Atesaronika Wekutanga

1 Inini Pauro, na Sirvhano,* pamwepo na Timoti, ku ungano ye Atesaronika iri mu rubatano na Mwari Baba na Tenzi Djesu Kristu:

Nyasha dza Mwari no runyararo ngazvigare na imwimwi.

2 Tinogara tecitenda Mwari patinoreketa nge zvenyu mwese mu minamato yedu, 3 ngokuti tinogara teciedzurira basa renyu ramunoita makatendeka, basa renyu re rudo uye kushingirira kenyu kunobva pa kariro yamunayo muna Tenzi wedu Djesu Kristu pamberi pa Mwari wedu uye Baba edu. 4 Ngokuti isusu tinozviziya hama dzinodiwa na Mwari, kuti iyena akamusanangurai, 5 ngokuti masoko akanaka atinoparidzira aazi kuguma kamuri ngo masoko basi, asi no simba ra Mwari pamwepo no mwiya mucena, tino rugondo rakabamba re zviro zvataireketa; ngokuti imwimwi munoziya mararamire atakaita pakati penyu kuti timubetserei. 6 Uye imwimwi makagara ateedzeri edu no a Tenzi, ngokuti makatambira soko muri mumatambudziko no mupfaro unobva mu mwiya mucena, 7 zvekutoti makagara muezaniso wakanaka ku atendi ese e ku Masedhoniya no e ku Akaya.

8 Cokwadi nge cekuti, kutambira kamakaita soko ra Djehovha* akuzi kuziikanwa basi ku Masedhoniya no ku Akaya, asi kutenda kenyu muna Mwari kakabararika kwese-kwese, zvekutoti aticina zvokureketa. 9 Ngokuti awona kamare anorumbwa ecireketa ngezve kutanga kuonana katakaita uye kutendeukira kuna Mwari kamakaita mecisiya zvidhori zvenyu kuti mugare aranda a Mwari mupenyu uye we zvirokwazvo, 10 uye kuti muetsere Mwana wake ecibva kudenga, waakamutsa kubva ku akafa, Djesu, uwo unotiponesa pa shungu dziri kuuya.