Muciri Kuedzurira Here?

Makanyasa kuerenga misoro ye Murindiri ye gore rino here? Onai kuti munokwanisa here kudaira mibvunzo dzinoteera:

Zvinoreyei “kucinja marangariro edu”? (Aro. 12:2)

Atidikani kusiya kuti nyika ino iticinje. Tinodikana kumbodziongorora kuti tiziye kuti zvinangwa zvedu uye zvisananguro zvedu zvirikucinjwa ngo mushobo unorangarira Djehovha here kana kuti we nyika.—w23.01, mapaji. 8-9.

Tingagara kudini no maonero ari pakati no pakati patinozwa zviri kuitika mu nyika?

Isusu tinoda kuziya zviri kuitika mu nyika ngekuti zviro zvakawanda zvirikudzadzisa uphorofiti. Asi pane kufembera zviro zvingakonzeresa kusama kubatana kedu, tingaita zvakanaka kuwakira makani edu pazviro zvinobudiswa no sangano ra Djehovha. (1 Ako. 1:10)—w23.02, paji. 16.

Rubhabhatidzo ra Djesu rakasiyana kudini no rubhabhatidzo re ateeri ake?

Iyena ainga asikadikani kudzipira kuna Djehovha, ngekuti wakabarhwa mu dzinza rainga rakadzipira kuna Mwari.—w23.03, paji. 5.

Mungabetsera kudini amweni kuti adaire pa misangano?

Tingapasa mhinduro isikazi kureba, nge kuita kudaro, anhu amweni akawanda acagara no mukana we kupasawo mhinduro. Kusiya izvona, tinodikana kuedza kusama kupasa mafundo akawanda pa nguwa imweyo. Kana imwimwi mukadaira ndima yese, mucasiira amweni mukana mudoko wekuti akwanise kupasa mhinduro.—w23.04, paji. 23.

Cinyi cinozwi “Gwanza Rakacena” rinorekethwa pana Isaya 35:8?

Gwanza iri rekuezanisira rinoreya rhwendo raizoizwa nge Adjudha ecibva ku Bhabhironi kuenda ku Djerusarema. Asi zvinoreyei katiri nyamasi? Mazana e makore, gore ra 1919 risati raguma, gwanza rakagadzirirhwa peciseenzeswa turikiro uye kudhinda Bhaibheri no zviro zvimweniwo. Anhu a Mwari ari kuhamba mu “Gwanza Rakacena” ecienda mu paraizo ye ku mwiya, iyo icatitungamirira ku makomborero e Umambo.—w23.05, mapaji. 15-19.

Mazano api atinopaswa pana Zvierengo kapituro 9 akaringana no anakadzi airi ekuezanisira?

Zvierengo inobhuya ngezve “mwanakadzi benzi” unopasa mupiko unoendesa mu “Guwa” uye ngezve mwanakadzi unoimirira “ungwaru we zvirokwazvo,” unopasa mupiko unoendesa mu “gwanza rekuzwisisa” uye ku upenyu. (Zvie. 9:1, 6, 13, 18)—w23.06, mapaji. 22-24.

Djehovha akapangidza kudini kuti anodzidodosa uye anozwisisa pa zviro zvaakaitira Roti?

Djehovha akabvunza Roti kuti atizire ku matunhu. Asi Roti wakakumbira kuti atizire ku Zoari uye Djehovha akadaira cikumbiro cake.—w23.07, paji. 21.

Mukadzi ungaitei kana mwamuna wake ano musambo wekuona pornografiya?

Mukadzi unodikana kuedzurira kuti ndaa angeyakepi. Iyena unodikana kukanda ndangariro dzake pa ushamwari wake na Djehovha uye kunyasa kurangarira ngezve miezaniso dziri mu Bhaibheri dze anakadzi amweni akazwawo kunetseka maningi, asi akanyaradzwa. Iyena angabetsera mwamuna wake kuti adzidziirire pa migariro inoita kuti iyena ahwirirezve kuona pornografiya.—w23.08, mapaji. 14-17.

Patinobvunziswa ngezve zviro zvatinotenda, kuzwisisa kucatibetsera kudini kuti tipangidze upfawi?

Pane kuona mubvunzo wake hingana kuti iyena uri kutirhwisa, zvakanaka maningi kuona mubvunzo uwona hinga mukana wekuziya kuti ngazvipi kamare zvinokosha kaari. Ngekuita kudaro, ticakwanisa kudaira no upfawi.—w23.09, paji. 17.

Tinofundei kubva pa muezaniso wa Mariya ngezve kupsvaka rubetso?

Paakaziya kuti waizogara mai a Mesiya, Mariya wakapsvaka rubetso re amweni. Gabrieri na Erizabheti akabambisa Mariya no masoko anobva mu Matarhwa. Isusu tingaonawo simba rinodiikanwa no rubetso re hama dzedu.—w23.10, paji. 15.

Djehovha angadaira kudini minamato yedu?

Iyena anotigondesa kuti acapurutana minamato yedu uye anoona kuti zvikumbiro zvedu zvinoenderana kudini no cinangwa cake. (Djer. 29:12) Djehovha angadaira minamato yakaezana nge mishobo yakasiyana, asi iyena acatibetsera nguwa dzese.—w23.11, mapaji. 21-22.

Aroma 5:2 inobhuya ngezve “kariro.” Hino ngei vhersikuro 4 inobhuyazve ngezve “kariro”?

Paanozwa masoko akanaka, munhu ungagara no kariro yekurarama pa nyika pano mu paraizo nokusikaperi. Asi paanosongana no matambudziko, oashingirira uye oona kuti unotenderhwa na Djehovha, kariro iyona inonyasa kubamba uye inotunhudzira kugara ye zvirokwazvo.—w23.12, mapaji. 12-13.