Akatarhwa na Mateu
18 Pa nguwa iyona, afundi a Djesu akamukhwederera, omubvunzisa kuti: “Ndiani mukuru mu Umambo we kudenga?” 2 Ngokudaro, iyena akadainza mwana mudoko omuimisa pakati pawo 3 oabvunza kuti: “Ndinomubvunzai zvirokwazvo kuti, mukasama kutendeuka* moita hinga mwana mudoko, amuzopindi mu Umambo we kudenga. 4 Ndiyo ndaa, uya anodzidodosa hinga mwana mudoko uu, ndiye mukuru mu Umambo we kudenga; 5 uye uya anotambira mwana mudoko wakaita hingana uu mu zina rangu, anonditambirawo. 6 Asi uya anokuhunyisa umwe we adoko aya anotenda mandiri, zviri nani kuti asungirhwe mu khosi rake gwiyo rinotenderedzwa no dhongi, uye okhandirhwa pakati pe bahari.
7 “Ine nyathwa nyika ino nge ndaa ye mapuwe ayo anokuhunyisa! Izvirokwazvo kuti kucazooneka mapuwe anokuhunyisa, asi ane nyathwa munhu anozoita kuti paoneke buwe rinokuhunyisa! 8 Hino, kana nyara yako kana tsoka yako yeciita kuti ushaishe,* igure woikhandira kure na iwewe. Zviri nani kuti uone upenyu wakaremara kana kuti wecikhabinya, pane kuti ukhandirhwe mu muriro usikaperi no nyara mbiri kana no tsoka mbiri. 9 Uyewo, kana dziso rako reciita kuti ushaishe,* ritokodore worikhandira kure na iwewe. Zviri nani kuti uone upenyu uno dziso rimwe, pane kuti ukhandirhwe uno madziso mairi mu Gehena* re muriro. 10 Ngwarirai kuti musashore umwe we adoko aya, ngokuti ndinomubvunzai kuti, ngirozi dzawo dziri kudenga mazuwa ese dziri kuona hope ya Baba angu ari kudenga. 11* ——
12 “Munoonawo kudini? Kana munhu ano mabira 100 rimwe rakhona ropsveteka, aasii mabira 99 pa matunhu uye oenda koopsvaka riya rapsveteka? 13 Uye kana akariona, ndinomubvunzai zvirokwazvo kuti, anopfara maningi nge ndaa yaro kupinda 99 asikazi kupsveteka. 14 Ngo mushobo umwewo, Baba angu* e kudenga aadi kuti kunyazi umwe we adoko aya apsveteke.
15 “Uyezve, kana hama yako ikakuitira zvakashata, enda kooibvunza ndaa yake* muri mwega. Kana akakupurutana, unonga waihwirinza mu gwanza rakanaka. 16 Asi kana ikasama kukupurutana, enda no munhu umwe kana airi, kuti shwiro yakhona itongwe papupurirhwa no anhu airi kana atatu.* 17 Kana ikasama kuapurutana, reketa no ungano. Kana ikasama kupurutana kunyazi ungano, ngaagare kauri hinga munhu we nyika uye hinga murongosi we musoho.
18 “Ndinomubvunzai zvirokwazvo kuti, zvese zvamunonga masunga pa nyika, zvinonga zvasungwawo kudenga, zvese zvamunosudzunura pa nyika, zvinonga zvasudzunurhwawo kudenga. 19 Zvezvirokwazvo ndinomubvunzaizve kuti, kana airi enyu pa nyika akatenderana ciro cipi haco cinokosha ocikumbira, awona acacipaswa na Baba angu e kudenga. 20 Ngokuti, kana pano airi kana atatu akaungana muzina rangu, inini ndiripo pakati pawo.”
21 Pedru wakakhwedera kuna Djesu womubvunzisa kuti: “Tenzi, kana hama yangu ikandishaishira, ndinodikana kuirekerera kangana? Kanokwana 7 here?” 22 Djesu akamudaira kuti: “Ndinoti kauri, haiwa 7, asi kanokwana 77.
23 “Ndiyo ndaa, Umambo we kudenga ungaezaniswa na mambo waida kuti aranda ake aripe magaa awo. 24 Paakatanga kurongosa, mwanarume umweni wainga ari kufiyari 10 000 matarento* wakaunziswa kaari. 25 Asi ngokuti wainga asikakwanisi kuripa, tenzi wake wakabhuya kuti iyena no mukadzi wake no ana ake, no zvese zvaainga anazvo zvitengeswe kuti aripe gaa. 26 Hino, muranda wakhona wakamugodamira, womuhwararira eciti: ‘Ndipaseizve kacinguwa, ndicamuripai gaa rese.’ 27 Ngo kumuzwira usisi, tenzi we muranda iyena wakamusiya ecienda, uye wakamurekerera gaa rese. 28 Asi muranda uya wakaenda, wosongana no murandadoni wake wainga ecimufiyari madhenariyo* 100, wakamubata womutikinya mu khosi eciti: ‘Ndipase mare yangu.’ 29 Murandadoni wake wakamugodamira, womudeketerera eciti: ‘Ndipasei kacinguwa, ndinozomuripai.’ 30 Asi aazi kumuzwa, pane kudaro, wakamuendesa mu kadheya, dakara amuripa. 31 Arandadoni amweni paakaona zvainga zvaitika, akatsukwara maningi, uye akaenda koobvunza tenzi wawo zvese zvainga zvaitika. 32 Tenzi wake wakamudainzisa, womubvunza kuti: ‘Muranda wakashata, inini ndakakurekerera gaa rako pawakandideketerera. 33 Zvainga zvisikaitiwo here kuti iwewe uzwire usisi murandadoni wako hinga zvandakakuitira?’ 34 Ngokudaro, tenzi wake wakanyangadzwa maningi, uye wakamukanda mu kadheya dakara aripa gaa rese. 35 Baba angu e kudenga acamuitiraiwo izvona kana umwe na umwe wenyu asikarekereri hama yake zvecibva pa mwoyo.”