Masoko Okutanga
Bhaibheri rakatarhwa mu Cihebheru, Ciaramaiko uye mu Cigregro, Mwari akafemera anhu kuti aritare. Kuti “anhu ese” abetsereke no Soko ra Mwari, Matarhwa anodikana kuturikirhwa mu mireketero yakawanda. (Mateu 24:14) Mabhuku 27 kubvira pa bhuku ra Mateu dakara bhuku ra Zvakapangidzwa, anodainzwa kuti “Matarhwa e Cigrego e Cikristu” ngokuti awona akatarhwa mu Cigrego no Akristu akafemerhwa e zana re makore rekutanga K.A.
Bhaibheri re Nyika Ipsva re Matarhwa e Cigrego e Cikristu rakatanga kuoneka mu Cingezi muna 1950. Irona rakaturikirhwa pecinyanya kuseenzeswa matarhwa e Cigrego a Westcott na Hort, awo anoenderana no matarhwa e Cigrego e kare-kare. Aturikiri e Bhaibheri re Nyika Ipsva akaita zviri zvese kuti asacinje ciro cipi haco ciri mu matarhwa e Cigrego. Bhaibheri rino ro Ciutee rakaturikirhwa kubva mu Bhaibheri re Cingezi rakabudiswa muna 2013, uye pakaizwa zviri zvese kuti paizwe hinga zvakaizwa no Cingezi.
Zina ra Mwari rokuti Djehovha, rinooneka kanokwana 237 mu Bhaibheri re Nyika Ipsva re Matarhwa e Cigrego e Cikristu. Ngokuti kuceneswa ke zina ra Mwari uye kuridainzira kunokosha maningi kuti anhu aponeswe, Bhaibheri iri rakahwirinzazve zina rokuti Djehovha mu mbuto yarainga riri.—Mateu 6:9; Aroma 10:13.
Zina rokuti Bhaibheri re Nyika Ipsva, rakatsamira pa cipikirhwa ca Mwari cekuti kucaoneka nyika ipsva yo unatsi icabetsera anhu ese. (2 Pedru 3:13) Anhu akaturikira Bhaibheri iri, anoda maningi muridzi we Bhaibheri. Awona aizviziya kuti ainga ano basa rakakura rokuturikira marangariro no masoko a Mwari ngo mushobo wakanaka. Tinonamata kuti Bhaibheri iri ribetsere aerengi aro ano mwoyo yakanaka uye anopeta masimba kuti “agume pa kugara no ruziyo re zvirokwazvo pamusoro pe cokwadi.”—1 Timoti 2:4.