Djoshuwa
6 Thaundi re Djeriko rainga rakanyasa kufungwa nge ndaa ye Aisraeri; apana waibuda uye apana waipinda.
2 Hino Djehovha akati kuna Djoshuwa: “Ona, ndakupasa Djeriko na mambo waro uye anyahondo aro ano simba. 3 Mwese imwimwi anarume akagadzirira kurhwa, munodikana kuhamba mecitenderera thaundi kamwe pa zuwa. Munodikana kuita izvona ke mazuwa matanhatu. 4 Sanangura apristi anomwe kuti athware mabhuzina manomwe e nyanga dze mabira mberi ke Areka. Asi pa zuwa recinomwe, imwimwi munodikana kuhamba kanokwana kuita kanomwe mecitenderera thaundi uye apristi anodikana kuridza mabhuzina. 5 Kana mabhuzina e nyanga dze mabira akaridzwa, imwimwi mozwa mabhuzina awona ecirira, anyahondo ese anodikana kukhuwa kuita hingana anhu ari pa hondo. Hino muru we thaundi ucambwera, uye anhu anodikana kupinda, umwe na umwe ecienda mu thaundi.”
6 Djoshuwa mwana wa Nuni wakaunganidza apristi uye wakaabvunza kuti: “Torai Areka yo Citenderano, uye apristi anomwe anodikana kuthwara mabhuzina manomwe e nyanga dze mabira ari pamberi pe Areka ya Djehovha.” 7 Hino iyena wakabvunza anhu kuti: “Endai uye hambai mecitenderera thaundi uye masurudado akagadzirira kurhwa anodikana kuenda mberi ke Areka ya Djehovha.” 8 Kuita hingana zvainga zvakabhuiwa na Djoshuwa ku anhu, apristi anomwe akathwara mabhuzina manomwe e nyanga dze mabira pamberi pa Djehovha, akaenda mberi uye akaridza mabhuzina, uye Areka yo Citenderano ya Djehovha yaiateera. 9 Uye masurudado akagadzirira kurhwa aienda mberi ke apristi airidza mabhuzina, uye sure kaiuya Areka pa nguwa yekuti mabhuzina airumbwa eciridzwa.
10 Djoshuwa wainga abvunza anhu kuti: “Musakhuwe kana kuita kuti izwi renyu rizike. Apana soko rinodikana kubuda mu muromo menyu dakara zuwa randinozomubvunzai kuti: ‘Khuwai!’ Hino mozokhuwa.” 11 Djoshuwa wakaita kuti Areka ya Djehovha itenderere thaundi kamwe, pedzepo awona akahwirira ku musasa uye akawatireyo.
12 Pa zuwa rakazoteera, Djoshuwa wakamuka cemacibesi-besi, uye apristi akatora Areka ya Djehovha, 13 uye apristi anomwe aithwara mabhuzina manomwe e nyanga dze mabira, aienda mberi ke Areka ya Djehovha ecirumbwa eciridza mabhuzina. Anarume ainga akagadzirira kurhwa aienda mberi kawo uye sure kaiuya Areka ya Djehovha pa nguwa yekuti mabhuzina airumbwa eciridzwa. 14 Pa zuwa recipiri, awona akahamba kamwe ecitenderera thaundi uye akahwirira ku musasa. Akaita izvona ke mazuwa matanhatu.
15 Pa zuwa rocinomwe, awona akamuka cemacibesi-besi, zuwa parakabuda uye nge mushobo umwewo awona akahamba ecitenderera thaundi kanokwana kuita kanomwe. Zuwa irona basi ndiro raakahamba ecitenderera thaundi kanokwana kuita kanomwe. 16 Kecinomwe, apristi paairidza mabhuzina, Djoshuwa wakati ku anhu: “Khuwai, ngokuti Djehovha amupasai thaundi! 17 Thaundi uye zvese zvirimo, zvinodikana kutsakatiswa,* ngokuti ngezva Djehovha. Rakabhi basi hure, ndiye unodikana kurumbwa ari mupenyu, iyena uye anhu anonga ari mu nyumba make, ngokuti wakafindarisa avhevhi atakatuma. 18 Asi garai kure no zviro zvinodikana kutsakatiswa,* kuti musasirire zviro zvinodikana kutsakatiswa uye mozvitora. Izvi zvaizoita kuti musasa we Israeri ugare ciro cakasisira kutsakatiswa zvounzisa matambudziko.* 19 Asi prata yese, oro yese uye no zviro zvese zvakagadzirhwa no kobre uye no simbi, i zviro zvakacena kuna Djehovha. Izvona zvinodikana kutorhwa zvokandwa mu mbuto inocengeterhwa upfumi wa Djehovha.”
20 Hino mabhuzina paakaridzwa, anhu akakhuwa. Anhu paakazwa kuridzwa ke mabhuzina, akatanga kukhuwa hingana zvinoizwa pa hondo uye muru wakambwera. Mumasure mazvo, anhu akapinda, umwe na umwe ecienda mu thaundi, uye akatora thaundi. 21 Akatsakatisa* no supada zvese zvainga zviri mu thaundi, anarume no anakadzi, madjaha no acembera, kutobatanidzawo no n’ombe, mabira, uye no madhongi.
22 Djoshuwa wakabvunza anarume airi ainga aenda koovhevha nyika kuti: “Pindai mu nyumba me hure uye budisai kunza iyena no mhuri yake, hingana zvamakamugondesa.” 23 Ngokudaro, avhevhi akapinda uye akabudisa kunza Rakabhi na baba ake, mai ake, hama dzake, uye no mhuri yake yese; honde, akabvisa mhuri yake yese, uye akaatora akacengeteka dakara ku mbuto iri kure no musasa we Israeri.
24 Hino akapisa thaundi no muriro uye zvese zvainga zvirimo. Asi prata, oro, uye zviro zvese zve kobre no simbi, akazviendesa ku upfumi we nyumba ya Djehovha. 25 Rakabhi basi hure no e pa nyumba ya baba ake uye no ese aainga anawo, aazi kutsakatiswa na Djoshuwa; uye iyena ari kurarama mu Israeri dakara nyamasi, ngokuti akafindarisa avhevhi akatumwa na Djoshuwa kuti aende koovhevha Djeriko.
26 Pa nguwa iyona, Djoshuwa wakaita mhiko* yokuti: “Akatukwa pamberi pa Djehovha mwanarume acaedza kuwakazve thaundi iri re Djeriko. Paacawaka fundasau yaro, iyena ucafirhwa no mwana wake we dangwe, uye paacakanda misuwo yaro, ucafirhwa no mwana wake we kupedzesera.”
27 Ngokudaro, Djehovha ainga ari na Djoshuwa, uye mbiri yake yakabararika pa nyika yese.