Erizabheti Unobata Pamwiri

Paa padarika makore 400 muru we Djerusarema waa wawakwa, mupristi umweni waizwi Zakariya no mukadzi wake Erizabheti aigara dhuze no thaundi irona. Awona ainga akawakana ke makore akawanda, asi ainga asina ana. Zuwa rimweni, Zakariya wakapinda mu mbuto cena ye tempro kuti apise rusenzi, hino ngirozi Gabriyeri yakauya kaari uye Zakariya wakathya maningi, asi ngirozi yakati: ‘Usathye Zakariya. Djehovha andituma kauri kuti ndikupase masoko akanaka. Mukadzi wako ucagara no mwana uye iyena ucazwi Juau. Djehovha asanangura Juau kuti aite basa rinokosha.’ Asi, Zakariya na Erizabheti ainga acembera maningi kuti agare no ana. Hino, Zakariya aazi kutendera zvaainga abvunzwa no ngirozi. Pedzepo, ngirozi yakati: ‘Mwari ndiye andituma kuti ndikubvunze masoko aya. Hino ngekuti auzi kutendera zvandakubvunza, ucagara cimumu dakara mwanewo wabarhwa.’

Zakariya wakagara nguwa yakareba ari mu mbuto cena ye tempro. Iyena paakazobuda, anhu ainga ari kunza aida kuziya kuti zvinyi zvainga zvaitika. Zakariya wainga asikacakwanisi kureketa, asi waireketa eciseenzesa nyara. Hino, anhu akakwanisa kuona kuti Zakariya wainga atambira masoko a Mwari.

Nokuhamba ke nguwa, Erizabheti wakazogara no pamwiri uye wakabara mwana we mwanarume hinga zvainga zvarekethwa no ngirozi. Shamwari dzake no anyaukama ake akapfara maningi uye akauya koona mwana. Erizabheti wakabhuya kuti zina ro mwanewo raizozwi Juau. Asi awona akabhuya kuti: ‘Akuna munhu we anyaukama ako ano zina rinozwi Juau. Asi mudainze kuti Zakariya. Iri i zina ra baba ake.’ Uye Zakariya Wakabata citabwa uye wakatara kuti: ‘Zina rake ricazwi Juau.’ Pa nguwa iyona, Zakariya wakahwirirazve kureketa! Anhu ese aigara ku Djudhiya akaziya zvainga zvaitika uye airangarira kuti: ‘Kodi mwana uu ucagara munhu wakaita kudini?’

Hino, Djehovha akaita kuti Zakariya adzadzwe no mwiya mucena. Uye Zakariya wakati: ‘Djehovha ngaakudzwe. Iyena akagondesa Abrahamu kuti aizotuma Mesiya muponesi kuti azotinunure. Juau ucagara muphorofita uye basa rake ricagara rekugadzirira anhu pa kuguma ka Mesiya.’

Pane ciro cimweni cinokosha cakaitikawo na Mariya nyaukama wa Erizabheti. Zvinyi zvakaitika? Ticazviona mu fundo inoteera.