Akatarhwa na Mateu
10 Hino, Djesu akadainza afundi ake 12, akaapasa simba pamusoro pe mwiya isikazi kucena kuti aidzingire uye kuti aporese mishobo yese ye matenda no urema.
2 Mazina e aphostori 12 ndi aya: Wokutanga ndi Simoni, unodainzwa Pedru, no hama yake inozwi Andreya; Tiyago mwana wa Zebhedheu, na Juau hama ya Tiyago; 3 Firipi na Bhartoromeu; Tomaji na Mateu murongosi we musoho; Tiyago mwana wa Arfeu; na Tadheu; 4 Simoni Mukanani;* na Djudhasi Iskariyoti, uya wakazomutengesa.
5 Djesu akatuma aphostori aya 12, oapasa nhungamiriro ii: “Musapaukire mu makwanza e madzinza amweni, uye musapinde mu mathaundi e Asamariya; 6 asi endai kune mabira akapsveteka e nyumba ya Israeri. 7 Pamunonga mecienda, paridzirai meciti: ‘Umambo we kudenga wakhwedera padhuze.’ 8 Poresai anorhwara, mutsai akafa, Poresai ano mapere, bvisai madhimoni. Makapaswa nyore, ipaiwo nyore. 9 Musapsvake kukanda oro, prata, kana kobre mu mabhande enyu e kukandira mare, 10 kana cibudu cokukandira zvekurhya, kana macira amweni, kana masandarya amweni, kana ndonga imweni kuti muite rhwendo, ngokuti museenzi wakasisira zvokurhya zvake.
11 “Mu thaundi rese kana mu mutanha wamunopinda, psvakai imona munhu wakasisira, garai ipona dakara mabudepo. 12 Kana mukapinda mumba, cungamidzai anhu e ipona. 13 Kudai akamutambirai zvakanaka, runyararo renyu ngarigare nawo; asi kana akasama kumutambirai zvakanaka, runyararo renyu ngarihwirire kamuri. 14 Mbuto yese isina munhu anomutambirai, kana kupurutana masoko enyu, pamunobuda pa nyumba iyona kana mu thaundi irona, gugudzai bukuta riri pasi pe tsoka dzenyu. 15 Zvezvirokwazvo ndinoti kamuri, pa zuwa ro kutongwa zvinonga zviri nani mu nyika yo Sodhoma ne Gomora, pane zvicaitika ku thaundi irona.
16 “Ndiri kumutumai hinga mabira pakati pe mhumhi; hino ngwarirai hinga nyoka asi musina ndaa hinga njiwa. 17 Ngwarirai anhu, ngokuti awona acazomuendesai mu matribhunari, uye acazomupondai mu masinagoga awo. 18 Munozoendeswa pamberi pe atungamiriri no madzimambo nge ndaa yangu, kuti mupase upupuri pamberi pawo, no pamberi pe madzinza amweni. 19 Asi, kana akamuendesai ku atongi, musanetseke nge zviya zvamucareketa no mushobo wamucazvireketa, ngokuti pa nguwa iyona mucapaswa zvokureketa; 20 ngokuti andimwipi basi munozoreketa, asi mwiya wa Baba enyu ndiwo unozoreketa peciseenzeswa imwimwi. 21 Uyezve, hama inozouraisa hama yayo, baba anozouraisa mwana wawo, ana anozopandukira madzibaba awo no kuauraisa. 22 Uye mucazondwa no anhu ese nge ndaa yo zina rangu, asi uya unonga washingirira dakara kumugumo, ndiye ucaponeswa. 23 Paanomuteererai mu thaundi rimwe, tizirai ku thaundi rimweni; ndinomubvunzai zvirokwazvo kuti, amuzopedzi kutenderera mathaundi ese e Israeri Mwana we munhu asati aguma.
24 “Mufundi aaripi pamusoro pe mufundisi wake, uye muranda aaripi pamusoro pa tenzi wake. 25 Zvinokwana kuti mufundi agare hinga mufundisi wake, uye muranda agare hinga tenzi wake. Kana akadainza muridzi we pa nyumba kuti Bherizebhu,* o panyumbepo anodainzwa kudini? 26 Hino amudikani kuathya, ngokuti apana cakafukidzwa cisikazofukurhwi, uye apana cakafisika cisikazozikaniki. 27 Zvandinomubvunzai mucidima, zvibhuyei pakadjeka, uye zvamunozwa muciwere-were, zviparidzirei muri pamusoro pe nyumba. 28 Uye musathye aya anouraya mwiri, asikakwanisi kuuraya upenyu; asi ithyai uya anokwanisa kuparadza upenyu no mwiri mu Gehena.* 29 Zvishiri zviiri zvinotengeswa no mare isikanyanyi kukosha,* andizvopi here? Asi apana kana imwe yadzo ingambwerera pasi Baba enyu asikazvizii. 30 Asi kunyazi tsitsi riri mu musoro menyu, rakaerengwa rese. 31 Hino musathye; imwimwi munokosha maningi kudarika zvishiri zvakawanda.
32 Hino, munhu wese anotendera kuti anondiziya pamberi pe anhu, ininiwo ndicatenda kuti ndinomuziya pamberi pa Baba angu ari kudenga. 33 Asi munhu wese anondiramba pamberi pe anhu, ininiwo ndicamuramba pamberi pa Baba angu ari kudenga. 34 Musarangarire kuti ndauya koounzisa runyararo pasi pano; andizi kuuya koounzisa runyararo, asi ndauya kuzoparadzanisa.* 35 Ngokuti ndauya kuzoparadzanisa mwana na baba ake, mwana wo mwanakadzi na mai ake, nyamwana na nyazani ake. 36 Zvezvirokwazvo, azondi o munhu anozogara anhu e pa nyumba pake. 37 Uya anodisa baba ake na mai ake kupinda inini, aazi kusisira kugara mufundi wangu; uya anodisa mwana wake we mwanarume kana mwana wake we mwanakadzi kupinda inini, aazi kusisira kugara mufundi wangu. 38 Munhu wese asikatambiri mutanda wake wo kutambudzikira* uye otama kunditeerera, aasisiri kugara mufundi wangu. 39 Uya anopsvaka kuponesa upenyu* wake anozouruza, uya anoruza upenyu* nge ndaa yangu anozouona.
40 “Munhu wese anomutambirai anonditambirawo, uye wese anonditambira, anotambirawo Uya akandituma. 41 Munhu wese anotambira muphorofita ngokuti ndi muphorofita, acatambira mubairo we muphorofita, uye wese anotambira munhu munatsi ngokuti ndi munhu munatsi, anotambira mubairo we munhu munatsi. 42 Uye munhu wese anopasa umwe we adoko aya, kunyazi kopo imwe basi ye mvura inotonhorera kuti amwe, ngokuti iyena ndi mufundi wangu, ndinomugondesai kuti aazomboruzi mubairo wake.”