Akatarhwa na Mateu
26 Hino, Djesu paakapedza kureketa zvese izvi, akati ku afundi ake: 2 “Imwimwi munozviziya kuti kasara mazuwa mairi kuti Paskwa igume, uye Mwana we munhu acatorhwa kuti auraiwe pa mutanda.”
3 Hino, atungamiriri e apristi no akuru e anhu, akaungana pa ruwanze re mupristi mukuru, waizwi Kaifasi, 4 uye akaronga mazano kuti no ungwaru, abate* Djesu uye amuuraye. 5 Asi awona aiti: “Atidikani kuzviita pakati pe mabiko, kuti pasaoneke woyo-woyo pakati pe anhu.”
6 Djesu paainga ari ku Bhetanya pa nyumba pa Simoni nyamapere, 7 mwanakadzi umweni wakamukhwederera ane cinhekwe ce arabhasto ce mafuta anonuhwirira, anodhurisisa, uye wakatanga kuadurura mu musoro make paainga ecirhya. 8 Afundi paakaona izvi, akanyangadzwa uye akati: “Ngei ari kutamba no mafuta aya kudai? 9 Zvainga zviri nani kutengesa mafutewo nge mutengo wakakura, mareyo kakuipasa arombo.” 10 Djesu eciziya izvi, akaabvunza kuti: “Muri kuda kumutambudzirei mwanakadzi uu? Iyena wandiitira zvakanaka. 11 Ngokuti arombo munawo nguwa dzese, asi amuzogari na inini nguwa dzese. 12 Mwanakadzi uu paadururira mwiri wangu mafuta anonuhwirira, wazviita kuti andigadzirire kuti ndizokotswe. 13 Ndinomubvunzai zvirokwazvo kuti, kwese kucaparidzwa masoko akanaka mu nyika yese, zvaizwa no mwanakadzi uu zvicarekethwawo kuti aedzurirhwe.”
14 Umwe we afundi 12 waizwi Djudhasi Iskariyoti, wakaenda ku atungamiriri e apristi, 15 woabvunza kuti: “Kana ndikamutengesa kamuri mucandipasei?” Awona akamugondesa kuti aizomupasa mare yo prata inokwana kuita 30. 16 Kubvira pa nguwa iyona kuenda mberi, iyena waipsvaka mukana wakanaka wo kumutengesa.
17 Pa zuwa rokutanga re Mutambo we Pau Dzisina Mbiriso, afundi akauya kuna Djesu omubvunzisa kuti: “Munoda kuti tigadzirire kupi kokurhyira Paskwa?” 18 Iyena akati: “Endai ku thaundi, kuno mwanarume umweni moti kaari: ‘Mufundisi ati: “Yaakuguma nguwa yangu; ndicarhya Paskwa pa nyumba pako no afundi angu.”’” 19 Hino, afundi akaita zvaakabvunzwa na Djesu uye akagadzirira Paskwa.
20 Zuwa parakadoka, iyena ainga ari pa meza no afundi ake 12. 21 Paainga ecirhya, iyena akati: “Ndinomubvunzai zvirokwazvo kuti, umwe wenyu ucanditengesa.” 22 Awona akatsukwara maningi, uye umwe na umwe wawo akatanga kubvunzisa kuti: “Tenzi, ndini here?” 23 Iyena akaadaira kuti: “Uya anoseya na inini mu paratu, ndiye ucanditengesa. 24 Izvirokwazvo kuti Mwana we munhu ari kuenda, hinga zvakatarhwa nge zvake, asi une nyathwa munhu uri kutengesa Mwana we munhu! Zvainga zviri nani kudai munhu iyena usikazi kubarhwa.” 25 Djudhasi, uya wainga waakuda kumutengesa, wakamubvunzisa kuti: “Ndini here, Rabhi?” Djesu akati kaari: “Ndiwe uri kuzvireketa.”
26 Paainga ecirhya, Djesu akatora pau, mumasure mekuita munamato, akaigura uye akaipasa afundi ake eciti: “Tambirai murhye. Pau ii, inoimirira mwiri wangu.” 27 Uye akatorawo kopo, akaita munamato uye akaipasa afundi ake, eciti: “Mwese imwai, 28 ngokuti vhinyu ii inoimirira ngazi yangu yo citenderano, icadururirhwa ajinji kuti arekererhwe zvitema. 29 Asi ndinomubvunzai kuti: Andicazomwizve mucero we muuvha uu, dakara pa zuwa randicamwazve na imwimwi vhinyu ipsva mu Umambo wa Baba angu.” 30 Paakazopedza, mumasure me kuemba ngoma dze kukudza Mwari,* akaenda ku Dunhu re Miorivhi.
31 Djesu akaabvunza kuti: “Usiku uno, mwese mucanditiza, ngokuti zvakatarhwa kuti: ‘Ndicazokuwadza muushi, uye mabira acabarariswa.’ 32 Asi kana ndikamutswa kubva ku akafa, ndicatungamira ku Garireya.” 33 Asi Pedru wakamudaira eciti: “Kunyazi anhu ese akamutizai nge ndaa yo zvicaitika kamuri, inini andimutizii!” 34 Djesu akati kaari: “Zvirokwazvo ndinokubvunza kuti, usiku uno djongwe risati rarira, ucandiramba katatu.” 35 Pedru wakati kaari: “Kunyazi kana ndecitodikana kufa na imwimwi, andizomurambii.” Afundi amweni ese akareketawo zvimwezvo.
36 Djesu akaguma no afundi ake pa mbuto yaizwi Getsimani, uye iyena akati ku afundi ake: “Garai pano, ndiri kuenda apo kooita munamato.” 37 Akatora Pedru no ana airi a Zebhedheu, uye akatanga kutsukwara, no kunetseka maningi. 38 Akati kaari: “Ndakatsukwara maningi, zvekutoda kufa. Garai pano, murumbwe mecirinda na inini.” 39 Uye akaenda mberi padoko ogodama, uye akanamata eciti: “Baba, kana zveciita, bvisai kopo ii kandiri. Ngakusaizwe kuda kangu, asi kuda kenyu.”
40 Akahwirira ku afundi oagumira akawata, uye akati kuna Pedru: “Makonerhwa kurumbwa makarinda na inini kunyazi ke nguwa imwe basi? 41 Rumbwai makarinda uye rumbwai mecinamata kuti musawire pa muedzo. Zvezvirokwazvo mwiya unoda, asi nyama aina simba.” 42 Djesu akaendazve, kecipiri, oita munamato eciti: “Baba, kana zvisikaiti kuti mubvise kopo ii kandiri ndisikazi kuimwa, kuda kenyu ngakuizwe.” 43 Akahwirirazve uye akaagumirazve eciwata, ngokuti madziso awo airema ngo hope. 44 Ngokudaro, iyena akaasiya oendazve koita munamato kecitatu, ecibhuya zviro zvimwezvo. 45 Akahwirira ku afundi ake, uye oabvunza kuti: “Pa nguwa yakaita hingana ino, imwimwi muri kuwata mecizorora! Onai! Iri kukhwedera dhuze nguwa yekuti Mwana we munhu akandwe mu nyara dze ashaishi. 46 Mukai tiende. Onai! Mutengesi wangu waakuguma.” 47 Djesu paainga ecireketa, Djudhasi, umwe we afundi 12, wakauya no anhu akawanda ainga ano masupada no mipini. Anhu aya, akatumwa no atungamiriri e apristi no akuru e anhu.
48 Uya waizomutengesa, wakaapasa cipangidzo eciti: “Uya wandinopsvoda, ndiye. Musungei.” 49 Uye ecienda kuna Djesu, iyena wakati: “Mucaita wani Rabhi!” Pedzepo wakamupsvoda. 50 Asi Djesu akamubvunzisa kuti: “Shamwari, wauirei pano?” Hino, awona akaenda kuna Djesu, akamubata, omusunga. 51 Asi umwe we aya ainga ana Djesu, wakatambanudza moko wake, wotora supada yake, woceka nzee yo muranda we mupristi mukuru, uye iyona yakambwera. 52 Djesu akamubvunza kuti: “Hwirinza supada pa mbuto yayo, ngokuti wese unoseenzesa supada, ucafa no supada. 53 Iwewe unorangarira kuti ndingakonerhwa kukumbira Baba angu kuti anditumire zvino, zvikwata zvikuru zve ngirozi zvinodarika 12? 54 Kana ndikadaro, anozodzadzika kudini Matarhwa anobhuya kuti zvinodikana kuitika kudaro?” 55 Pa nguwa iyona, Djesu akabvunza anhu kuti: “Imwimwi mauya koondisunga mune masupada no mipini, hingana kuti ndiri mbavha? Mazuwa ese ndaigara mu tempro ndecifundisa, asi imwimwi amuzi kundisunga. 56 Zvese izvi, zvaitika kuti zvidzadzike zvakatarhwa no aphorofita.” Ngokudaro afundi ese akamusiya ega otiza.
57 Aya akasunga Djesu, akaenda naye kumba ke mupristi mukuru Kaifasi, ikona kainga kakaungana atari no akuru. 58 Asi Pedru, wakateera nge cekure, dakara waguma pa ruwanze ro mupristi mukuru, uye mumasure mekupinda, wakagara no aseenzi e panyumbepo, kuti aone zvaizoitika.
59 Atungamiriri e apristi no Sinedriyo yese, aipsvaka upupuri we manyepo kuti auraye Djesu. 60 Asi apana upupuri waakaona, kunyazi pakauya apupuri akawanda e kunyepa. Pakazouyazve apupuri airi, 61 awona akabhuya kuti: “Munhu uu akati: ‘Ndinokwanisa kuphwanya tempro ya Mwari, ndoiwaka mu mazuwa matatu.’” 62 Mupristi mukuru paakazwa izvi, wakamuka womubvunzisa kuti: “Audairi ciro kani? Unoonawo kudini panocokuita no izvi zvaari kukupumha?” 63 Asi Djesu akarumbwa akanyarara. Hino, mupristi mukuru wakati kaari: “Ndinoita kuti upike pamberi pa Mwari mupenyu, kuti utibvunze kana uri Kristu, Mwana wa Mwari!” 64 Djesu akati kaari: “Imwimwi ndimwi muri kutozvibhuya. Asi ndinoti kamuri: Kubvira zvino kuenda mberi, mucaona Mwana we munhu akagara ku moko kwawo we simba, eciuya ari pamusoro pe makore e kudenga.” 65 Mupristi mukuru wakamwesa macira ake eciti: “Iyena atuka Mwari! Ticadirei apupuri amweni? Onai! Mapera kumuzwa ecituka Mwari. 66 Munoonawo kudini?” Awona akadaira kuti: “Iyena anodikana kufa.” 67 Akamupfirira ku hope, akamuponda zvibhakera. Uye amweni akamuponda bofutada, 68 eciti: “Phorofita Kristu. Ndiani akuponda?”
69 Pedru wainga wakagara pasi kunza, pa ruwanze, muranda umweni we mwanakadzi wakamukhwederera, womubvunza kuti: “Iwewe waihambawo na Djesu we ku Garireya!” 70 Asi iyena wakarambira pamberi pe anhu ese eciti: “Anditozvizii zvauri kureketa.” 71 Paakabuda woenda pa musuwo we ruwanze, musikana umweni wakamuona, wobvunza aya ainga ari ipona kuti: “Munhu uu waihambawo na Djesu, we ku Nazareta.” 72 Iyena wakamurambazve, eciita zvokupika kuti: “Inini andimuzii munhu uu!” 73 Mumasure me kacinguwa, anhu ainga ari ipona akakhwedera kuna Pedru, omubvunza kuti: “Zvirokwazvo iwewe uri umwe wawo, ngokuti mareketero ako ari kupangidza izvona.” 74 Hino, iyena wakatanga kudzituka uye ecipika kuti: “Andimuzii mwanarume uu!” Uye ciriporipoco, djongwe rakarira. 75 Uye Pedru wakaedzurira zvakabhuiwa na Djesu kuti: “Djongwe risati rarira, ucandiramba katatu.” Hino wakabuda kunza,uye wakatanga kucema maningi.