Djoshuwa

10 Adhoni-Zedheki Mambo we Djerusarema paakandozwa kuti Djoshuwa wainga atora thaundi ro Ai uye wainga aritsakatisa,* eciitira thaundi ro Ai uye na mambo waro zvimwezvo zvaainga akaitira thaundi re Djeriko pamwepo na mambo waro, uye kuti agari e ku Jibhiyoni ainga aita runyararo no Aisraeri uye orumbwa ari pakati pawo, 2 iyena wakathya maningi, ngokuti Jibhiyoni rainga riri thaundi guru, rakaitawo hinga rimwe re mathaundi e madzimambo. Rainga riri thaundi rakakura kupinda thaundi re Ai, uye anarume ese aigaremo ainga ari arhwi e hondo. 3 Ndiyo ndaa, Adhoni-Zedheki mambo we Djerusarema wakatumira soko kuna Oamu mambo we Hebroni, Piramu mambo we Jarimuti, Djafiya mambo we Rakishi, uye Dhebhiri mambo we Egroni, eciti: 4 “Uyai mundibetserewo kurhwisa thaundi re Jibhiyoni, ngokuti irona raita runyararo na Djoshuwa uye no Aisraeri.” 5 Ngokudaro, madzimambo mashanu e Aamori, kureya mambo we Djerusarema, mambo we Hebroni, mambo we Jarimuti, mambo we Rakishi, uye mambo we Egroni, akabatana uye no anyahondo awo akaenda koowaka musasa kuti arhwise thaundi ro Jibhiyoni.

6 Anarume o Jibhiyoni akatumira soko kuna Djoshuwa ku musasa we Jirigari eciti: “Musasiye aranda enyu. Uyai nokukasika! Tiponesei uye tibetsereiwo! Madzimambo ese e Aamori e ku mutanha we matunhu abatana kuti atirhwise.” 7 Ngokudaro, Djoshuwa wakabva ku Jirigari no anarume ese e hondo uye anyahondo ano simba.

8 Djehovha akabvunza Djoshuwa kuti: “Usaathye, ngokuti ndaakanda mu nyara dzako. Apana umwe wawo ucakwanisa kukurhwisa.” 9 Djoshuwa wakaarhwisa asikakariri mumasure me kuhamba usiku wese kubva ku Jirigari. 10 Djehovha akaavhiringidza pamberi po Aisraeri, uye Aisraeri akauraya anhu akawanda ku Jibhiyoni; akaateera no gwanza raikwidza kuenda ku Bheti-oroni eciauraya dakara ku Azeka no ku Makedhaa. 11 Paaitiza Aisraeri uye paainga ari pa muterero we Bheti-oroni, Djehovha akaita kuti masanza akakura aambwerere ecibva kudenga dakara ku Azeka, uye awona akapera kufa. Zvezvirokwazvo, anhu akauraiwa nge masanza akawanda kupinda aya akauraiwa no supada yo Aisraeri.

12 Pa zuwa rokuti Djehovha akanyisa Aamori pamberi pe Aisraeri, Djoshuwa wakareketa na Djehovha pamberi pe Aisraeri, eciti:

13 Ngokudaro, zuwa rakarumbwa rakaima uye mwedzi auzi kuhamba dakara dzinza re Aisraeri ratsiya azondi awo. Izvi azvizi kutarhwa mu bhuku ra Djasari here? Zuwa rakarumbwa rakaima pakati pe denga uye rakanonoka kudoka ke nguwa ingada kukwana zuwa rimwe. 14 Apazi kumbooneka zuwa hingana irona kunyazi kare, kunyazi mumasure mazvo, rekuti Djehovha akapurutana izwi ro munhu, ngokuti Djehovha ainga ecirhwira Israeri.

15 Mumasure mazvo, Djoshuwa wakahwirira ku musasa we Jirigari pamwepo no Aisraeri ese.

16 Pa nguwa ii, madzimambo mashanu akatiza uye akaenda koofindara mu bako re ku Makedhaa. 17 Hino Djoshuwa wakabvunzwa kuti: “Madzimambo mashanu aoneka akafindara mu bako re ku Makedhaa.” 18 Ngokudaro, Djoshuwa wakati: “Mburumbudzirai mapuwe makuru dakara pa musuwo we bako uye kandai anarume kuti aarinde. 19 Asi amweni enyu aadikani kuima. Teerai azondi enyu meciauraya. Musaasiye ecipinda mu mathaundi awo, ngokuti Djehovha Mwari wenyu aakanda mu nyara dzenyu.”

20 Djoshuwa no Aisraeri akauraya anhu akawanda maningi zvekuti wakaatsakatisa ese, kusiya basi aya akatizira mu mathaundi akatenderedzwa no muru. 21 Hino anhu akahwirira kainga kuna Djoshuwa ku musasa we Makedhaa asikazi kukuwara uye ari apenyu. Uye apana wakazoreketa* zvakashata ngezve Aisraeri. 22 Djoshuwa wakati: “Funungurai musuwo we bako uye bvisai kunza madzimambo mashanu arimoo.” 23 Ngokudaro, awona akabvisa madzimambo mashanu mu bako: Mambo we Djerusarema, mambo we Hebroni, mambo we Jarimuti, mambo we Rakishi, uye mambo we Egroni. 24 Paakauya no madzimambo aya kuna Djoshuwa, iyena wakadainza anarume e Israeri uye wakabvunza atungamiriri e anarume e hondo ainga aenda naye kuti: “Uyai kuno. Tsikai sure ke mitsipa ye madzimambo aya.” Hino awona akauya uye akatsika sure ke mitsipa yawo. 25 Djoshuwa wakaabvunza kuti: “Musathye uye musanetseke. Shingai uye bambai, ngokuti izvi ndizvo zvicaizwa na Djehovha ku azondi ake ese amucarhwisana nawo.”

26 Hino Djoshuwa wakaauraya uye wakaaturika pa mitanda* mishanu, uye awona akarumbwa akaturikwa pa mitanda dakara koodoka. 27 Zuwa parainga roodoka, Djoshuwa wakaabvunza kuti aaturure pa mitanda uye aakhandire mu bako raainga ambofindara. Pedzepo mapuwe makuru akakandwa pa musuwo we bako, uye awona ariyo dakara nyamasi.

28 Pa zuwa irona, Djoshuwa wakatora Makedhaa uye wakaitsakatisa nge supada, wotsakatisa mambo waro uye no ese* aigaremo, zvekuti apana waakasiya ari mupenyu. Iyena wakaitira mambo we Makedhaa zvimwezvo zvaainga akaitira mambo we Djeriko.

29 Hino Djoshuwa pamwepo no Aisraeri ese akabva ku Makedhaa ecienda ku Ribna uye akairhwisa. 30 Djehovha akakandawo thaundiro na mambo waro mu nyara dzo Aisraeri, uye akatsakatisa thaundiro no ese* ainga arimo, apana waakasiya ari mupenyu. Ngokudaro, akaitira mambo waro zvimwezvo zvaainga akaitira mambo we Djeriko.

31 Pedzepo, Djoshuwa no Aisraeri ese akabva ku Ribna ecienda ku Rakishi owaka musasa ikona uye akaarhwisa. 32 Djehovha akakanda Rakishi mu nyara dze Aisraeri, uye awona akaritora pa zuwa rocipiri. Akatsakatisa thaundiro no supada pamwepo no ese* ainga ari mariri, hinga zvaainga aita no thaundi ro Ribna.

33 Orami mambo we Jezeri wakaenda koobetsera mambo we Rakishi, asi Djoshuwa wakamuuraya pamwepo no anhu ake, zvokuti apana munhu wakapona.

34 Hino Djoshuwa pamwepo no Aisraeri akabva ku Rakishi oenda ku Egroni, owaka musasa ikona, uye akairhwisa. 35 Awona akaritora pa zuwa irona uye akaritsakatisa no supada. Pa zuwa irona akatsakatisa ese* ainga arimo, hinga zvaainga aita no thaundi ro Rakishi.

36 Hino Djoshuwa pamwepo no Aisraeri ese akabva ku Egroni ecienda ku Hebroni uye akairhwisa. 37 Awona akaritsakatisa no supada; akatsakatisawo mambo waro, anhu aro, uye ese* ainga arimo, apana wakasara ari mupenyu. Wakatsakatisa anhu ese* ainga arimo, hinga zvaainga aitira Egroni.

38 Pakupedzesera, Djoshuwa pamwepo no Aisraeri ese akaenda ku thaundi ro Dhebhiri uye akarirhwisa. 39 Iyena wakaritora pamwepo na mambo waro, uye no anhu aro ese,* ozvitsakatisa no supada, uye otsakatisa ese ainga arimo, apana wakasara ari mupenyu. Iyena wakaitira thaundi ro Dhebhiri na mambo waro hinga zvaainga akaitira mambo we Hebroni no we Ribna.

40 Djoshuwa wakakunda nyika yese, mutanha we matunhu, Negebhe, Sefera, mbuto dzino miterero, uye no madzimambo awo ese, uye apana cakasara ciri cipenyu; iyena wakatsakatisa zviro zvese zvipenyu, hinga zvaainga abvunzwa na Djehovha, Mwari we Israeri. 41 Djoshuwa wakatora kubva ku Kadhesi-bharneya dakara ku nyika yo Gaza uye ku nyika yese yo Gozeni dakara ku nyika yo Jibhiyoni. 42 Djoshuwa akanyisa madzimambo aya ese no nyika dzawo pa nguwa imwe basi, ngokuti Djehovha Mwari we Aisraeri ndiye airhwira Aisraeri. 43 Hino Djoshuwa wakahwirira ku musasa we Jirigari pamwepo no Aisraeri ese.