Djoshuwa

13 Djoshuwa wainga acembera. Hino Djehovha akati: “Iwewe wacembera, asi pacino nyika yakakura yausati watora. 2 Ii ndiyo nyika iri kushota: Mutanha wese we Afiristiya uye we Ajesuri 3 (kubvira ku Shiori iri kumabvazuwa ke* Edjipitu dakara ku mugano we Ekroni nge kakutsi, kaiziikanwa hingana nharaunda ye Kanani) kutobatanidzawo mitanha ye madzimambo mashanu e Afiristiya, kureya mitanha ye Agaza, Aashidhodhi, Aaskeroni, Agati, uye Aekroni; mutanha we Avhimu, 4 ngo katemaidumba; nyika yese ye Akanani; Meara ye Asidhoni, dakara ku Afeki, dakara ku mugano no Aamori; 5 nyika ye Ajebhari uye kumabvazuwa kese ke Rebhanoni, kubva ku Bhaari-gadhi kumuceto ke Dunhu re Hermoni, dakara ku Rebho-amati;* 6 agari ese e ku mutanha we matunhu, kubvira ku Rebhanoni dakara ku Misirefoti-maimu; uye agari ese e ku Sidhoni. Inini ndicaadzingira pamberi pe Aisraeri. Iwewe unodikana kuakowanisira, hingana zvandakakubvunza. 7 Ngokudaro, iwewe unodikana kukowanisa nyika ii hinga nhaka pakati pe madzinza mapfembamwe uye ku hafu ye dzinza ra Manase.”

8 Hafu imweni ye dzinza ra Manase, pamwepo no Arubheni uye Agadhi akapaswa nhaka yawo yaainga akapaswa na Mozesi kumabvazuwa ke Djorodhani, hinga kupaswa kaainga akaizwa na Mozesi, museenzi wa Djehovha: 9 Kubvira ku Aroeri iri kumuceto ke Bani re Arinoni,* uye thaundi riri pakati pe bani uye mbuto yese yakakwirira ye ku Medhebha dakara ku Dhibhoni; 10 mathaundi ese e Sioni, Mambo we Aamori, wakatonga ku Hesibhoni dakara ku mugano we Aamoni; 11 kutobatanidzawo Giriyadhi, nharaunda ye Ajesuri no ye Amaakati uye Dunhu rese re Hermoni, uye Bhazani yese dakara ku Sareka; 12 izvi zvinoda kureya, umambo wese wa Ogi we ku Bhazani, wakatonga Astaroti uye Edhirei. (Iyena wainga ari umwe we Marefaimu ekupedzesera.) Mozesi wakaakunda uye wakaadzingira. 13 Asi Aisraeri aazi kudzingira Ajesuri no Amaakati, ngokuti Ajesuri no Amaakati ari kurarama pakati po Israeri dakara nyamasi.

14 Dzinza re Arevhi basi ndirona raasikazi kupasa nhaka. Zvibairo zvinopiswa zva Djehovha Mwari we Israeri ndiyo nhaka yawo, hinga zvaakagondeswa naye.

15 Uye Mozesi wakapasa nhaka dzinza re Arubheni, maererano no mhuri dzawo, 16 uye nharaunda yawo yaibva ku Aroeri, iri kumuceto ke Bani ro Arinoni,* kubvira pa thaundi riri pakati pe bani, uye kutobatanidzawo mbuto yakakwirira ye Medhebha; 17 Hesibhoni uye mathaundi aro ese ari kakakwirira, Dhibhoni, Bhaamoti-bhaari, Bheti-bhaare-meoni, 18 Jaazi, Kedhemoti, Mefati, 19 Kiriyataimu, Sibhima, uye Zereti-sairi, ku dunhu riri ku bani, 20 Bheti-peori, mbuto dzino miterero dze Pisiga, Bheti-jezimoti, 21 mathaundi ese ari kakakwirira, uye Mambo we Sioni, Mambo we Aamori waitonga Hesibhoni. Mozesi wakakunda iyena kutobatanidzawo no akuru-akuru e Midhiyani kureya, Evhi, Rekemi, Zuri, Uri, uye Rebha, ekuti ainga ari madzimambo ainga ari pasi pe Sioni airarama mu nyika iyona. 22 Pakati pe aya akauraiwa no Aisraeri no supada wainga aripoo Bharami mufemberi, mwana wa Bheori. 23 Mugano we nharaunda ye Arubheni wainga uri Djorodhani; nharaunda iyona no mathaundi ayo uye no mizi dzawo zvakagara nhaka ye Arubheni, maererano no mhuri dzawo.

24 Kusiya izvona, Mozesi wakapasa nhaka dzinza ra Gadhi, maererano no mhuri dzawo. 25 Nharaunda yake yaibatanidza Jazeri, iri mu mathaundi e Giriyadhi uye hafu ye nyika ye Aamone dakara ku Aroeri, iri mberi ke Rabha; 26 uye kubva ku Hesibhoni dakara ku Ramati-mizifi no Bhetoimu, uye kubva ku Maanaimu dakara ku mugano we Dhebhiri; 27 uye ku dii re ku bani kaibatanidza Bheti-arani, Bheti-mirai, Sukoti, uye Zafoni, dii rimweni rese rainga rasara re nyika yaitongwa ndi Sioni Mambo we Hesibhoni, mugano wakhona wainga uri Murambo wa Djorodhani kubva ngece kumuterero kunoperera Bahari re Kinereti,* riri kumabvazuwa ke Djorodhani. 28 Ii ndiyo yakagara nhaka ye Agadhi maererano no mhuri dzawo, no mathaundi awo, uye no mizi dzawo.

29 Kusiya izvona, Mozesi wakapasa nhaka hafu ye dzinza ra Manase, maererano no mhuri dzawo. 30 Uye nharaunda yawo yaitangira ku Maanaimu uye yaibatanidzawo Bhazani, zvinoda kureya umambo wese wa Ogi Mambo we Bhazani uye zvimathaundi zvidoko zve matenda a Djairi ari ku Bhazani, mathaundi 60. 31 Uye hafu ye Giriyadhi, Astaroti uye Adhirei, mathaundi e umambo wa Ogi ku Bhazani, akapaswa ana a Makiri mwana wa Manase, zvinoda kureya, hafu ye ana a Makiri maererano no mhuri dzawo.

32 Idzi ndidzo nhaka dzaakapaswa na Mozesi ku renje re Moabhi ku dii rimweni re Djorodhani, nge kumabvazuwa ke Djeriko.

33 Asi Mozesi aazi kupasa nhaka dzinza re Arevhi. Djehovha Mwari we Israeri ndiye nhaka yawo, hinga zvaakaapikira.