Rakabhi Wakafisa Avhevhi

Avhevhi paakaguma ku Djeriko, awona akagara pa nyumba pe mwanakadzi umweni unozwi Rakabhi. Asi mambo wakazviziya uye wakatuma masurudado kuti aende kumba ka Rakabhi kuti asunge avhevhi. Masurudado paakaguma, Rakabhi wakabvunza avhevhi kuti afindare. Pedzepo, iyena wakabvunza masurudado kuti: ‘Avhevhi ainga ari pano, asi awona aenda. Gogomai, pamweni mungakwanisa kuabata.’ Mumasure mekuti masurudado aenda, Rakabhi wakabvunza avhevhi kuti: ‘Inini ndinozviziya kuti Djehovha anoda kupasa thaundi re Djeriko ku Aisraeri. Nge ndaa yazvo, inini ndicamubetserai. Asi ndapota, pikai kuti mucaponesa mhuri yangu.’

Avhevhi akabhuya kuti: ‘Isusu tinopika kuti ese anonga ari mumba mako acaponeswa. Iwewe unodikana basi kusungira bote re kupsvuka pa janera.’

Hino, avhevhi akabuda nge pa janera uye akaenda koofindara ku matunhu ke mazuwa matatu. Mumasure mazvo akaenda koosongana na Djoshuwa. Aisraeri akabira Murambo we Djorodhani mumasure mekuti izvi zvaitika. Thaundi rekutanga rakarhwisana no Aisraeri i Djeriko. Djehovha akabvunza Aisraeri kuti atenderere thaundi kamwe pa zuwa. Awona akaita izvona ke mazuwa anokwana kuita 6. Pa zuwa re ci 7, awona akatenderera thaundi kanokwana kuita 7. Apristi akaridza matrombeta uye Aisraeri akakhuwa no simba rawo rese. Pedzepo, muru dze Djeriko dzakahidhika! Asi nyumba ya Rakabhi yaigara pamusoro pe muru we thaundi aizi kuwa. Rakabhi wakagonda Djehovha uye wakaita zvaakabvunzwa no avhevhi. Nge ndaa yazvo, iyena no mhuri yake akapona.