Ngirozi ya Djehovha Yakadziirira Ezekiya

Umambo we Asiriya wainga wakunda umambo we Israeri we madzinza gumi uye pari zvino, wainga waakuda kutora umambo we Djudha we madzinza mairi. Senakeribhi, mambo we Asiriya waipamba mathaundi e Djudha, rimwe na rimwe. Asi, Djerusarema ndiro thaundi raainyanya kuda. Asi, Senakeribhi wainga asikazii kuti Djehovha aidziirira Djerusarema.

Ezekiya, mambo we Djudha wakapasa Senakeribhi mare yakawanda maningi kuti asatore Djerusarema. Senakeribhi wakatora mareyo, asi kunyazi zvakadaro, iyena wakatumira masurudado ake ainga ano simba kuti arhwise Djerusarema. Anhu ainga ari mu thaundi irona akatanga kuthya, ngokuti Asariya airumbwa ecikwedera dhuze no thaundiro. Hino, Ezekiya wakabvunza anhu kuti: ‘Musathye. Asiriya ano simba, asi Djehovha acaita kuti tigare no simba kudarika rawo.’

Senakeribhi wakatuma muimiriri wake waizwi Rabhisheki kuti aende ku Djerusarema. Paakaguma ikona, iyena wakaima kunza ko thaundi uye wakatanga kuseka anhu e mu Djerusarema. Iyena wakakhuwa eciti: ‘Djehovha aakwanisi kumubetserai. Ezekiya uri kumunyeperai. Apana Mwari ungadziirira thaundi rino mu nyara dzangu.’

Ezekiya wakabvunzisa Djehovha kuti zvinyi zvaaidikana kuita. Djehovha akadaira eciti: ‘Musathye zvabhuiwa no muimiriri uu. Senakeribhi aazokwanisi kurhwisa Djerusarema.’ Pa nguwa doko basi, Ezekiya wakatambira tsamba dzakawanda dzakabva kuna Senakeribhi. Tsambedzo dzaibhuya kuti: ‘Tizai henyu. Djehovha aakwanisi kumuponesai.’ Ipona, Ezekiya wakanamata eciti: ‘Ndapota Djehovha, tiponesei; madzinza ese acaziya kuti ndimwi Mwari we zvirokwazvo.’ Djehovha akadaira Ezekiya eciti: ‘Mambo we Asiriya aazokwanisi kupinda mu Djerusarema. Inini ndicadziirira thaundi rangu.’

Hino, anyahondo e Asiriya akagara mu muceto me muru we Djerusarema. Senakeribhi wairangarira kuti waizokwanisa kupinda mu thaundi re Djerusarema. Hino unoziya kuti zvinyi zvakazoitika? Pa usiku iwona, Djehovha akatuma ngirozi kuti iende mu matenda e Asiriya uye ngiroziyo yakauraya masurudado anokwana kuita 185 000. Mambo Senakeribhi wakaruza masurudado ake ese ainga ano simba maningi. Ciro caaidikana kuita basi, i kuhwirira kumba. Djehovha akaita zvaainga agondesa, akadziirira Ezekiya uye Djerusarema. Kudai iwewe wainga uri mu Djerusarema, waizogonda na Djehovha here?