Munganyasa Kubetsereka Kudini no Kabhuku Kakazwi Kuongorora Magwaro Zuva Nezuva?

Imwimwi muno mukhaindi here we kuerenga tsamba yo Bhaibheri no masoko ari pa kabhuku kakazwi Kuongorora Magwaro Zuva Nezuva? Kana musikaerengi, zvakadini kuzvibatanidzawo pa urongwa wenyu mazuwa ese? Anhu ajinji anoerenga tsamba yo zuwa ce macibesi kuitira kuti anyase kurangarira pa zuwa rese nge zviya zvaanonga aerenga. (Djos 1:8; Mapis 119:97) Imwimwi munganyasa kubetsereka kudini no zvinofundiswa no Tsamba yo zuwa? Rimwe zano nge re kuerenga masoko ese anobatanidza tsamba ye Bhaibheri. Izvi zvinobetsera kuzwisisa masoko akhona ngo mwazvo. Cimwenizve camungaita nge cekurangarira umwe muezaniso we mu Bhaibheri unocokuita no tsamba yo zuwa. Pedzepo senzesai mu upenyu menyu zviya zvamafunda. Kana Soko ra Mwari rikapindira mu zvisananguro zvenyu, irona ricatungamirira upenyu wenyu uye ricanyasa kumubetserai.—Mapis 119:105.

Mhuri dze Bheteri dze nyika yese dzinofunda pamwepo Tsamba yo zuwa pa kurhya ko macibesi. Mu makore ano, kufunda uku kunoizwa no mhuri dze Bheteri kunosogaravharhwi uye kokandwa mu saiti JW Broadcasting^® pa cikwata ce mavhidhiyo cakazwi MAPROGIRAMU UYE ZVINOITIKA ZVAKARONGWA. Makapedzesera kuona riini vhidhiyo idzi dze kunamata ke macibesi? Zvingadaro kuti vhidhiyo ii inonga yecireketa nge zviya zvamunoda kamare. Ngo muezaniso, munofundei no muezaniso wa Roti pa kuita zvisananguro?

ONAI VHIDHIYO YAKAZWI MUSADA NYIKA (1JU 2:15), PEDZEPO DAIRAI MIBVUNZO INOTEERA:

• Kunamata ke Macibesi uku kainga kakawakirwa pa tsamba ipi ye Bhaibheri?

• Zvakaitika na Roti zvinopangidza kudini kuti kuda nyika kana zviro zviri mu nyika i ngozi?—Ge 13:12; 14:12; 19:3, 12, 13, 24-26

• Tingapangidza kudini kuti tinoda Djehovha uye kuti atidi nyika kana zviro zviri mu nyika?