Tsamba ya Djudha
1 Inini Djudha, muranda wa Djesu Kristu, hama ya Tiyago, ndiri kutarira ku aya akadainzwa, anodiwa uye akasanangurhwa na Mwari Baba kuti azobatane na Djesu Kristu:
2 Usisi no runyararo uye rudo, ngazvitunhudzirike kamuri.
3 Hama dzinodiwa, kunyazi hazvo ndaiyedza kumutarirai ngezve ruponeso ratinaro tese, ndakaona zvakasisira kumutarirai ndecimukohomedzesai kuti murhwire no simba kutenda, kakapaswa acena kamwe basi kuti kurumbwe kuripo nokusikaperi. 4 Ciripo nge cekuti anhu amweni akapinda pakati penyu, aya akasanangurirhwa kutongwa kare-kare maererano no Matarhwa; anhu akhona aadi Mwari uye anoseenzesa nyasha dza Mwari wedu ngo mushobo wakashata, eciita zviro zvinopsverusa uye anopangidza kuti aazi kugondeka ku muridzi uye Tenzi wedu umwe basi, Djesu Kristu.
5 Kunyazi mecinyasa kuziya zvese kamare, ndiri kuda kumuedzurirai kuti Djehovha* akaponesa anhu ku Edjipitu, pedzepo akatsakatisa ese aya asikazi kupangidza kutenda. 6 Uye ngirozi dzisikazi kucengeta mbuto yadzo yo pakutanga, dziya dzakasiya mbuto yadzo yokugara yakasisira, akadzicengeta mucidima cakakura dzakasungwa nokusikaperi kuti dzizotongwe pa zuwa guru. 7 Ngo mushobo umwewo, anhu e Sodhoma ne Gomora no mathaundi ainga akaatenderedza akapinda mu uhure wakanyanyisa,* ecipsvaka zvido zve nyama zvinopesana no zvaakasikirhwa; kuphanicwa kaakaizwa no muriro usikaperi, kunoseenza hinga ngwadzo katiri.
8 Kupinda izvona, anhu aya anondorangarira zvakashata nguwa dzese, ecisvipisa nyama, asikareremedzi utongi, uye ecituka aya anoreremedzwa na Mwari. 9 Asi Migeri ngirozi huru paakapesana na Dhiyabhurosi ecinetsana nge ndaa ye mwiri wa Mozesi, aazi kuona zvakasisira kuti amutonge nge masoko e kutuka, asi akati: “Djehovha* ngaakutonge.” 10 Asi anhu aya ari kushora zviro zvese zvaasikatombozwisisi. Uye pa zviro zvese zvaanotoziyawo no ndangariro dzawo hinga zvinyama zvisikarangariri, ari kurumbwa ecidzisvipisa no zviro zvakadaro.
11 Ane nyathwa, ngokuti akateera gwanza ra Kaini ombwerera pa zviito zvakashata zva Bharami, kuti aone mubairo, awona akafa ngo pamusoro pe mabhuyo akashata a Kora! 12 Anhu aya, ndi mapuwe akafindara pasi pe mvura mu mabiko enyu e ushamwari, paanonga ecirhya na imwimwi, awona ndi aushi anorhya asikathyi; makore asina mvura anopeperuswa no mhepo, miti isikabereki micero pa nguwa yainodikana kubereka, yakafa kairi,* ikabvithwa; 13 aya ndiwo mafungu e mu bahari ano shungu, anobudisa mafuro e upsverudzi wawo; nyeredzi dzisina gwanza rakarongeka, dzakagadzirirhwa cidima cisina mugumo.
14 Inoki munhu wecinomwe pa mubarirhwana wa Adhamu, wakaphorofitawo ngo pamusoro pawo paakati: “Onai! Djehovha* akauya no ngirozi cena dzakawandisisa* dzino simba, 15 kuti atonge ese no kuphanica ese akashata, nge ndaa ye zviito zvawo zvakashata, zvaakaita nge maitiro akashata, nokutonga ashaishi nge masoko ese akashata aakamutuka ndiwona.”
16 Anhu aya anogurunguta, aakwanirhwi ngo zvaanazvo mu upenyu wawo, anoita zvido zvawo, anoreketa masoko okudzikudza. Awona anosimba amweni ngo gwanza rokushora, kuti akwanise zvaanoda.
17 Asi kamuri imwimwi hama dzinodiwa, edzurirai masoko akarekethwa no aphostori a Tenzi wedu Djesu Kristu, 18 masoko aairumbwa ecireketa kamuri eciti: “Pa nguwa yekupedzesera, pacaoneka ashori anoteera mwoyo yawo inoda kuita zviro zvakashata.” 19 Aya ndiwona anoparadzanisa anhu, uye anoita zviro hinga zvinyama,* awona aana mwiya wa Mwari. 20 Asi kamuri imwimwi hama dzinodiwa, bambisai kutenda kenyu kakacenesesa, uye namatai mecibetserhwa no mwiya mucena, 21 kuti murumbwe muri mu rudo ra Mwari, pamunonga mecietsera usisi wa Tenzi wedu Djesu Kristu, mecirangarira ngezve upenyu usikaperi. 22 Uye rumbwai mecizwira usisi amweni asina cokwadi no zvaanotenda; 23 aponesei ngo kuabvisa pa muriro. Asi rumbwai mecipangidzira usisi kuno anhu amweni, mecizviita ngo kuthya, mecizonda kunyazi djira rakasvipiswa no mabasa akashata.
24 Kuna iyena anokwanisa kumucengetedzai kuti musambwere uye anokwanisa kuita kuti muime musina camunopumhwa pamberi pe kukudzwa kake no mupfaro mukuru, 25 kuna iyena Mwari umwe basi, Muponesi wedu eciseenzesa Djesu Kristu Tenzi wedu, kukudzwa, ukuru, simba, no utongi, ngazvigare zvake kubvira kare-kare, zvino, dakara nokusikaperi. Ameni.