Senzesai Pfadzwai ne Upenyu Nokusikaperi! Kuti Mubambise Kutenda Kenyu Muna Djehovha na Djesu

Kuti apfadze Mwari, afundi e Bhaibheri anodikana kugara nokutenda kakabamba. (Ahe 11:6) Tinokwanisa kuabaya mwoyo nge kuseenzesa bhuku ra Pfadzwai ne Upenyu Nokusikaperi!. Bhuku iri rino matsamba anokosha, mibvunzo dzinobetsera, mavhidhiyo anobambisa uye mafoto akarungama. Kuti afundi edu e Bhaibheri agare no mawara eciKristu uye ushamwari na Mwari, tinodikana kuabetsera.—1Ako 3:12-15.

Anhu amweni anorangarira kuti zvinoshupha kugara shamwari ya Mwari, ngekuti aakwanisi kumuona. Hino, tinodikana kubetsera afundi edu e Bhaibheri kuti aziye Djehovha uye agonde kaari.

ONAI VHIDHIYO YAKAZWI BAMBISAI KUTENDA MUNA DJEHOVHA, NGEKUSEENZESA “PFADZWAI NE UPENYU NOKUSIKAPERI!” PEDZEPO DAIRAI MIBVUNZO INOTEERA:

• Tinoziya kudini kuti hanzvadzi yabuda mu vhidhiyo yakanyasa kugadzirira zvakanaka fundo yayo?

• Hanzvadzi ii yaseenzesa kudini mibvunzo dzimweni kuti abetsere mufundi kunyasa kuzwisisa Isaya 41:10, 13?

• Vhidhiyo no mavhersikuro e Bhaibheri zvabetsera kudini mufundi?

Anhu akawanda aazwisisi rusudzunuro, kana kuti aariwoni hinga cipo ca Mwari kaari. (Aga 2:20) Hino, tinodikana kuabetsera kuti agare no kutenda mu cibairo ce rusudzunuro ca Djesu.

ONAI VHIDHIYO YAKAZWI BAMBISAI KUTENDA MUNA DJESU, NGEKUSEENZESA “PFADZWAI NE UPENYU NOKUSIKAPERI!” PEDZEPO DAIRAI MIBVUNZO INOTEERA:

• Tinoziya kudini kuti hama yabuda mu vhidhiyo yakanyasa kugadzirira zvakanaka fundo yayo?

• Hama ii yaseenzesa kudini pakazwi “Ziyai Zvakawanda” kuti abetsere mufundi?

• Ngei munamato wecikosha maningi ku afundi?