Awona Akaparidzira no Ushingi

Mwanarune umwni wainga akaremara waigara mazuwa ese pa misuwo ye tempro kuti akumbire mare. Zuwa rimweni, Pedru na Juau akaenda ku tempro uye mwanarumewo wakaakumbira mare. Hino, Pedru wakamubvunza kuti: ‘Inini ndinokupasa ciro cakanakisisa cinopinda mare. Mu zina ra Djesu ndinoti, muka uhambe!’ Hino, mwanarumewo wakatanga kuhamba. Akawanda akaona izvona akashamiswa uye akagara ateeri a Djesu.

Asi apristi no Asadhusi akanyangadzwa maningi uye akaatora kuti aende nawo ku anyautongi. Awona akabvunzisa Pedru na Juau kuti ndiani ainga aapasa simba re kuporesa mwanarumewo. Pedru wakaadaira kuti: ‘Ndi Djesu uya wamakauraya.’ Apristi no Asadhusi akaabvunza kuti ainga asikadikanizve kureketa ngezva Djesu. Asi Pedru na Juau akabhuya kuti: ‘Atimboimi. Tinodikana kuparidzira ngezva Djesu.’

Mumasure mekuti Pedru na Juau asudzunurhwa, akaenda koopanganidzira zvainga zvaitika ku afundi amweni. Ese pamwepo akanamata ecibvunza Djehovha kuti: ‘Djehovha tapota tibetserei kuti tirumbwe teciita basa renyu.’ Hino Djehovha akapasa mwiya mucena ku afundi uye akarumbwa eciparidzira no ushingi uye eciporesa. Numero yo afundi yairumbwa yecitunhudzirika. Asadhusi aazi kuzvipfarira. Ipona awona akasunga aphostori. Asi ce usiku ngirozi ya Djehovha yakafunungura misuwo dze kadheya uye yakaabvunza kuti: ‘Hwirirai ku tempro uye rumbwai mecifundisa ikona.’

Pa zuwa rakazoteera, Asadhusi akazia kuti aphostori ainga abuda mu kadheya uye kuti aifundisazve mu tempro. Ndiyo ndaa, awona akasungwazve uye akaendeswa ku tribhunari. Mupristi mukuru wakabhuya kuti: ‘Atizi here kumurambidzai kuti musabhuye ngezva Djesu?’ Asi Pedru no aphostori amweni akadaira eciti: “Pakutanga tinodikana kuzwira Mwari hinga mutungamiriri pane kuzwira anhu.”

Anyautongi akanyangadzwa maningi zvekuti aida kuuraya aphostori. Asi Mufarisi umweni waidainzwa kuti Gamariyeri wakabhuya kuti: ‘Ngwarirai, zvingaita kuti Mwari arikutsigira anhu aya. Muri kuda kurhwisana na Mwari here?’ Anyautongi akazvitendera uye akasiya aphostori kuti aende. Asi akaaponda uye akaabvunzazve kuti aadikani kuparidzira. Kunyazi zvakadaro, aphostori akagara no ushingi. Mazuwa ese awona airumbwa ecifundisa mu tempro uye pa nyumba no nyumba.