Naamani no Kamusikana ke Ciisraeri

Kure no Israeri, mu nyika yaizwi Siriya, kaigara kamusikana ke Ciisraeri. Iyena wakatorhwa no cikwata ce anyahondo ce Asiriya uye wakaendeswa kure ne mhuri yake. Kamusikana ikona, kakatanga kuseenza pa nyumba pa Naamani umwe we akuru e anyahondo e Asiriya. Ikona, kamusikaneko ndikona basi kainamata Djehovha.

Naamani wainga ano nhenda yo mapere yairhwadza maningi. Kamusikaneko kaida maningi kumubetsera. Hino ikona kakabvunza mukadzi wa Naamani kuti: ‘Inini ndinoziya munhu ungarapa mwamuna wenyu. Ku Israeri kuno muphorofita umweni wa Djehovha wai zwi Erizeu. Iyena ungarapa mwamuna wenyu pa nhenda ii.’

Mukadzi wa Naamani wakapanganidzira mwamuna wake zvaainga abvunzwa. Naamani waida maningi kuporeswa. Hino wakaenda kumba ka Erizeu ku Israeri. Ngekuti Naamani waidziona hinga mwanarume unokosha maningi, iyena waietsera kuti Erizeu aende koocedza naye. Asi zvezvirokwazvo, Erizeu wakatuma museenzi wake kuti aende koobvunza Naamani kuti: ‘Enda ku Murambo we Djorodhani uye dzinyike imona kanokwana kuita 7. Kana ukadaro ucaporeswa.’

Naamani aazi kuzvipfarira. Iyena wakati: ‘Inini ndairangarira kuti muphorofita uu waizondirapa eciita munamato kuna Mwari uye ecikanda nyara dzake pandiri. Kusiya izvona, iyena urikundituma kuti ndiende ku murambo uri muno mu Israeri. Mirambo ye ku Siriya yakanaka maningi kupinda ye ku Israeri. Ngei iyena aazi kundituma kuti ndiende ku mirambo ye Asiriya?’ Naamani wakanyangadzwa maningi uye wakabuda panyumba pa Erizeu.

Aseenzi a Naamani akacedza naye eciti: ‘Imwimwi maiti maizoita zvese kuti muporeswe. Ngei amuedzi kuita zvabhuiwa no muphorofita? Zviri kuita hingana zviri nyore.’ Naamani wakaita zvese zvaakabvunzwa no aseenzi ake. Iyena wakaenda ku murambo we Djorodhani uye wakadzinyika kanokwana kuita 7. Paakabuda mu mvura keci 7, iyena wakaona kuti wainga aporeswa. Iyena wakapfara maningi uye wakahwirira kuti atende Erizeu. Naamani wakabhuya kuti: ‘Pari zvino, ndaakuziya kuti Djehovha ndi Mwari we zvirokwazvo.’ Rangaridzai kuti kamusikana ke Ciisraeri kakapfara kudini pakakaona Naamani ecihwirira kumba aporeswa zvezvirokwazvo.