Ku Aroma
1 Inini Pauro, muranda wa Kristu Djesu, ndakadainzwa kuti ndigare muphostori uye ndakagadzwa kuti ndiziise masoko akanaka a Mwari, 2 aainga akapikira kare mu Matarhwa macena eciseenzesa aphorofita ake, 3 anocokuita no Mwana wake akabarhwa mu dzinza* ra Dhavhidhi, 4 asi akaziiswa no simba hinga Mwana wa Mwari, maererano no mwiya mucena paakamutswa kubva ku akafa, honde, Djesu Kristu Tenzi wedu. 5 Eciseenzesa iyena, takazwirhwa nyasha uye takaizwa kuti tigare aphostori, kuitira kuti anhu e madzinza ese azwire zvecibva pa kutenda mu zina rake, 6 imwimwiwo muri pakati pe madzinza aya akadainzwa kuti agare ateeri a Djesu Kristu. 7 Ndiri kutarira ese ari ku Roma anodiwa na Mwari, akadainzwa kuti agare acena:
Nyasha no runyararo zvinobva kuna Mwari Baba edu na Tenzi Djesu Kristu ngazvigare na imwimwi.
8 Pakutanga, ndinotenda Mwari wangu peciseenzeswa Djesu Kristu nge ndaa yenyu imwimwi mwese, ngokuti kutenda kenyu kuri kurekethwa mu nyika yese. 9 Ngokuti Mwari, uya wandinoitira basa cena no mwiya wangu wese ndeciziisa masoko akanaka anocokuita no Mwana wake, ndiena anondipupurira kuti ndinorumbwa ndecireketa nge zvenyu mu minamato yangu, 10 ndecideketera kuti kudai zvecikwanisika zvino uno, ndiuyeyo kuzomuonai kana Mwari akada. 11 Ngokuti ndiri kuda maningi kumuonai, kuti ndimupasei cipo ce mwiya kuti mubambiswe; 12 kana kuti, tibambisane, imwimwi mecindibambisa no kutenda kenyu, inini ndecimubambisaiwo no kangu.
13 Hama, ndinoda kuti muziye kuti inini ndinoda kuuya kamuri, kuitira kuti basa rangu re kuparidzira ribarewo micero pakati penyu hinga zvandakaita ku madzinza amweni, asi ndakapingaidzwa dakara zvino. 14 Inini ndino magaa kuno Agrego no aya asiripi Agrego, kuno anhu akafunda no aya asikazi kufunda; 15 hino ndino cidaka-daka cekumuziisaiwo masoko akanaka imwimwi agari e ku Roma. 16 Inini andipsveruki nge ndaa ye masoko akanaka; zvezvirokwazvo awona, i simba ra Mwari raanoponesa naro munhu wese ano kutenda, kutanga ku Mudjudha uyewo ku Mugrego. 17 Ngokuti maari, unatsi* wa Mwari uri kubudiswa pamhene kuno aya ano kutenda uye izvi zvinobambisa kutenda kawo, hinga kutarhwa kazvakaizwa kuti: “Asi munhu munatsi acararama nge ndaa ye kutenda kake.”
18 Ngokuti Mwari, ari kupangidza shungu dzake ari kudenga pa anhu ese asikamupurutani uye asina unatsi ari kuseenzesa makwanza akashata kuti cokwadi cisaziikanwe, 19 ngokuti zviro zvese zvinoziikanwa ngezva Mwari zvinonyasa kuoneka pakati pawo, ngokuti Mwari akaita kuti zviadjekere. 20 Ngokuti kunyazi hazvo Mwari asikaoneki, kubvira pakutanga kusikwa ke nyika, anhu anokwanisa kuziya simba rake risikaperi uye kugara kake Mwari, ngokuti anokwanisa kuzvizwisisa kubva pa zviya zvaakasika, zvokuti aazobhui kuti tainga tisikamuzii. 21 Ngokuti kunyazi hazvo aiziya Mwari, aazi kumukudza hinga Mwari uye aazi kumutenda, asi ndangariro dzawo dzakatanga kurangarira zviro zvisina basa uye mwoyo dzawo dzisina uzii dzakaita cidima. 22 Kunyazi aidziti akangwara, akagara mapenzi, 23 akacinja rukudzo ra Mwari asikafi kuti aezane no mufanikiso we munhu anofa, shiri, zvinyama zvino mirenje mirongomuna no zvinopsveremenda.
24 Hino Mwari, maererano no zvido zve mwoyo yawo, akaasiya eciita zviro zvisikazi kucena, kuti apsveruse mwiri yawo kamare. 25 Akacinja cokwadi ca Mwari ngo manyepo, akanamata uye akaitira zviro zvakasikwa basa cena pane kuitira Musiki, anokudzwa nokusikaperi. Ameni. 26 Ndiyo ndaa Mwari akaasiya eciita zvido zvawo zve kuda kuita zvepamaponde nge mushobo unopsverusa, ngokuti anakadzi ari pakati pawo akasiya kuita zvepamaponde maererano no masikirhwe azvo, otanga kuita zvepamaponde zvisikapindirani no masikirhwe azvo; 27 ndizvonawo zvakaizwa no anarume, akasiya zvaakasikwa ecidikana kuita no anakadzi, otanga kusirirana maningi, anarume no anarume, eciita zviro zvinopsverusa uye ecitambira muphanico* unoenderana no zvishaishi zvawo.
28 Ngokuti akaona zvisina basa kutendera kuti Mwari ariyo, Mwari akaasiya ano marangariro akashata, kuti aite zviro zvaainga asikadikani kuita. 29 Uye awona ainga akadzara no mushobo wese we zviro zvisina unatsi, zvakashata, makaro uye uzondi, akadzara no bibvu, kuuraya, kureketedzana, ucengedzi uye utsinye, ari anhu ano mapsveda,* 30 anoreya amweni, anozonda Mwari, asikareremedzi amweni, anodzikudza, anogaya, anorongera amweni zvakashata, asikazwiri abereki, 31 asikazwisisi, asikaiti zvaanotenderana, asikadi amweni uye asina usisi. 32 Kunyazi hazvo awona ecinyasa kuziya mutemo we unatsi wa Mwari, wekuti anhu anoita izvi akasisira kufa, anondorumbwa ecizviita uye anototsigirawo aya anozviita.