Ku Afiripi
3 Pakupedzesera hama dzangu, rumbwai mecipfara muna Tenzi. Azvindishuphiri kuphinda kutara zvandakambomutarirai, asi zvinomucengetedzai.
2 Ngwarirai imbwa; ngwarirai anokuwadza; uye ngwarirai aya anobambidzira amweni kuti aite ucekeri. 3 Ngokuti ane ucekeri we zvirokwazvo tisu isusu, tinoita basa rakacena no mwiya wa Mwari, isusu tinodada nge ndaa ya Kristu Djesu uye rugondo redu aritsamiri pa nyama, 4 kunyazi hazvo inini ndino zvikonzero zvakawanda zve kugonda nyama kupinda munhu upi hake.
Kana pane munhu unorangarira kuti uno zvikonzero zve kugonda nyama, inini ndino zvakawanda kudarika iyena: 5 ndakaizwa ucekeri pa zuwa rocisere, ndiri Muisraeri, we dzinza ra Bhenjamini, Muhebheru wakabarhwa no Ahebheru; pane cokuita no mutemo, ndiri Mufarisi; 6 inini ndaiteerera ungano no simba rese; pano cokuita no unatsi* unobva pa mutemo, ndainga ndiri munhu asina caanopumhwa. 7 Asi zvandaiona hinga upfumi, ndakazviona hinga zvisina basa* nge ndaa ya Kristu. 8 Uyezve, ndinoona zviro zvese hinga zvisina basa kana ndecizviezanisa no ruziyo ra Kristu Djesu Tenzi wangu, rine ukoshi we pamusoro-soro. Nge ndaa yake, ndakatenda kuruza zvese uye ndinozviona hinga marara, kuti ndiwine Kristu 9 uye kuti ndioneke ndiri mu rubatano naye, haiwa nge ndaa ye unatsi unobva pa kuzwira Mutemo, asi nge ndaa ye unatsi unobva pa kutenda muna Kristu, unatsi unobva kuna Mwari uye wakawakirhwa pa kutenda. 10 Inini ndinoda kuziya iyena no simba ra uya akamumutsa, ndotambudzika no kufa hinga iyena, 11 kuti ndione kuti zvicaita here kuona mukana we kumutswa ku akafa pa rumuko rokutanga.
12 Izvi azvireyi kuti ndatozvitambira kana kuti ndaamunhu wakakwana, asi ndinopeta masimba kuitira kuti kana zveciita nditambire zviya zvandakasanangurirhwa na Kristu Djesu. 13 Hama, andidzioni hinga ndatouona; asi cokwadi nge cekuti: Ndinokanganwa zviro zve sure, ndodadamira kuti ndibate zviri mberi, 14 ndinopeta masimba kuti ndione mubairo we kuenda kudenga wandakadainzirhwa na Mwari eciseenzesa Kristu Djesu. 15 Hino isusu tese tino kutenda kakabamba, ngatigarei no marangariro akadai uye kana pano amweni ano marangariro akasiyana pa shwiro idzi, Mwari acaapangidza marangariro akanaka. 16 Asi, pasinei no kubudirira pa kunamata kataita dakara zvino, ngatirumbwei tecihamba mu gwanza irona.
17 Hama, garai ateedzeri angu makabatana, mecinyasa kuona aya anohamba maererano no muezaniso watakamupangidzai. 18 Ngokuti kuno akawanda ari kuhamba hinga azondi e mutanda we kutambudzikira* wa Kristu. Ndaigara ndecireketa nge zvawo kakawanda, asi zvino ndaakureketa nge zvawo ndecicema. 19 Awona acatsakatiswa, mwari wawo i ndani dzawo, awona anodada no zviro zvaaidikana kupsveruka nazvo, uye anokanda ndangariro dzawo pa zviro zviri pa nyika. 20 Asi isusu tiri agari e kudenga, uye takaetsera no mwoyo wese muponesi anobva ikona, Tenzi Djesu Kristu, 21 uya acacinja mwiri wedu usina simba kuti uezane no mwiri wake unokudzwa peciseenzeswa simba rake guru, iro rinoita kuti akwanise kukanda zviro zvese pasi pake.