Djoshuwa
9 Ciziiso pacakaguma ku madzimambo ese aigara kumadokero ke Djorodhani, ese aigara ku mutanha we matunhu, ku Sefera, ku muceto ke Bahari Guru,* uye pamberi po Rebhanoni, kureya: Ahiti, Aamori, Akanani, Aperezi, Ahivhi, no Ajebhuzi; 2 awona akabatana oita citenderano kuti arhwise Djoshuwa no Israeri.
3 Agari e ku Jibhiyoni akazwawo zvainga zvaizwa na Djoshuwa ku Djeriko uye ku Ai. 4 Ndiyo ndaa, awona akapangidza ungwaru: Akakanda zvokurhya zvawo mu zvisaku zvatsakara uye akazvipakidza pa madhongi awo kutobatanidzawo zvigubu zvainga zvakaphatuka uye zvosonerhwa zvigamba; 5 awona akapfekawo masandariya atsakara uye akasonwa-sonwa, uye akapfekawo macira ainga atsakara. Pau dzese dzaakatora dzainga dzakaoma uye dzaitsekeduka. 6 Pedzepo awona akaenda kuna Djoshuwa ku musasa we Jirigari uye akati kaari uye ku anarume e Israeri: “Tabva ku nyika iri kure. Hino, itai citenderano na isusu.” 7 Asi anarume e Israeri akabvunza Ahivhi kuti: “Pamweni imwimwi munogara dhuze na isusu. Hino tingaita kudini citenderano na imwimwi?” 8 Awona akadaira Djoshuwa kuti: “Tiri aseenzi* enyu.”
Hino Djoshuwa wakaabvunzisa kuti: “Imwimwi ndimwi ani, uye munobva kupi?” 9 Awona akadaira kuti: “Aseenzi enyu abva ku nyika iri kure nge ndaa ye zina ra Djehovha Mwari wenyu, ngokuti takazwa ngezve mbiri yake, zvese zvaakaita ku Edjipitu 10 uye zvese zvaakaitira madzimambo mairi e Aamori ku dii rimweni* re Djorodhani, kuna Sioni Mambo we Hesibhoni, kuna Ogi Mambo we Bhazani, wairaramira ku Ashitaroti. 11 Ndiyo ndaa, akuru edu uye agari ese e mu nyika yedu akatibvunza kuti: ‘Torai zvokurhya kuti muite rhwendo uye endai koonana nawo. Uye abvunzei kuti: “Ticagara aseenzi enyu; ndiyo ndaa, itai citenderano na isusu.”’ 12 Pau ii yataunzisa hinga cokurhya katiri yainga yecipisa patakabva ku mizi dzedu kuti tiuye kamuri. Asi zvino muri kutozviona mwega kuti yaoma uye iri kutsekeduka. 13 Uye zvigubu izvi zve vhinyu zvainga zviri zvipsva patakazvidzadza, asi zvino zvaphatuka. Uye macira edu no masandariya edu apera kutsakara nge ndaa ye rhwendo rakareba.”
14 Ngokudaro, anarume e Israeri akatora* zviro zvawo zvinganani, asi aazi kubvunzisa Djehovha. 15 Hino Djoshuwa akaita runyararo nawo uye citenderano kuti arumbwe ecirarama, uye akuru-akuru e ungano akaita mhiko ngezve nyaya iyona.
16 Paa padarika mazuwa matatu mumasure me kuita citenderano nawo, akazoziya kuti awona airaramira padhuze, ainga ari anyacigarisano awo. 17 Aisraeri akaenda uye akaguma ku mathaundi awo pa zuwa rocitatu; mathaundi awo ainga ari Jibhiyoni, Khefira, Bheroti, uye Kiriyati-jearimu. 18 Asi Aisraeri aazi kuarhwisa, ngokuti akuru-akuru e ungano ainga aita mhiko mu zina ra Djehovha Mwari we Israeri. Ndiyo ndaa, ungano yese yakatanga kugurungutira akuru-akuru. 19 Ngokudaro, akuru-akuru akati ku ungano yese: “Ngokuti isusu taita mhiko mu zina ra Djehovha Mwari we Israeri, apana catingaaita. 20 Ticaita kudai: Ngatiasiye ecirarama, kuti tisatsamwirhwe nge ndaa ye mhiko yatakaaitira.” 21 Uye akuru-akuru akatunhudzira eciti: “Awona ngaararame, asi acaita basa re kupsvaka huni uye re kucerera mvura ungano yese.” Akuru-akuru ndizvo zvaakaagondesa.
22 Djoshuwa wakaadainza oabvunzisa kuti: “Ngei imwimwi matinyepera ngo kubhuya kuti: ‘Tiri anhu anogara kure,’ nepoo imwimwi munoraramira pakati pedu? 23 Kubvira zvino kuenda mberi, imwimwi matukwa, uye nguwa dzese mucagara aranda meciita basa re kupsvaka huni uye kucerera mvura nyumba ya Mwari wangu.” 24 Awona akabvunza Djoshuwa kuti: “Taita izvona ngokuti isusu aseenzi enyu, takazwa kuti Djehovha Mwari wenyu akabvunza Mozesi museenzi wake kuti amupasei nyika ino yese uye auraye agari ese e mu nyikemo pamberi penyu. Ndiyo ndaa, takathya kuruza upenyu* wedu nge ndaa yenyu, ici ndico caita kuti isusu tiite izvona. 25 Parizvino isusu tiri mu nyara dzenyu. Itai na isusu zvese zvamunoona kuti zvakanaka uye ngezve unatsi.” 26 Uye ndizvo zvakaizwa na Djoshuwa; iyena wakaanunura mu nyara dzo Aisraeri, uye awona aazi kuauraya. 27 Asi kubvira pa zuwa irona, Djoshuwa wakaita kuti awona aite basa re kuthwara huni uye kucera mvura kuitira ungano yese uye kuitirawo artari ya Djehovha pa mbuto yekuti Iyena aizosanangura, uye awona ari kurumbwa eciita izvona dakara nyamasi.