Djoshuwa
12 Aya ndiwo madzimambo e nyika dzakanyiswa nge Aisraeri uye nyika dzaakatora ku dii re kumabvazuwa ke Djorodhani, kubvira ku Bani re Arinoni* dakara ku Dunhu re Hermoni uye dii rese re kumabvazuwa ke Arabha: 2 Sioni mambo we Aamori, waigara ku Hesibhoni waitonga kubvira ku Aroeri, yainga iri mu muceto me Bani ro Arinoni,* kubvira pakati po Bani uye hafu yo Giriyadhi dakara ku Bani* ro Jabhoki, pa mugano no nyika yo Aamoni. 3 Iyena waitongawo Arabha, dakara Bahari re Kinereti* ngece kumabvazuwa ke uye dakara kumabvazuwa ke Bahari ro Arabha, Bahari ro Munyu,* zvecienda ku Bheti jezimoti, uye ngece katemaidumba mu muceto me mbuto dzino miterero dze Pisiga.
4 Uyewo, akatora nharaunda ya Ogi Mambo we Bhaza, uwo wainga ari umwe we Marefaimu okupedzesera, waigara ku Astaroti uye ku Edhirei 5 uye waitonga mu Dunhu re Hermoni, ku Sareka, uye mu Bhazani yese, dakara ku mugano we Ajesuri uye we Amaakati, kutobatanidzawo no hafu yo Giriyadhi, dakara ku nharaunda yo Sioni Mambo we Hesibhoni.
6 Mozesi museenzi wa Djehovha pamwepo no Aisraeri akaanyisa, pedzepo Mozesi museenzi wa Djehovha wakapasa nyika yawo ku Arubheni, Agadhi, uye ku hafu yo dzinza ra Manase hinga nhaka.
7 Aya ndiwo madzimambo e nyika dzakanyiswa na Djoshuwa no Aisraeri, kumadokero ke Djorodhani, kubvira ku Bhaari-gadhi iri ku Bani re Rebhanoni dakara ku Dunhu re Haraki, raikwidza recienda ku Seiri, iyo kuno nyika yekuti Djoshuwa wakapasa dzinza re Israeri hinga nhaka, eciakowanisa; 8 nyika idzona dzaibatanidza mutanha we matunhu, Sefera, Arabha, mbuto dzino materero, ku renje, uye ku Negebhe, kureya nyika dze Ahiti, Aamori, Akanani, Aperezi, Ahivhi, uye Ajebhuzi.
9 Madzimambo akhona ndi aya: Mambo we Djeriko, umwe; mambo we Ai, wainga ari dhuze no Bheteri, umwe;
10 mambo we Djerusarema, umwe; mambo we Hebroni, umwe;
11 mambo we Jarimuti, umwe; mambo we Rakishi, umwe;
12 mambo we Egroni, umwe; mambo we Jezeri, umwe;
13 mambo we Dhebhiri, umwe; mambo we Jedheri, umwe;
14 mambo we Orma, umwe; mambo we Aradhe, umwe;
15 mambo we Ribna, umwe; mambo we Adhuramu, umwe;
16 mambo we Makedhaa, umwe; mambo we Bheteri, umwe;
17 mambo we Tapuwa, umwe; mambo we Eferi, umwe;
18 mambo we Afeki, umwe; mambo we Rasharoni, umwe;
19 mambo we Madhoni, umwe; mambo we Azori, umwe;
20 mambo we Simeroni-meroni, umwe; mambo we Akisafi, umwe;
21 mambo we Taanaki, umwe; mambo we Mejidho, umwe;
22 mambo we Kedhesi, umwe; mambo we Jokineamu, iri ku Karmero, umwe;
23 mambo we Dhori iri ku mbuto ino miterero e Dhori, umwe; mambo we Goimu, iri ku Jirigari, umwe;
24 mambo we Tirza, umwe; madzimambo ese aikwana kuita 31.