Cipikirhwa ca Djeftee

Aisraeri akasiyazve kunamata Djehovha uye oenda koonamata madzimwari e kunyepa. Asi madzimwari aya e kunyepa aazi kubetsera Aisraeri paakauya koorhwiswa no Aamoni. Ke makore akawanda Aisraeri aazi kubudirira. Asi zuwa rimweni awona akabhuya kuti: ‘Djehovha zvatakaita zvakashata. Tapota, tibetserei.’ Hino, Aisraeri akatsakatisa mifanikiso ye madzimwari e kunyepa uye akatangazve kunamata Djehovha. Ndiyo ndaa, Djehovha aida kuabetsera.

Kuti awine hondo dzaairhwisana no Aamoni, anhu akasanangura musurudado waidainzwa kuti Djeftee kuti aatungamirire. Asi asati aenda ku hondo, Djeftee wakagondesa Djehovha kuti: ‘Kana isusu tikawina Aamoni, munhu ucatanga kubuda kuti auye koonditambira, acamuseenzerai mu tabhernakuro ke upenyu wake wese.’ No rubetso ra Djehovha, Aisraeri akawina hondo.

Djeftee paakahwirira, munhu wokutanga wakabuda pa nyumba pake, wainga ari mwana wake. Iyena waitamba uye wairidza ciridzwa cinozwi pandero. Djeftee wakaedzurira zvaainga apikira uye wakarhwadziwa ngokuti wainga asina mwana umweni. Pari zvino, iyena waizoitei? Iyena wakabhuya kuti: ‘Mwana wangu! Inini ndakapika kuna Djehovha. Nge ndaa yazvo, inini ndicakuendesa ku Siro kuti useenze mu tabhernakuro.’ Mwana wa Djeftee wakadaira eciti: ‘Baba, kana imwimwi makapika izvona, imwimwi munodikana kuzvidzadzisa. Asi ndisati ndaenda, ndiri kuda kumukumbirai ciro cimwe. Inini ndiri kuda kugara mwedzi miiri no shamwari dzangu ku matunhu.’ Mwana wa Djeftee wakaseenza mu tabhernakuro ke upenyu wake wese. Shamwari dzake dzaienda kamwe pa gore koomuvhakacira.