Akatarhwa na Mateu
6 “Ngwarirai kuti musapangidze unatsi wenyu pamberi pe anhu kuti amuonei; kana mukadaro, amuzooni mubairo kuna Baba enyu ari kudenga. 2 Paunopasa murombo cipo, usaridze tropito hingana zvinoizwa no acengedzi mu masinagoga no mu makwanza, kuti akudzwe no anhu. Zvirokwazvo ndinoti kamuri, awona atoona mubairo wawo wakakwana. 3 Asi, paunopasa murombo cipo, usasiye kuti moko wako we boshwe uziye zviri kuizwa no moko wako kwawo, 4 kuti zvipo zvako zvisaziikanwe no anhu. Ngokudaro, Baba ako, aya anoona zvinoizwa mucifise-fise, anozokukomborera.
5 “Uyewo, pamunonamata, musaite hingana acengedzi, ngokuti anoda kunamata akaima mu masinagoga ne pa mharanano dze makwanza makuru kuti aonekwe no anhu. Zvirokwazvo ndinoti kamuri, awona atoona mubairo wawo wakakwana. 6 Asi paunoita munamato, pinda mumba mako wofunga musuwo, wonamata kuna Baba ako ari pacifise-fise. Ngokudaro, Baba ako aya anoona zvinoizwa mucifise-fise, anozokukomborera. 7 Paunonga wecinamata, usaphinde-phinde zviro zvimwezvo, hinga zvinoizwa no anhu e madzinza amweni, ngokuti anorangarira kuti acapurutanwa nge kureketa masoko akawanda. 8 Hino, musaite hingana awona, ngokuti Baba enyu anoziya zvamunoda musati matoakumbira.
9 “Hino, munodikana kunamata kudai:
“‘Baba edu muri kudenga, zina renyu ngariceneswe. 10 Umambo wenyu ngauuye. Kuda kenyu ngakuizwe pasi pano hinga zvakunoizwa kudenga. 11 Tipasei zvokurhya zvedu zve zuwa ra nyamasi; 12 uye tirekererei zvishaishi zvedu, hinga mushobo watinorekererawo anotishaishira. 13 Musatirekere tecipinda mu muedzo, asi tinunurei* pano Wakashata.’
14 “Ngokuti kana mukarekerera anhu anomushaishirai, Baba enyu e kudenga acamurekereraiwo; 15 asi kana musikarekereri anhu anomushaishirai, Baba enyu aazomurekerereiwo zvishaishi zvenyu.
16 “Pamunotsanya, musaite kuti hope yenyu igare yakatsukwara hingana acengedzi, ngokuti awona anoita kuti hope yawo* igare yakatsukwara kuti aonekwe no anhu kuti ari kutsanya. Zvirokwazvo ndinoti kamuri, awona atoona mubairo wawo wakakwana. 17 Asi iwewe paunonga wecitsanya, dzora mafuta mu musoro mako uye karawa hope yako, 18 kuti anhu asaone kuti iwewe uri kutsanya, asi Baba ako basi aya ari mucifise-fise. Ngokudaro, Baba ako, aya anoona zvinoizwa mucifise-fise anozokukomborera.
19 “Rekerai kuunganidza upfumi wenyu pasi pano, ngokuti unorhyiwa no citema macira no furuju, uye pano mbavha dzinophwanya nyumba dzoba. 20 Asi, unganidzai upfumi wenyu kudenga, kusina citema macira no furuju, uye kusina mbavha dzinophwanya nyumba dzeciba. 21 Ngokuti pano upfumi wako, ndiponawo pano mwoyo wako.
22 “Ruvheneko re mwiri i dziso. Hino, kana dziso rako rakaringira ciro cimwe basi,* mwiri wako wese unonga wakadjeka. 23 Asi kana dziso rako rino bibvu,* mwiri wako wese unozogara mu cidima. Kana ruvheneko riri mu mwiri wako ndi cidima, cidima cako cakakurisisa!
24 “Apana munhu angakwanisa kuseenzera madzitenzi mairi; ngokuti anozozonda umwe, oda umweni, kana kuti anozoreremedza umwe, oshora umweni. Amukwanisi kuseenzera Mwari pamwepo no upfumi.
25 “Nge ndaa yazvo ndinoti kamuri: Musadzirhye mwoyo panocokuita no upenyu* wenyu kuti mucarhyei kana kuti mucamwei uye panocokuita no mwiri wenyu kuti mucapfekei. Upenyu* aukoshi kupinda zvekurhya, uye mwiri aukoshi kupinda zvekupfeka here? 26 Nyasai kuona shiri dze kudenga; idzona adzisimi mbeu, kana kukorora, kana kuunganidza mumiturika, asi Baba enyu e kudenga anodzipasa zvekurhya. Imwimwi amukoshi here kupinda idzona? 27 Ndiani wenyu anokwanisa kutunhudzira upenyu wake padoko basi* nge ndaa ye kudzirhya mwoyo? 28 Uyewo, ngei mecidzirhya mwoyo nge ndaa ye zvekupfeka? Fundai no makurire anoita maruwa e mushango, awona aabati basa uye aaruki; 29 asi ndinomubvunzai kuti, kunyazi Soromoni no mbiri yake yese, aazi kusimira hingana rimwe rawo. 30 Hino, kana Mwari ecisimidza kudai shango rekuti nyamasi riripo uye mangwana rokhandirhwa pa muriro, angakonerhwa here kunyasa kusimidza imwimwi anhu ano kutenda kudoko? 31 Hino musadzirhye mwoyo meciti: ‘Ticarhyei?’ kana kuti: ‘Ticamwei?’ kana kuti: ‘Ticapfekei?’ 32 Ngokuti madzinza amweni anogara ecipsvakisisa zviro izvi. Baba enyu e kudenga anoziya kuti munoda zvese izvi.
33 “Hino, rumbwai mecitanga kupsvaka Umambo wa Mwari no unatsi* wake, uye zviro zvimweni zvese izvi, zvicatunhudzirhwa kamuri. 34 Hino, musambodzirhye mwoyo nge ndaa ye zuwa ra mangwana, ngokuti zuwa ra mangwana ricagara no zvinetso zvaro. Zuwa rimwe na rimwe rinokwanirhwa no matambudziko aro.