Ku Aroma
6 Hino totii? Torumbwa tiri mu citema kuti tipangidzirhwe nyasha dza Mwari here? 2 Haiwa! Tingarumbwa kudini tecirarama mu citema nepoo isusu takafa maciri? 3 Kana kuti amuzvizii here kuti tese takabhabhatidzwa muna Kristu Djesu, takabhabhatidzwa mu rufu rake? 4 Hino takakotswa pamwepo naye mu rubhabhatidzo redu mu rufu rake, kuitira kuti hinga kumutswa kakaizwa Kristu kubva ku akafa no rukudzo ra Baba ake, isusu tizoraramewo mu upenyu upsva. 5 Kana isusu takabatana naye pa rufu rakaezana no rake, zvezvirokwazvo tinozomutswawo naye hinga mushobo waakamutswa. 6 Ngokuti tinozviziya kuti unhu wedu we kare wakakhomerhwa pa mutanda pamwepo naye kuitira kuti mwiri wedu uno citema utame simba, kuti tisarumbwe tiri aranda o citema. 7 Ngokuti munhu wese unonga afa, asudzunurhwa* pa citema cake.
8 Kusiya izvona, kana takafa na Kristu, tinotenda kuti ticararamawo naye. 9 Ngokuti tinoziya kuti Kristu akamutswa kubva ku akafa, iyena aacafizve; rufu aricina simba paari. 10 Iyena akafa kamwe basi kuti afudze zvitema,* asi upenyu waanorarama zvino, ari kuurarama kuti aite kuda ka Mwari. 11 Hino imwimwiwo, dzionei hinga makafa ku citema, asi mecirarama kuti muite kuda ka Mwari nge ndaa ya Kristu Djesu.
12 Ngokudaro, musasiye citema cecirumbwa cecimutongai hinga mambo mu mwiri yenyu inofa kuti muteedzere zvido zvayo. 13 Uye musarumbwe mecipasa mwiri yenyu* ku citema hinga zvokurhwa nazvo zvisina unatsi, asi dzipirei kuna Mwari hinga anhu akamutswa kubva ku akafa, mecipasawo mwiri yenyu* kuna Mwari hinga zvokurhwa nazvo zve unatsi. 14 Ngokuti citema acidikani kumutongai, sezvo amuripi pasi pe mutemo, asi muri pasi pe nyasha dza Mwari.
15 Hino toti kudini? Toita citema ngokuti atiripi pasi po mutemo asi tiri pasi pe nyasha dza Mwari here? Haiwa! 16 Amuzvizii here? Kana mukadzipira ku munhu upi hake hinga muranda, imwimwi muri aranda ake ngokuti munomuzwira. Kudai muri aranda e citema, icona cinozomuuraisai, asi kudai muri aranda a Mwari mecimuzwira, munozogara anhu anoita zve unatsi. 17 Asi tinotenda Mwari ngokuti kunyazi hazvo mainga muri aranda e citema, makagara anhu anozwira zvecibva pa mwoyo kufundiswa kamakaizwa. 18 Ngokuti makasudzunurhwa pa uranda we citema, imwimwi makagara aranda e unatsi. 19 Ndiri kureketa hinga mareketero anoita anhu nge ndaa ye kusama kukwana ke nyama yenyu; ngokuti imwimwi makadzipira hinga aranda ekuita zviro zvisikazi kucena no zvisikatenderhwi nge mutemo zvinomuitisai kuti mutame kuzwira mutemo, zvino dzipirei hinga aranda e unatsi unotiitisa kuti tiite zviro zvicena. 20 Ngokuti pamainga muri aranda e citema, mainga musikadikani kuita zviro no unatsi.
21 Hino, pa nguwa iyona, ngaupi mugumisiro wamakagara nawo we zviito zvenyu? Makaita zviro zvinopsverusa dakara zvino. Ngokuti mugumisiro we zviro izvona i rufu. 22 Asi, ngokuti makasudzunurhwa mu citema, itai zvakanaka hinga aranda a Mwari, uye mugumisiro wazvo ngewe kuzogara no upenyu usikaperi. 23 Ngokuti mubairo we citema i rufu, asi cipo cinopaswa na Mwari ndi upenyu usikaperi eciseenzesa Kristu Djesu, Tenzi wedu.