Akatarhwa na Marko
7 Hino Afarisi anganani no atari aibva ku Djerusarema akamuunganira. 2 Awona akaona afundi anganani a Djesu ecirhya no nyara dzakasvipa, kana kuti, asikazi kukarawa nyara.* 3 (Ngokuti Afarisi no Adjudha ese aarhyi asikazi kukarawa nyara dakara pa magokora, eciteera tsika dze anhu e kare, 4 uye paanobva ku bazari, aarhyi asikazi kusamba. Ano tsika dzimweni dzakawanda dzaakatambira uye dzaanobatisisa, dzakadai hingana kubhabhatidza makopo, majaro, no midziyo dze kobre.) 5 Hino Afarisi no Atari aya akamubvunzisa kuti: “Ngei afundi ako aateereri tsika dze anhu e kare, asi anorhya asikazi kukarawa nyara?” 6 Iyena akaabvunza kuti: “Isaya wakanyasa kuphorofita nge zvenyu imwimwi acengedzi, hinga zvakatarhwa kuti: ‘Anhu aya anondikudza no miromo yawo, asi mwoyo yawo iri kure na inini. 7 Anorumbwa ecindinamata pasina, ngokuti anofundisa mitemo yo anhu basi.’ 8 Imwimwi munosiya mutemo wa Mwari, mobatisisa tsika dze anhu.”
9 Iyena akaabvunzazve kuti: “Imwimwi munonyasa kukwanisa kukanda mutemo wa Mwari pa muceto kuti muite maererano no tsika dzenyu. 10 Hinga muezaniso, Mozesi wakati: ‘Reremedza baba na mai ako, uye, uya anotuka baba na mai ake ngaauraiwe.’ 11 Asi imwimwi munoti: ‘Uya anobvunza baba ake na mai ake kuti: “Ciro cese candinaco caizomubetserai i korbhani (kureya kuti, cipo cakapaswa Mwari),”’ 12 imwimwi amucamusii kuti aitire baba na mai ake kunyazi ciro cimwe basi. 13 Ngokudaro imwimwi munoita kuti soko ra Mwari ritame kuseenza nge ndaa ye tsika dzenyu. Uye munotoita zvakawanda zvakaita hinga izvi.” 14 Hino akadainzazve anhu uye akaabvunza kuti: “Ndipurutanei mwese imwimwi, uye zwisisai kuti zvandiri kureketa zvinoreyei. 15 Apana ciro cinobva kunza ke munhu cinopinda maari cinomusvipisa; asi zviya zvinobuda nge pamuromo pe munhu ndizvo zvinomusvipisa.” 16* ——
17 Ngokudaro mumasure me kubuda pakadzara anhu, iyena akapinda mumba uye afundi ake akamubvunzisa ngezve muezaniso iwona. 18 Hino iyena akaabvunzisa kuti: “Imwimwi amusati mazvizwisisawo here hingana awona? Amuzvizii here kuti apana ciro ciri kunza ke munhu cinopinda maari cinokwanisa kumusvipisa? 19 Ngokuti azvipindi mu mwoyo make, asi zvinopinda mu ndani, zvozoenda mu cimbudzi.” Ngokudaro iyena akapangidza kuti zvekurhya zvese zvakacena. 20 Uyezve, iyena akati: “Zvinobuda mukati me munhu ndizvo zvinomusvipisa. 21 Ngokuti mu mwoyo me munhu, munobuda marangariro akashata: Uhure,* umbavha, kuuraya, 22 upombwe, makaro, mabasa akashata, ucengedzi, muhambiro unopsverudza,* bibvu, kutuka, kudzikudza uye upenzi. 23 Zviro zvese zvakashata izvi zvinobva mukati uye ndizvo zvinosvipisa munhu.”
24 Iyena akapurumuka uye akaenda ku mutanha we Tiro no Sidhoni. Ikona iyena akapinda mumba uye ainga asikadi kuti zviziikanwe, asi anhu akazviziya. 25 Ciriporipoco, mwanakadzi wainga ane kamwana ke mwanakadzi kainga kano mwiya wakashata wakazwa nge zvake uye wakaenda kaainga ari, iyena wakagodama pa tsoka dzake. 26 Mwanakadziwo wainga ari Mugrego, wakabarhwa ku Sirofenisiya; uye wakarumbwa ecimukumbira kuti adzingire dhimoni rainga riri pa mwana wake. 27 Asi Djesu akamubvunza kuti: “Siya kuti zviana zvimbogute, ngokuti azvizi kunaka kutora pau yo ana adoko kakuikhandirira zvituhwa.” 28 Mwanakadziwo wakati: “Honde tenzi, asi zvituhwa zviri pasi pe meza zvinorhya matsekedeswa anombwedzwa no zviana.” 29 Ngokudaro iyena akati kaari: “Ngokuti wareketa izvi, enda, dhimoni rabuda pa mwana wako.” 30 Ngokudaro iyena wakaenda kumba uye wakagumira mwana wake wakawata pa kama, uye dhimoni rainga rabuda.
31 Djesu paakabva ku mutanha we Tiro, akapinda no Sidhoni uye akaenda ku bahari re Garireya, ecidarika no mutanha we Dhekapori.* 32 Kweneyo akamuunzisira munhu wainga asikakwanisi kuzwa uye wainga ane cinetso ce kureketa, uye akamudeketerera kuti amutsanzikire nyara. 33 Hino Djesu akaenda naye pa muceto, pasina anhu. Akakanda zvikunwe zvake mu nzee dzo mwanarumewo uye mumasure me kupfira, akamupsvasa ririme rake. 34 Eciringira kudenga, akafemeruka uye omubvunza kuti: “Efataa,” zvinoreya kuti: “Funguka.” 35 Ngokudaro nzee dzake dzakafunguka, cinetso cake ce kureketa cakapera, uye wakatanga kureketa zvakanaka. 36 Hino iyena akaabvunza kuti asabvunze munhu, asi pese paaiabvunza kudaro, awona aitobambirira kutozvibararisa. 37 Zvezvirokwazvo, awona akashamiswa maningi, uye aiti: “Iyena anoita zviro zvese ngo mushobo wakanaka. Ari kutoita kuti aya asikakwanisi kuzwa azwe uye zvimumu zvirekete.”