Kurekererhwa Zvitema Rusudzunuro Risati Raonekepo

Isusu tingarekererhwa basi zvitema zvedu peciseenzeswa cibairo ce rusudzunuro cakariphwa ndi Djesu eciseenzesa ngazi yake. (Aef. 1:7) Kunyazi zvakadaro, Bhaibheri rinoti: ‘Ngo mwoyo wake unononoka kutsamwa, Mwari akarekerera zvitema zvakaizwa kare,’ kureya kuti, Djesu asati atopasa upenyu wake hinga rusudzunuro. (Aro. 3:25) Asi Djehovha aizorekerera kudini zvitema rusudzunuro risati raitika, kunyazi zvakadaro orumbwa eciteerera mitemo yake ye unatsi?

Djehovha ainga akagondesa kuti paizooneka “mubarirhwana” waizoponesa aya ainga ano kutenda muna Mwari uye mu zvipikirhwa zvake. Djehovha paakapikira izvi, mumaonero ake rusudzunuro rainga ratoriphwa. (Gen. 3:15; 22:18) Djehovha ainga ano rugondo rekuti pa nguwa yakasisira Mwana wake waizodzipira kuuya pa nyika pano kooripa rusudzunuro. (Aga. 4:4; Aheb. 10:7-10) Djesu paainga ari pa nyika pano, Djehovha akamupasa masimba kuti arekerere zvitema, kunyazi rusudzunuro parainga risati rariphwa. Djesu akaita izvona ngekuti aiziya kuti cibairo caaizopasa caizofukidza zvitema zve aya ano kutenda.—Mat. 9:2-6.