Mozesi Wakasanangura Kunamata Djehovha

Iwewe uciri kuedzurira here kuti mhuri ya Djakobo yakaenda koogara ku Edjipitu? Ikona, mhuri yake yakatanga kukura uye awona akaziikanwa hingana Aisraeri. Paa padarika nguwa, mumasure mekuti Zuzee afa, Faraoo mupsva wakagara mambo we Edjipitu. Iyena wakathya maningi paakaona kuti Aisraeri ainga akawanda kudarika Aedjipitu. Ndiyo ndaa, wakabambidzira Aisraeri kuti aseenze mu minda uye aite matijoro. Asi azvizi kubetsera ciro. Hino, Faraoo wakaita kuti ana ese e anarume aizobarhwa e Ciisraeri auraiwe. Pamweni Aisraeri akathya maningi, andizvopi?

Pa nguwa iyona, mwanakadzi umweni we Ciisraeri waizwi Jokebhedhi wakabara mwana wakarungama maningi. Kuti Faraoo asauraye mwanawo, Jokebhedhi wakamukanda mu sesto uye wakamukanda pakati pe shango rainga riri mu Murambo we Niro. Hama ye kamwaneko yaidainzwa kuti Miriyaa yakarumbwa iri pa dhuzepo kuti ione kuti cinyi caizoitika.

Hino, mwana we mwanakadzi wa Faraoo wakaenda koosamba ku Murambo we Niro. Paakaguma ikona, wakaona mwana mu sesto ecicema uye wakamuzwira usisi. Miriyaa wakaenda kuno mwana we mwanakadzi wa Faraoo uye wakamubvunzisa kuti: ‘Munoda kuti ndidainze mwanakadzi kuti amucengeterei mwanewo here?’ Mwana we mwanakadzi wa Faraoo wakadaira kuti honde. Hino Miriyaa wakaenda koodainza mai ake kamare, Jokebhedhi. Mwana we mwanakadzi wa Faraoo wakabvunza Jokebhedhi kuti: ‘Tora mwana uu undicengetere, uye inini ndicakuripa nge ndaa yazvo.’

Mwanewo paakakura padoko, Jokebhedhi wakamutora uye wakaenda koopasa mwana we mwanakadzi wa Faraoo. Mwana we mwanakadzi wa Faraoo wakadainza mwanewo kuti Mozesi uye wakamucengeta hingana mwana wake kamare. Mozesi wakarerhwa hinga mwana wa mambo uye waizokwanisa kugara no zvese zvaaida. Asi Mozesi aazi kumbokanganwa Djehovha. Iyena waiziya kuti wainga ari Muisraeri, haiwa Muedjipitu. Uye wakasanangura kugara no anhu a Djehovha.

Paainga ano makore 40, Mozesi wakasanangura kubetsera anhu ake. Zuwa rimweni, iyena wakaona Muedjipitu eciponda Muisraeri. Apona, Mozesi wakaponda Muedjipitu, asi wakamuponda maningi zvekuti Muedjipitu uu wakafa. Hino wakafushira Muedjipitu uu mu mataka. Asi Faraoo wakazviziya uye wakaedza kuuraya Mozesi. Ndiyo ndaa, Mozesi wakatiza ecienda ku mbuto inodainzwa kuti Midhiyani. Asi Djehovha akarumbwa ecimucengeta.