Djoshuwa
1 Mumasure me kufa ka Mozesi museenzi wa Djehovha, Djehovha akabvunza Djoshuwa* mwana wa Nuni, mubetseri wa Mozesi, kuti: 2 “Mozesi museenzi wangu wafa. Parizvino, gadzirira kuti ubire Murambo we Djorodhani, iwewe no anhu ese, uye enda ku nyika yandicapasa anhu e Israeri. 3 Inini ndicamupasai mbuto yese yamucatsika, hingana zvandakagondesa Mozesi. 4 Nyika yenyu icatangira ku renje dakara ku Rebhanoni uye ku murambo mukuru, Murambo we Eufrate; nyika yese yo Ahiti uye dakara ku Bahari Guru* riri kumadokero. 5 Apana acakwanisa kukunyisa mu upenyu wako wese. Hingana mushobo wandakagara na Mozesi, ndicagarawo na iwewe. Andizokupsveti uye andizokusii. 6 Gara wakashinga uye bamba, ngokuti iwewe ndiwe ucaita kuti anhu aya agare nhaka ye nyika yandicaapasa, maererano no zvandakapikira ku madzitsekuru awo.
7 “Iwewe gara wakashinga basi uye wakabamba maningi, wonyasa kutondowedza Mutemo wese wawakapaswa na Mozesi museenzi wangu. Usausiye wecienda ku moko kwawo kana ku moko boshwe, kuitira kuti uite zviro no ungwaru kwese kaucaenda. 8 Bhuku iri ro Mutemo rinodikana kurumbwa riri pa muromo pako; unodikana kurierenga no izwi riri pasi* usiku no masikati, kuitira kuti unyase kutondowedza zvese zvakatarhwa mariri. Kana ukadaro, ucabudirira mu makwanza ako uye ucaita zviro no ungwaru. 9 Andizi kukubvunza kuti shinga uye bamba? Usanetseke uye usathye. Ngokuti Djehovha Mwari wako, acagara newe kwese kaucaenda.”
10 Hino Djoshuwa wakabvunza atungamiriri e anhu kuti: 11 “Hambai mu musasa wese uye bvunzai anhu kuti: ‘Itai gadziriro, ngokuti mumasure me mazuwa matatu mucabira Murambo we Djorodhani kuti mugare nhaka yo nyika yokuti Djehovha Mwari wenyu ari kumupasai kuti igare yenyu.’”
12 Uye Djoshuwa wakabvunza Arubheni, Agadhi, uye hafu yo dzinza ra Manase kuti: 13 “Edzurirai zvamakabvunzwa na Mozesi, museenzi wa Djehovha kuti: ‘Djehovha Mwari wenyu ari kumupasai zororo; iyena amupasai nyika ii. 14 Akadzi enyu, ana enyu, uye zvipfuyo zvenyu zvicagara mu nyika yamakapaswa na Mozesi, ku dii rino* ro Murambo we Djorodhani. Asi mwese imwimwi arhwi e hondo ano simba, munodikana kubira Murambo we Djorodhani makagadzirira kurhwa mecitungamira mberi ke hama dzenyu. Imwimwi munodikana kuabetsera 15 dakara Djehovha apasa zororo hama dzenyu hinga zvaakamuitirai, uye awona agarewo nhaka yo nyika yaari kupaswa na Djehovha Mwari wenyu. Mumasure mazvo, mungahwirira ku nyika yamakapaswa kuti mugare mairi, nyika yekuti Mozesi museenzi wa Djehovha akamupasai, kumabvazuwa ke Murambo we Djorodhani.’”
16 Awona akadaira Djoshuwa eciti: “Ticaita zvese zvamatibvunza, uye ticaenda kwese kamucatituma. 17 Hinga mushobo watakazwira zvese zvakabhuiwa na Mozesi, isusu ticamuzwiraiwo. Kupinda zvese, Djehovha Mwari wenyu, ngaagare na imwimwi hingana mushobo waakagara na Mozesi. 18 Munhu wese anopandukira mitemo yenyu uye otama kuzwira zvese zvamunomubvunza, ngaauraiwe. Imwimwi shingai uye bambai.”