“Nyika Icagara Paraizo”

Djehovha akagondesa kuti: ‘Apacazoonekizve kutsukwara, kurhwadziwa, kurhwara uye rufu. Inini ndicapukuta misodzi mu madziso e anhu ese. Uye apanazve ucaedzurira zviro zvakashata.’

Djehovha aida kuti Adhamu na Evha ararame ecipfara uye ane runyararo mu munda we Edheni. Awona aidikana kunamata Mwari uye kubara ana akawanda kuti adzadze nyika. Adhamu na Evha aazi kuzwira Djehovha, asi iyena acirikuda kuti nyika igare paraizo. Mu bhuku rino, taona kuti Mwari anodzadzisa zvese zvaakapikira. Umambo wa Mwari ucaunzisa zviro zvese zvakanaka pa nyika hinga zvaainga akagondesa Abrahamu.

Dhiyabhurosi ne madhimoni uye no ese aya anoita zviro zvakashata, mbai-mbai pano acatsakatiswa. Anhu ese ari kudenga no pa nyika acanamata Djehovha. Akuna munhu acarhwara kana kuti kufa. Mazuwa ese, ticamuka tecipfara uye tine uthongo wakanaka. Nyika icacinja kuti igare paraizo. Anhu ese acagara no zvekurhya zvakawanda uye acagara mu nyumba yakacengeteka asina cekuthya. Kunonga kusisinazve anhu anoita zvakashata kana kuti anokuwadza amweni. Zvinyama azvizothyizve anhu uye isusu atizozvithyi.

Makamborangaridza here kuti zvicange zvakanaka kudini, Djehovha paacatanga kumutsa anhu akafa? Isusu ticakwanisa kuziya anhu ekuti akamborarama mu nguwa dze kare akaita hingana Abheri, Nowa, Abrahamu, Sara, Mozesi, Rute, Esteri, uye Dhavhidhi. Awona acabetserawo kucinja nyika kuti igare paraizo. Ticagara no basa rakawanda rekuita.

Djehovha anoda kuti imwimwi mugare mu Paraizo. Zvinoshupha kutorangaridza kuti zviro zvingana zvaticafunda ngezva Mwari. Hino, zuwa ne zuwa tunhudzirai ushamwari wenyu na Djehovha, kana mukadaro imwimwi mucakwanisa kugara shamwari yake nokusikaperi!