Djoshuwa
2 Hino Djoshuwa mwana wa Nuni, wakatuma pacifise-fise anarume airi ecibva ku Sitimu hinga avhevhi. Iyena wakaabvunza kuti: “Endai uye vhevhai nyikeyo, maka-maka Djeriko.” Ngokudaro, awona akaenda uye akaguma pa nyumba pe hure rimweni raizwi Rakabhi, uye akagara ipona. 2 Mambo we Djeriko wakabvunzwa kuti: “Anarume e ku Israeri apinda muno usiku uno kuti avhevhe nyika.” 3 Ngokudaro, mambo we Djeriko wakatuma anhu kuti abvunze Rakabhi kuti: “Unzisa kunza kuno anarume ari mumba mako, ngokuti awona auya koovhevha nyika yedu yese.”
4 Asi mwanakadziwo wakatora anarumewo airi uye wakaafindarisa. Hino iyena wakati: “Izvirokwazvo, anarumewo auya kandiri, asi ndainga ndisikazii kuti ngee kupi. 5 Pakainga kaakudoka, musuwo mukuru we thaundi pawainga waakufungwa, anarumewo akabuda oenda. Inini andikuzii kaaenda, asi kana mukaateera nokukasika mucaabata.” 6 (Asi iyena wainga waatora woafindarisa pamusoro pe nyumba, pakati pe masanzu e rinyu ainga ari pamusoro pe nyumbepo.) 7 Hino anarumewo akaateera ecienda ku dii re mbuto yaibirirhwa nge anhu ku Murambo we Djorodhani, uye musuwo mukuru we thaundi wakafungwa pa nguwa yakabuda anarume aya aiateera.
8 Avhevhi asati awata, iyena wakaenda koonana nawo pamusoro pe nyumba. 9 Iyena wakaabvunza kuti: “Ndinozviziya kuti Djehovha acamupasai nyika ino uye tiri kuthya nge ndaa yenyu. Agari ese e nyika ino apera simba nge ndaa yenyu, 10 ngokuti takazwa ngezve kuomesa kakaita Djehovha mvura yo Bahari ro Kupsvuka pamberi penyu pamaibva ku Edjipitu uyewo zvamakaitira madzimambo mairi e Aamori, Sioni na Ogi, amakatsakatisa* ku n’ombera* ke Djorodhani. 11 Patakazvizwa, takapera simba;* takagara tisina ushingi nge ndaa yenyu, ngokuti Djehovha Mwari wenyu ndi Mwari we kumusoro kudenga, no pasi pa nyika. 12 Hino ndapota, pikai na Djehovha kuti, hingana mushobo wandamupangidzirai usisi,* imwimwi mucapangidzirawo usisi* anhu e pa nyumba ya baba angu; uye ndipasei cipangidzo cinopangidza kuti mucaita zvamucabhuya.* 13 Musauraye baba angu, mai angu, hama dzangu dze anarume no dze anakadzi no ese aya aanogara nawo, uye tiponesei* pa rufu.”
14 Ngokudaro, anarumewo akamubvunza kuti: “Ticatopasa upenyu wedu kuitira imwimwi!* Kana iwewe ukasama kureketa ciro ngezve zviro zvatahambira, isusu ticapangidza unaki* uye kutendeka kauri, Djehovha paacatipasa nyika ino.” 15 Pedzepo, iyena wakaita kuti awona acite ngo pa janera eciseenzesa bote, ngokuti nyumba yake yaigara pa rimwe re matii e muru we thaundi. Zvezvirokwazvo, nyumba yake yainga iri pamusoro pe muru. 16 Mumasure mazvo, iyena wakaabvunza kuti: “Endai ku mutanha we matunhu uye findarai ikona ke mazuwa matatu, kuitira kuti aya ari kumupsvakai asamubatei. Mumasure mekuti aya ari kumupsvakai ahwirira, mungaenderera mberi no rhwendo.”
17 Anarumewo akamubvunza kuti: “Tinonga tisina ndaa ngezve mhiko ii yawatiitisa kuti tipike 18 kana tikapinda mu nyika ino, iwewe wotama kusungira pa janera bote iri rokupsvuka rawaita kuti ticite naro. Baba ako, mai ako, hama dzako, no ese aya e pa nyumba ya baba ako anodikana kugara na iwewe mu nyumba ino. 19 Hino kana munhu akabuda mumba mako, ndaa inonga iri yake. Asi kana ciro cakashata cikaitikira pa munhu unonga ari mumba na iwewe, ndaa inonga iri yedu. 20 Asi kana iwewe ukareketa zvatahambira, tinonga tisina ndaa pa mhiko yawaita kuti tipike.” 21 Iyena wakadaira kuti: “Ngazviitike maererano no zvamabhuya.”
Ngokudaro, iyena wakaasiya ecienda, uye awona akaenderera mberi no rhwendo. Mumasure mazvo, iyena wakasungira bote rokupsvuka pa janera. 22 Awona akaenda ku mutanha we matunhu uye akagara ikona ke mazuwa matatu, dakara anarume aiapsvaka ahwirira. Anarume awona akaapsvaka mu makwanza ese, asi aazi kuaona. 23 Anarumewo akabva ku mutanha we matunhu, akabira murambo uye akaenda dakara kuna Djoshuwa mwana wa Nuni. Awona akamupanganidzira zvese zvainga zvaitika. 24 Hino awona akabvunza Djoshuwa kuti: “Djehovha atipasa nyika yese ii. Zvezvirokwazvo, agari ese e nyika ii ari kuthya nge ndaa yedu.”