukama ako, uye wakauya kuzogara no anhu awainga usikazii. 12 Djehovha ngaakukomborere* nge zvese zvawakaita, uye Djehovha Mwari we Israeri ngaakupase mubairo wakakwana unobva kaari, uya ano mabaphiro awauya kuzotizira pasi pawo.” 13 Hino Rute wakati: “Ngandizwirhwe nyasha ndimwi tenzi wangu, sezvo mandinyaradza uye mareketa nge mushobo wateramisa* museenzi wenyu, kunyazi ndisiripi umwe we aseenzi enyu.”
14 Pa nguwa ye kurhya, Bhoazi wakabvunza Rute kuti: “Uya utore pau, usee mu vhinagri urhye.” Hino iyena wakaenda uye wakagara pamwepo no akorori. Bhoazi wakamupasa sevhadha yokukangwa, iyena wakarhya oguta uye osiya zvimweni. 15 Paakamuka kuti aende koonongera tsangwa, Bhoazi wakabvunza aseenzi ake kuti: “Musiyei anongere tsangwa dzatemwa no akorori, uye musamutambudze. 16 Uyezve, bvisai zvirimwa zvimweni pa musumbu yamasunga mozvisiya sure kuitira kuti iyena anongere uye musamurambidze.”
17 Ngokudaro, iyena wakarumbwa ecinongera tsangwa dakara kasvipa. Pedzepo wakapura zvaainga atsangudza uye zvakakwana efa imwe* ye sevhadha. 18 Hino Rute wakathwara sevhadha uye wopinda mu thaundi, uye nyazani ake akaona zvaainga atsangudza. Rute wakabvisawo zvokurhya zvainga zvasara paainga arhya woguta uye wozvipasa nyazani ake.
19 Nyazani ake akamubvunzisa kuti: “Watsangudzepi nyamasi? Waseenzera kupi? Ngaakomborerhwe munhu wakuzwirewo nyasha.” Ngokudaro, iyena wakabvunza nyazani ake ngezve muridzi we munda waainga aseenzera eciti: “Zina re muridzi we munda wandaseenzera nyamasi ndi Bhoazi.” 20 Naomi wakati ku murora wake: “Iyena ngaakomborerhwe na Djehovha, uwo apangidza rudo rakagondeka ku apenyu uye ku akafa.” Uye Naomi wakatunhudzira eciti: “Mwanarume uu ndi nyaukama wedu. Iyena ndi umwe we asudzunuri edu*.” 21 Hino Rute we ku Moabhi wakati: “Iyena wandibvunzawo kuti: ‘Gara padhuze no aseenzi angu dakara awona apedza kukorora.’” 22 Hino Naomi wakabvunza Rute murora wake kuti: “Mwana wangu, zviri nani kuperekedza aseenzi ake e anakadzi pane kuti uende kooshuphwa ku munda umweni.”
23 Ngokudaro, iyena wakarumbwa ari padhuze pe aseenzi e anakadzi a Bhoazi uye wakatsangudza dakara mukupera ke kukororhwa ke sevhada no trigu. Uye iyena wakarumbwa ecigara na nyazani ake.