Akorinti Wecipiri
10 Inini Pauro, ndinomudeketererai no upfawi uye no nyasha dza Kristu, kunyazi mecindiona hinga ndisina simba pandinonga ndiri pakati penyu, asi ndakashinga kamuri pandinonga ndisiripopi. 2 Ndinokumbira kuti pandinonga ndina imwimwi, nditame kugara no shungu zvondiitisa kuti ndiite zviro no hasha hingana zvandinorangarira kuzoita kuno aya anotiona kuti tiri kuhamba maererano no nyama. 3 Ngokuti kunyazi tecihamba pa nyama, isusu atirhwi maererano no zvatiri pa nyama. 4 Ngokuti zviro zvatinoseenzesa pa kurhwa nazvo hondo azviropi zve nyama, asi Mwari anozvipasa simba kuti zviputse zviro zvakanyasa kubamba. 5 Ngokuti tinoputsa ndangariro dzakashata uye zvese zvinotipingaidza zvisikaenderani no ruziyo ra Mwari, uye tinokanda mu uranda marangariro ese, kuti azwire Kristu; 6 uye takagadzirira kuti tiphanice munhu unopangidza kutama kupurutana, kudai kupurutana kenyu kukagara kakakwana.
7 Imwimwi munotonga zviro maererano no zvamunoona ngece kunza. Kana munhu ano rugondo rokuti iyena ngewa Kristu, ngaaedzurire ciro ici: Kana iyena ari wa Kristu, isusuwo tiri a Kristu. 8 Ngokuti kunyazi kana inini ndikanyanya kudada nge ndaa ye simba randakapaswa na Tenzi kuti timubambisei, haiwa kumurembesai, inini ndainga ndisikazopsveruki. 9 Asi andidi kuita hingana ndiri kumuthyisidzirai no tsamba dzangu. 10 Ngokuti amweni anobhuya kuti: “Tsamba dzake dzinoreketa zvakanaka uye dzinosimba, asi kana aapo aana simba uye mareketero ake aareremedzwi.” 11 Munhu wakadaro unodikana kuziya kuti zvatinobhuya* mu tsamba dzedu kana tisiripopi, ndizvona zvaticaitawo* patinonga tagumeyo. 12 Ngokuti atiedzi kudzikanda pamwepo kana kudziezanisa no aya anodzikudza. Asi paanodziongorora eciseenzesa maonero awo kamare uye paanodziezanisa oga, awona anopangidza kuti aana ruziyo.
13 Ngokudaro, isusu atidadi no zviro zvinoizwa kunza ke mugano wedu, asi tinodada basi no zviro zvatinoita mukati me mugano watakakandirhwa* na Mwari, unobatanidzawo imwimwi. 14 Zvezvirokwazvo, atiripi kupindiridza mugano zvoita hinga kuti imwimwi amuripi mukati me ndima yedu, ngokuti tisu takatanga kuuya kamuri no masoko akanaka ngezva Kristu. 15 Isusu atidadi kunza ke migano yedu ngezve mabasa anoizwa no anhu amweni, asi tinoetsera kuti kutenda kenyu pakunorumbwa kecikura, mabasa edu acarumbwawo ecikura mukati me ndima yedu. Hino ticarumbwa teciita zvakawanda, 16 kuitira kuti tiziise masoko akanaka mu mitanha dziri kure na imwimwi, kuti tisadade no zviro zvakaizwa mu ndima yo munhu umweni. 17 “Asi uya unodada, ngaadade muna Djehovha.”* 18 Ngokuti munhu unodzisimba ega andiyepi unopfarirhwa, asi munhu unosimbwa na Djehovha* ndiye unopfarirhwa.