Akatarhwa na Ruka

22 Painga pasara mazuwa manganani kuti paizwe Mutambo we Pau Dzisina Mbiriso, unodainzwa kuti Paskwa. 2 Uye atungamiriri e apristi no atari ainga ecipsvaka mushobo wakanaka we kumuuraya, ngokuti aithya anhu. 3 Hino Sathani wakapinda muna Djudhasi, waidainzwa kuti Iskariyoti, iyena wainga ari umwe we afundi 12, 4 uye iyena wakaenda kuno atungamiriri e apristi no akuru-akuru e tempro kuti arekete ngezve mushobo waaizomutengesa kaari. 5 Awona akapfara nazvo uye akapangana kuti aizomupasa mare yo prata. 6 Ngokudaro, iyena wakatenda uye wakatanga kupsvaka mukana wakanaka we kumutengesa kaari pasina anhu akawanda.

7 Rakaguma zuwa ro Mutambo we Pau Dzisina Mbiriso, zuwa raidikana kuizwa cibairo ce Paskwa; 8 hino Djesu akatuma Pedru na Juau, oabvunza kuti: “Endai koogadzirira Paskwa kuti tirhye.” 9 Afundi akamubvunzisa kuti: “Munoda kuti tigadzirire kupi kokurhyira Paskwa?” 10 Djesu akaabvunza kuti: “Purutanai! Pamunopinda mu thaundi, mucasongana no mwanarume umweni wakathwara hari yo dongo ino mvura. Muteerei mu nyumba yaanopinda. 11 Uye bvunzai muridzi we nyumba kuti: ‘Mufundisi abhuya kuti: “Iri kupi nyumba ye kutambira arendo yandingarhyira Paskwa no afundi angu?”’ 12 Uye iyena acamupangidzai nyumba huru ye pamusoro, ino zvese zve kuseenzesa. Tigadzirirei imona.” 13 Hino afundi akaenda uye akagumira zvese hinga zvainga zvabhuiwa na Djesu, uye akagadzirira Paskwa.

14 Nguwa payakakwana, Djesu akagara pa meza no aphostori ake. 15 Uye iyena akaabvunza kuti: “Ndaida maningi kurhya na imwimwi Paskwa ii ndisati ndatambudzika; 16 ngokuti ndinomubvunzai kuti, andizoirhyizve dakara yadzadziswa mu Umambo wa Mwari.” 17 Iyena akatambira kopo, oita munamato uye akati: “Torai kopo ii uye tambidzanai, 18 ngokuti ndinomubvunzai kuti kubvira zvino kuenda mberi, andicamwizve mucero we muuvha dakara Umambo wa Mwari waguma.”

19 Iyena akatora pau, oita munamato, pedzepo akaigura-gura, oipasa afundi ake eciti: “Pau ii inoimirira mwiri wangu, unozoizwa cibairo kuti mubetsereke. Rumbwai meciita izvi kuti mundiedzurire.” 20 Mumasure me kupedza kurhya, iyena akaitawo zvimwezvo no kopo, paakapedza kurarira, eciti: “Kopo ii inoimirira citenderano cipsva peciseenzeswa ngazi yangu, icadururhwa kuti mubetserhwe.

21 “Asi ziyai kuti uya acanditengesa ari pamwepo na inini pa meza. 22 Izvirokwazvo kuti Mwana we munhu ari kuenda, hinga zvakatarhwa nge zvake; asi une nyathwa munhu anomutengesa!” 23 Ngokudaro, awona akatanga kubvunzisana kuti ndiani wawo waizoita izvona.

24 Afundi akatangazve kureketedzana nge zvekuti ndiani mukuru pakati pawo. 25 Asi iyena akaabvunza kuti: “Atongi e madzinza amweni anotonga anhu awo nge mushobo waanoda, uye akuru-akuru e anhu anodainzwa kuti Anhu Akanaka. 26 Imwimwi amudikani kuita kudaro. Asi mukuru pakati penyu ngaaite hinga mudoko, uye uya anotungamirira anodikana kugara hinga munhu anoseenzera amweni. 27 Hino mukuru ndiani, uya akagara pa meza kana kuti uya ari kumuseenzera? Andiepi uya akagara pa meza? Asi inini ndiri pakati penyu hinga uya ari kumuseenzerai.

28 “Kunyazi zvakadaro, imwimwi ndimwi magara na inini pa miedzo dzangu; 29 uye inini ndiri kuita citenderano ce umambo na imwimwi, hinga Baba angu akaitawo cintenderano na inini, 30 kuitira kuti imwimwi murhye no kumwa pa meza yangu mu Umambo wangu, uye kuti mugare pa zvigaro zve umambo kuti mutonge madzinza 12 e Israeri.

31 “Simoni, Simoni, izwa basi! Sathani unoda kuti mwese imwimwi mupepethwe hinga trigu. 32 Asi ndinorumbwa ndecikuitira munamato we kudeketera kuti kutenda kako kusarembe; uye iwewe kana ukahwirira, bambisa hama dzako.” 33 Uye Pedru wakati kaari: “Ndakagadzirira kuenda mu kadheya, kunyazi kutofa na imwimwi.” 34 Asi iyena akati: “Pedru, ndinokubvunza kuti, djongwe arizoriri nyamasi usati warambira katatu kuti unondiziya.”

35 Iyena akaabvunzazve kuti: “Pandakamutumai musina cibudu ce kukandira mare, cibudu ce kukandira zvokurhya uye masandarya, ciripo camakashoterhwa naco here?” Awona akadaira kuti: “Apana!” 36 Hino iyena akaabvunza kuti: “Asi zvino, uya ano cibudu ce kukandira mare, ngaacitore; uya ano cibudu ce kukandira zvokurhya ngaacitorewo; uyewo uya asina supada, ngaatengese djira rake kuti atenge supada imwe. 37 Ngokuti ndinomubvunzai kuti zvinodikana kudzadzika pandiri zvakatarhwa kuti: ‘Iyena akabatanidzwa pa cikwata ce ashaishi.’ Honde, izvi zviri kudzadzika pandiri.” 38 Afundi akamubvunza kuti: “Tenzi, tino masupada mairi pano.” Iyena akaadaira kuti: “Anokwana.”

39 Paakabuda, iyena akaenda ku Dunhu re Miorivhi, hingana zvaaigara eciita, uye afundi akamuteerawo. 40 Paakaguma, iyena akaabvunza kuti: “Rumbwai meciita munamato kuti musawire pa muedzo.” 41 Iyena akabuda paainga ari oenda pa mukuwo unoguma buwe kana rikakhandirhwa, ogodama uye otanga kuita munamato, 42 eciti: “Baba, kana mecida, bvisai kopo ii kandiri. Ngakusaizwe kuda kangu, asi kuda kenyu.” 43 Hino pakauya ngirozi yecibva kudenga uye yakamubambisa. 44 Asi ngokuti iyena ainga akatsukwara maningi, akarumbwa eciita munamato no mwoyo wese; uye ziya rake rakaita hingana ngazi recidonha pasi. 45 Paakamuka mumasure me kuita munamato, iyena akaenda kuno afundi, akaagumira akawata, ngokuti ainga akaremba nge kutsukwara. 46 Iyena akaabvunza kuti: “Ngei muri kuwata? Mukai uye rumbwai mecinamata, kuti musawire pa muedzo.”

47 Paainga ecireketa, pakaguma anhu akawanda, uye mwanarume waizwi Djudhasi, umwe we afundi 12, ndiye wainga ari mberi kawo, wakakhwedera kuna Djesu kuti amupsvode. 48 Asi Djesu akamubvunzisa kuti: “Djudhasi, iwewe uri kutengesa Mwana we munhu nge kumupsvoda here?” 49 Aya ainga aripo paakaona zvainga zvecida kuitika akati: “Tenzi, tinodikana kuarhwisa no supada here?” 50 Umwe wawo wakatogura nzee ye moko kwawo ye muranda we mupristi mukuru. 51 Asi Djesu akadaira kuti: “Zvakwana.” Uye akabata nzeeyo, omuporesa. 52 Djesu akabvunza atungamiriri e apristi, akuru-akuru e tempro no akuru ainga aenda koomubata kuti: “Imwimwi mauya koondisunga mune masupada no mipini hingana kuti ndiri mbavha? 53 Pandainga ndinemwi mu tempro zuwa no zuwa, imwimwi amuzi kundisunga. Asi ino i nguwa yenyu uye nguwa ye masimba e cidima.”

54 Hino akasunga Djesu, omutora, oenda naye ku nyumba ke mupristi mukuru; asi Pedru waiteera nge cekure. 55 Paakabakidza muriro pakati pe ruwanze uye ogara pamwepo, Pedru wakagarawo pakati pawo. 56 Muranda umweni we mwanakadzi, paakamuona wakagara ecigota muriro, wakanyasa kumuringira uye wakati: “Mwanarume uu waihambawo naye.” 57 Asi Pedru wakarambira eciti: “Yaya, inini andimuzii.” 58 Mumasure me kacinguwa, munhu umweni wakamuona uye wakati: “Iwewewo ndiwe umwe wawo.” Asi Pedru wakati: “Mukoma, andinipi.” 59 Mumasure me kudarika nguwa imwe, mwanarume umweni wakauya uye wakarumbwa ecireketa nge zvazvo eciti: “Zvezvirokwazvo mwanarume uu wainga anayewo, ngokuti zviri pamhene kuti ngewe ku Garireya!” 60 Asi Pedru wakati: “Mukoma nai, andizvizii zvamuri kureketa.” Uye ciriporipoco paainga aciri kureketa, djongwe rakarira. 61 Ngokudaro, Tenzi akatendeuka uye akanyasa kuringira Pedru, uye Pedru wakaedzurira zvainga zvabhuiwa na Tenzi kuti: “Nyamasi, djongwe risati rarira, iwewe ucandiramba katatu.” 62 Hino iyena wakabuda uye wakatanga kucema* maningi.

63 Anhu ainga akasunga Djesu akatanga kumushora, ecimuponda; 64 uye mumasure me kumufukidza ku hope, awona aibhuya kuti: “Phorofita! Ndiani akuponda?” 65 Uye aimubvunzazve zviro zvakawanda maningi ecimutuka.

66 Pakainga kaedza, pakaungana dare re akuru e anhu, atungamiriri e apristi no atari, akamutora oenda naye ku Sinedriyo uye akati: 67 “Kana uri Kristu, tibvunze.” Asi Djesu akaabvunza kuti: “Kunyazi ndikamubvunzai, imwimwi amundotendi basi. 68 Uyezve, kana ndikamuitai mibvunzo, imwimwi amungandidairi. 69 Asi kubvira zvino kuenda mberi, Mwana we munhu anonga akagara ku moko kwawo uno simba wa Mwari.” 70 Ngokudaro, ese akamubvunzisa kuti: “Hino, iwewe ndiwe Mwana wa Mwari?” Iyena akaadaira kuti: “Ndimwi muri kutozvibhuya kuti ndiri Mwana wa Mwari.” 71 Awona akati: “Ticadireizve upupuri umweni? Isusu tapera kumuzwa ecizvibhuya ega.”