Atesaronika Wecipiri

1 Inini Pauro na Sirvhano,* pamwepo na Timoti, ku ungano ye ku Atesaronika iri mu rubatano na Mwari Baba edu, na Tenzi Djesu Kristu:

2 Nyasha no runyararo zvinobva kuna Mwari Baba na Tenzi Djesu Kristu ngazvigare na imwimwi.

3 Hama, tinodikana kugara tecitenda Mwari nguwa dzese nge zvenyu. Izvi zvakasisira, ngokuti kutenda kenyu kuri kurumbwa kecikura nge mushobo unoshamisa uye rudo renyu ku umwe na umwe wenyu riri kutunhudzirika. 4 Nge ndaa yazvo, tinodada nemwi pakati pe ungano dza Mwari, nge ndaa ye kushingirira kenyu uye kutenda kamuri kupangidza kunyazi meciteererhwa uye no zvitsinzwa* zvamuri kubatana nazvo.* 5 Ici ndicona cipangidzo ce kutonga ke unatsi ka Mwari uye cicaita kuti muzwi makasisira kupinda mu Umambo wa Mwari, uya wamuri kuushuphikira.

6 Ngokuti zvakasisira kuna Mwari kutambudza aya anomutambudzai. 7 Asi imwimwi muri kutambudzwa, mucazorodzwa pamwepo na isusu pacapangidzwa Tenzi Djesu ecibva kudenga, no ngirozi dzake dzino simba, 8 mu murazvi we* muriro, paanouya kuzophanica aya asikazii Mwari no aya asikapurutani masoko akanaka anocokuita na Tenzi wedu Djesu. 9 Awona kamare acatsakatiswa nokusikaperi pamberi pa Tenzi uye pamberi po simba rake rakakura, 10 paanozouya kuti akudzwe no acena ake uye kuti ashamise aya anopangidza kutenda, ngokuti makatenda upupuri watakamupasai.

11 Tinogara tecimuitirai munamato no cinangwa ici, kuitira kuti Mwari wedu amuonei kuti munosisira kudainza kaakamuitai, uye no simba rake, aite zvese zvinomupfadza kuti mabasa enyu ese mu kutenda abudirire, 12 kuitira kuti zina ra Tenzi wedu Djesu rikudzwe mamuri, uye imwimwi muri mu rubatano naye, maererano no nyasha dza Mwari wedu uye no dza Tenzi Djesu Kristu.