Djoshuwa
11 Djabhini mambo we Azori paakandozwa nge zvazvo, wakatumira soko kuna Djobhabhi mambo we Madhoni, mambo we Simironi, mambo we Akisafi, 2 madzimambo e kakutsi ke mutanha we matunhu, e ku bani katemaidumba ke Kinereti, e ku Sefera, e ku mbuto dzino miterero dze Dhori nge kumadokero, 3 uye akatumirawo soko ku Akanani aigara kumabvazuwa uye kumadokero, ku Aamori, ku Ahiti, ku Aperezi, ku Ajebhuzi e ku mutanha we matunhu, uye ku Ahivhi aigara mu muceto me Dunhu re Hermoni mu nyika ye Mizipa. 4 Hino madzimambo ese aya akabva ari pamwepo no anyahondo awo; awona ainga akawanda hinga madjeca e mu muceto me bahari, no makavharo akawandisa uye ngoro dze hondo. 5 Madzimambo ese aya akapinda mucitenderano kuti abatane oenda koowaka musasa ari pamwepo, padhuze no mvura ye Meromi, kuti arhwise Israeri.
6 Hino Djehovha akabvunza Djoshuwa kuti: “Usaathye, ngokuti mangwana pa nguwa yakaita hingana ii, ndicaita kuti ese auraiwe no Israeri. Gura midzira dzo mirenje dzo makavharo awo uye pisa ngoro dzawo no muriro.” 7 Hino Djoshuwa no anarume ese e hondo akaarhwisa paainga asikakariri dhuze no ku mvura ye Meromi. 8 Djehovha akaakanda mu nyara dze Aisraeri, uye awona akaakunda, akaateera dakara ku Sidhoni Huru uye ku Misireti-maimu, ku bani re Mizipa nge kumabvazuwa, uye akaauraya zvekuti apazi kusara kunyazi umwe ari mupenyu. 9 Hino, Djoshuwa wakaita hingana zvaainga abvunzwa na Djehovha kuti aite: Wakagura midzira dzo mirenje dzo makavharo awo uye wakapisa ngoro dzawo dze hondo no muriro.
10 Djoshuwa wakahwirira uye wakatora nyika yo Azori uye wakauraya mambo we imona no supada, ngokuti Azori kareko rainga riri thaundi rainyanya kuseenzeswa no madzimambo ese awona. 11 Awona akauraya ese aigaremo no supada uye akaatsakatisa. Apazi kusara ciro cipi haco ciri cipenyu. Hino iyena wakapisa nyika yo Azori no muriro. 12 Djoshuwa wakatora mathaundi ese e madzimambo awona uye wakakunda madzimambo e imona, nge kuauraya no supada. Iyena wakaatsakatisa, hingana zvaakabvunzwa na Mozesi museenzi wa Djehovha. 13 Asi Aisraeri aazi kupisa kunyazi thaundi ripi haro re aya aigara ku matunhu, kusiya basi Azori, thaundi rimwe basi rakapiswa na Djoshuwa. 14 Aisraeri akatora zviro zvese no zvipfuyo zvese zve mu mathaundi awona. Asi akauraya anhu ese no supada dakara atsakatisa umwe na umwe wawo. Apana waakasiya ari mupenyu. 15 Hingana Djehovha zvaainga abvunza museenzi wake Mozesi, Mozesi wakazvibvunza Djoshuwa, uye Djoshuwa wakaita izvona kamare. Apana kunyazi ciro cimwe haco caakasiya kuita pa zvese zviya zvainga zvabvunzwa Mozesi na Djehovha.
16 Djoshuwa wakatora nyika yese iyona, mutanha we matunhu, Negebhe yese, nyika yese yo Gozeni, ku Sefera, ku Arabha, uye no mutanha we matunhu we Israeri no kumiterero kayo, 17 kubvira ku Dunhu re Haraki, rinokwidza recienda ku Seiri, dakara Bhaari-gadhi, ku bani re Rebhanoni, nge kumuceto ke Dunhu re Hermoni, uye iyena wakabata madzimambo ese aro, wakaakunda uye wakaauraya. 18 Djoshuwa wakarhwisa madzimambo ese aya ke nguwa yakareba. 19 Apana thaundi rimweni rakaita runyararo no Aisraeri kusiya Ahivhi aigara ku Jibheyoni. Aisraeri akatora mathaundi amweni nge kuarhwisa. 20 Djehovha ndiye akaasiya eciomesa mwoyo yawo kuitira kuti arhwisane no Aisraeri, kuti aatsakatise asikaazwiri usisi. Awona aidikana kutsakatiswa, hingana zvakabhuiwa na Djehovha kuna Mozesi.
21 Pa nguwa iyona, Djoshuwa wakatsakatisa Aanakimu e ku mutanha we matunhu, e ku Hebroni, e ku Dhebhiri, e ku Anabhi, kutobatanidzawo no e ku mutanha wese we matunhu we Djudha uye no e mutanha wese we matunhu we Israeri. Djoshuwa wakatsatisa awona pamwepo no mathaundi awo. 22 Akuzi kusara kunyazi Muanakimu umwe hake mu nyika yo Aisraeri; akasara basi ku Gaza, ku Gati, uye ku Ashidhodhi. 23 Ngokudaro, Djoshuwa wakatora nyika yese, hinga zvainga zvagondeswa Mozesi na Djehovha; hino Djoshuwa wakapasa hinga nhaka nyikeyo ku Aisraeri, kuti akoanisane maererano no zvaidiwa ku dzinza rimwe na rimwe. Ngokudaro nyikeyo yakagara mu runyararo.