Rute
1 Mu nguwa yaitongwa nge atongi, mu nyikemo makaitika nzara; uye mwanarume umweni wakabva ku Bheterehema ku nyika yo Djudha oenda koogara ku nyika yo Moabhi, iyena no mukadzi wake pamwepo no ana ake airi. 2 Mwanarumewo waizwi Erimereki,* mukadzi wake waizwi Naomi* uye ana ake airi aizwi Maroni* na Kiriyoni.* Awona ainga ari e ku Efrata ku Bheterehema re Djudha. Akaguma ku nyika yo Moabhi uye akagara ikona.
3 Mumasure me kanguwa, Erimereki mwamuna wa Naomi wakafa, uye Naomi wakasara no ana ake airi. 4 Nokuhamba ke nguwa, ana ake akazowaka anakadzi e ku Moabhi, umwe waizwi Orpa uye umweni waizwi Rute. Awona akagareyo ke makore angakwana gumi. 5 Mumasure mazvo, ana ake airi Maroni na Kiriyoni akazofawo, uye Naomi wakasara asina ana uye asina mwamuna. 6 Hino, iyena no arora ake akabuda ku nyika yo Moabhi, ngokuti paainga ari ku Moabhi, iyena wakazwa kuti Djehovha ainga arangarirazve ngezve anhu ake eciapasa zvekurhya.*
7 Naomi wakabva kaaigara no arora ake. Paaihamba mu gwanza ecihwirira ku nyika yo Djudha, 8 iyena wakati ku arora ake: “Hwirirai, umwe na umwe ngaahwirire kumba ka mai ake. Djehovha ngaamupangidzirei rudo rakagondeka hinga ramakapangidzira amuna enyu aya akafa uye ramakandipangidzirawo. 9 Djehovha ngaaite kuti umwe na umwe wenyu awakwe* uye agare zvakanaka. Hino iyena wakaapsvoda uye awona akatanga kucema no izwi guru. 10 Uye awona aiti: “Haiwa, isusu ticaenda nemwi ku anhu enyu.” 11 Asi Naomi wakati: “Hwirirai ana angu, ngei muri kuda kuenda na inini? Kodi ndingabarazve ana ozogara amuna enyu here? 12 Hwirirai ana angu. Endai, ngokuti azvicaiti kuti ndiwakwe ngokuti ndacembera. Kunyazi ndikawakwa* nyamasi cousiku uno uye ndobara ana, 13 imwimwi maizoaetsera dakara akura here? Maizogara musikazi kuwakwa meciaetsera here? Haiwa ana angu, ndiri kurhwadziwa maningi ngo kumuonai pa mugariro uu, ngokuti nyara ya Djehovha iri kundirhwisa.”
14 Awona akacemazve no izwi guru, pedzepo Orpa wakapsvoda nyazani ake uye wakaenda. Asi Rute wakarumbwa anawo. 15 Ngokudaro, Naomi wakati: “Ona! Orpa wahwirira ku anhu ake uye ku anamwari ake. Hwirirai mwese pamwepo.”
16 Asi Rute wakati: “Musarumbwe mecindibambidzira kuti ndimusiyei uye kuti nditame kuenda nemwi. Ngokuti kamucaenda ndikona kandicaendawo, uye pamucawatira, ndipo pandicawatirawo. Anhu enyu acagarawo anhu angu uye Mwari wenyu acagarawo Mwari wangu. 17 Kamucafira ndikona kandicafirawo uye ndikona kandicakotswawo. Djehovha ngaandiphanice uye ngaazviite nge mushobo unorhwadza, kana ndikatendera kuti ciro cipi haco cindiparadzanise na imwimwi kunza ke rufu.”
18 Naomi paakaona kuti Rute wairumbwa ecida kuenda naye, iyena aazizve kumubambidzira kuti ahwirire. 19 Uye ari airi akaenderera mberi no rhwendo dakara aguma ku Bheterehema. Paakaguma ikona, anhu ese e mu thaundi akatanga kureketa ecishamisika nge ndaa yawo. Uye anakadzi aibvunzisana eciti: “Kodi uu ndi Naomi?” 20 Asi iyena waibvunza anakadziwo kuti: “Musandidainze kuti Naomi.* Ndidainzei kuti Mara,* ngokuti we Masimba Ese aita kuti upenyu wangu urhwadze maningi. 21 Inini ndainga ndino zviro zvese pandakaenda, asi Djehovha aita kuti ndihwirire ndisina ciro. Ngei mecindidainza kuti Naomi, sezvo Djehovha andirhwisa uye Wemasimba Ese aita kuti ndibatane no matambudziko?”
22 Uu ndiwo mushobo wakahwirira Naomi kubva ku nyika yo Moabhi pamwepo na Rute murora wake we ku Moabhi. Awona akaguma ku Bheterehema mukutanga ke kukororhwa ke sevhadha.