Djesu Akadzipangidza ku Afundi Ake

Paa padarika mazuwa, Pedru wakaenda kooedza howe ku Bahari ro Garireya. Tomaji, Tiyago, Juau, uye no afundi amweni akaendawo naye. Awona akapedza usiku wese eciedza, asi aazi kukwanisa kubata ciro.

Macibesi-besi e zuwa rakazoteera, awona akaona mwanarume umweni akaima ku n’ombera ke Bahari. Mwanarumewo wakadainzira eciti: ‘Pano howe dzamabata here?’ Awona akadaira kuti: ‘Haiwa.’ Pedzepo, mwanarumewo wakabhuya kuti: ‘Khandirai maricera ku dii ro moko kwawo wo bharko.’ Afundi paakaita izvona, maricera awo akadzara no howe, zvekuti ainga asikacakwanisi kuakweera kunza. Juau waziya kuti mwanarume uya ainga ari Djesu uye wakabhuya kuti: “Ndi Djesu!” Pedru wakamhukira mu bahari wosambirira ecienda kuna Djesu. Afundi amweni akazoteerawo ari mu bharko.

Afundi paakaguma ku muceto ke bahari, akaona pau ne howe dziri pa muriro. Djesu akabvunza afundi ake kuti aunzisezve howe dzimweni kuti akoce. Hino, iyena no afundi ake akatanga kurhya.

Pedzepo, Djesu akabvunza Pedru kuti: ‘Unondida here kupinda howe?’ Pedru wakati: ‘Honde, munozviziya kuti ndinomudai.’ Djesu akati: ‘Hino, rhyisa zvimabira zvangu.’ Djesu akabvunzisazve kuti: ‘Pedru unondida here?’ Pedru wakati: ‘Tenzi, munoziya kuti ndinomudai.’ Djesu akati: ‘Usha mabira angu.’ Djesu akabvunzisazve Pedru kecitatu kuti: ‘Unondida here?’ Pedru wakatsukwara uye wakadaira kuti: ‘Tenzi munoziya zvese. Imwimwi munoziya kuti ndinomudai.’ Pedzepo, Djesu akabvunza Pedru kuti: ‘Usha mabira angu uye rumbwa uri mufundi wangu.’