Akatarhwa na Mateu
12 Pa nguwa iyona, Djesu akapinda no muminda yo trigu mu Sabudu. Afundi ake akazwa nzara, ndiyo ndaa akatora trigu, opikita otanga kurhya. 2 Afarisi paakazviona, akati kaari: “Ona! Afundi ako ari kuita zvisikadikani kuizwa pa zuwa ro Sabudu.” 3 Iyena akati kaari: “Amuzi kuerenga here zvakaizwa na Dhavhidhi no anhu ake paakazwa nzara? 4 Mushobo waakapinda mumba ma Mwari orhya pau yaiizwa mupiro, yainga isikatenderhwi kuti iyena pamwepo no anhu ake arhye, asi apristi basi? 5 Amuzizve kuerenga kuti pa Sabudu, apristi e mu tempro anoposha mutemo we Sabudu orumbwa asina ndaa? 6 Asi ndinomubvunzai kuti, ciro cikuru kupinda tempro ciri pano. 7 Asi kudai makazwisisa zvinoda kureya: ‘Ndinoda usisi haiwa cibairo,’ mungadai musikatongi anhu asina ndaa. 8 Ngokuti Mwana we munhu ndiye Tenzi we Sabudu.”
9 Paakabuda pa mbuto iyona, Djesu akapinda mu masinagoga awo, 10 uye painga pano mwanarume umweni wainga wakaremara nyara!* Hino, ecida kumupumha awona akamubvunzisa kuti: “Zvinotenderhwa here kuporesa mu Sabudu?” 11 Djesu akaadaira eciti: “Kudai umwe wenyu ano bira rimwe, rombwerera murindi mu Sabudu, ndiani wenyu asikaribati oribvisemo? 12 Munhu anokosha maningi kupinda bira! Ndiyo ndaa, zvinotenderhwa kuita zvakanaka mu Sabudu.” 13 Djesu akabvunza mwanarume uya kuti: “Tambanudza nyara yako.” Iyena wakaitambanudza, uye iyona yakatamba yoita hingana nyara yake imweni. 14 Afarisi akabudemo uye akapangana kuti amuuraye. 15 Djesu paakazviziya, akabudepo. Ajinji akamuteera uye iyena akaaporesa ese, 16 asi Djesu akaakohomedzesa kuti awona asabvunze amweni kuti iyena ndiani, 17 kuti zvidzadzike zvakarekethwa no muphorofita Isaya kuti:
18 “Onai! Museenzi wangu wandasanangura, wandinoda, wandapfarira! Ndicakanda mwiya wangu paari, uye acabudisa pamhene kumadzinza kuti kutonga no unatsi kakaita kudini. 19 Iyena aazoreketedzani kana kukhuwa, uye apana munhu anozozwa izwi rake mu makwanza makuru. 20 Aazobhanyi gonje rakakuwadzika, aazodzimisi turusida iciri kutororeka, dakara aunzisa unatsi. 21 Zvezvirokwazvo madzinza acagara no kariro mu zina rake.”
22 Akamuunzira mwanarume umweni wainga ano dhimoni, iyena wainga ari bofu uye wainga ari cimumu, uye Djesu akamuporesa, zvokuti iyena wakatanga kureketa no kuona. 23 Hino, anhu akashamisika maningi uye akatanga kuti: “Uu andiepi here Mwana wa Dhavhidhi?” 24 Afarisi paakazwa izvi, akati: “Munhu uu anobvisa madhimoni mu zina ra Bherizebhu,* mutongi we madhimoni.” 25 Eciziya ngezve murangariro wawo, iyena akati kaari: “Umambo wese usikazi kubatana unozopera, uye thaundi kana muzi wese usikazi kubatana, azvizorumbwi zvakaima. 26 Ngo mushobo umwewo, kana Sathani ecidzingira Sathani, iyena unonga asikazi kubatana pacake; hino umambo wake ungarumbwa kudini wakaima? 27 Kana ndecidzinga madhimoni no simba ra Bherizebhu, ana enyu anoadzingira no simba raani? Ndiyo ndaa acamutongai. 28 Asi kana ndecidzinga madhimoni ndeciseenzesa mwiya wa Mwari, Umambo wa Mwari waguma kamuri. 29 Kana kuti, munhu angapinda kudini no simba mumba me mwanarume ano simba okwanisa kuba zviro zvake asikazi kutanga asunga mwanarumewo? Kana akadaro, ndipo paanozokwanisa kumubira zviro zvake. 30 Munhu wese asiripi kudii rangu anorhwisana na inini, uye wese asikaunganidzi anhu na inini anoparadzanisa.
31 “Nge ndaa yazvo ndinomubvunzai kuti, mishobo yese ye zvishaishi zve anhu no kutuka kunozorekererhwa, asi kutuka mwiya wa Mwari akuzorekererhwi. 32 Hinga muezaniso, uya anoshora Mwana we munhu anozorekererhwa; asi uya anoshora mwiya mucena, aazorekererhwi, kunyazi pa nguwa ino, kunyazi mu nguwa inoteera.
33 “Kudai mukasima muti wakanaka, muti iwona unozobara micero yakanaka, mukasima muti wakashata,* iwona unozobara micero yakashata,* ngokuti muti unoziikanwa ngo micero yawo. 34 Imwi ana e nyoka, mungabhuya kudini zviro zvakanaka nepoo muri anhu akashata? Ngokuti muromo unobhuya zvakadzara mu mwoyo. 35 Munhu wakanaka, unobudisa zviro zvakanaka pa upfumi wake wakanaka, asi munhu wakashata, unobudisa zviro zvakashata pa upfumi wake wakashata. 36 Ndinomubvunzai kuti, anhu acadzidairira pa Zuwa re Kutongwa, nge ndaa ye masoko ese asikabetseri aanoreketa; 37 ngokuti ucazwi munatsi nge masoko ako, uye ucatongwa nge ndaa yo masoko ako.”
38 Atari amweni no Afarisi akamubvunza kuti: “Mufundisi, tinoda kuona cipangidzo cinobva kamuri.” 39 Djesu akaadaira eciti: “Mubarirhwana wakashata uye usikazwiri Mwari,* unorumbwa wecipsvaka cipangidzo, asi apana cipangidzo caucapaswa, kunza ke cipangidzo ce muphorofita Djona. 40 Ngokuti, hinga zvakaita Djona wakagara mu ndani me howe huru, usiku ne masikati ke mazuwa 3, Mwana we munhu anozogarawo mu mwoyo me nyika usiku ne masikati ke mazuwa 3. 41 Anhu e ku Ninivhi anozomutswa pa kutonguwa pamwepo no anhu e mubarirhwana uno, oapasa ndaa, ngokuti awona akacinyuka no masoko aakaparidzirhwa na Djona. Asi munhu mukuru kupinda Djona ari pano. 42 Mambokadzi we kakutsi anozomutswa pa kutongwa pamwepo no mubarirhwana uu, uye anozoupasa ndaa, ngokuti iyena wakabva kure kuti azwe ungwaru wa Soromoni. Asi munhu mukuru kupinda Soromoni ari pano.
43 “Mwiya wakashata paunobuda pa munhu, unopinda nge pambuto isina mvura, wecipsvaka mbuto yekuzororera, woikonerhwa. 44 Hino uwona unoti: ‘Ndicahwirira kumba kangu kandakabva,’ paunoguma, unogumira nyumba iyona isina munhu, yakapsvairhwa uye yakarongwa zvakanaka. 45 Hino, iwona unoenda wounzisa mwiya 7 yakashata kudarika uwona, uye inopinda yotanga kugaremo, uye mugariro we munhu uu, unonyanya kushata kudarika pakutanga. Izvi ndizvona zvicaitika no mubarirhwana uu wakashata.”
46 Paainga ecireketa no anhu, mai ake no hama dzake ainga akaimira kunza ecida kureketa naye. 47 Munhu umweni wakamubvunza kuti: “Mufundisi, mai enyu no hama dzenyu ari kunzeyo, anoda kureketa na imwimwi.” 48 Djesu akamudaira eciti: “Ndiani mai angu no hama dzangu?” 49 Ecipangidzira afundi ake, iyena akati: “Mai angu no hama dzangu ndiwo awona aya! 50 Ngokuti uya anoita kuda ka Baba angu ari kudenga, ndiye hama yangu, hanzvadzi yangu uye mai angu.”