MIBVUNZO INOBVA KU AERENGI

Ticarumbwa teciita basa re kuparidzira dakara riini?

Djesu akati: “Uye masoko aya akanaka e Umambo acaparidzwa mu nyika yese inogarhwa, kuti anhu ese aazwe uye zvadaro mugumo ucauya.” (Mat. 24:14) Soko re ci Gerego rakaturikirhwa kuti “mugumo” pa vherisikuro ii, uye pa vherisikuro 6 uye 13, rinozwi teʹlos. Irona, rinoda kureya Mugumo we nyika ino ya Sathani pa Amagedhoni. (Zvak. 16:14, 16) Hino, ticarumbwa teciparidzira masoko akanaka e Umambo dakara pasara nguwa doko kuti mugumo ugume. Aya mazwisisiro mapsva pamazwisisiro ataiita kare.

Kare taizwisisa kuti, taizoima kuparidzira masoko akanaka pakutanga ke dambudziko guru uye kuparadzwa ke Bhabhironi Guru. (Zvak. 17:3, 5, 15, 16) Taitenda kuti kutanga ke dambudziko guru, kaizogara nguwa yekupedzesera ye “gore re usisi wa Djehovha” kana kuti nguwa yekuti Djehovha aizopasa mukana anhu kuti atende masoko akanaka. (Isa. 61:2) Isusuwo tairangarira kuti aya aizopona pa dambudziko guru, aizopangidza kugondeka kuna Djehovha dambudziko guru risati ratanga. Tairangarira kuti aya aizopona ainga akaita hingana Adjudha akapona pakutsakatiswa ke Djerusarema muna 607 K.A.A. Adjudha ainga aakunamata Djehovha uye aizonda zvakashata. Nge ndaa yazvo, ainga akandwa cipangidzo kuti azoponeswe pakutsakatiswa ke Djerusarema. (Ezek. 5:11; 9:4) Asi kuezaniswa uku, akupindirani no masoko a Djesu ari pana Mateu 24:14, anopangidza kuti pamweni anhu angagara no mukana we kutenda masoko akanaka, paapasara padoko kuti mugumo ugume pa Amagedhoni.

Mazwisisiro edu mapsva e bhuku ra Mateu 24:14 anocinjawo mushobo wataizwisisa masoko ekutonga anoezaniswa no mapuwe e masanza ari pana Zvakapangidzwa 16:21. Kunyasa kupsvakisiswa kakaizwa kunopangidza kuti matsamba aya anopindirana. Kuita kudini? Mhinduru yakhona inooneka nge mushobo unotambira anhu masoko e Umambo. Muphostori Pauro wakatara kuti: “Pakati pe aya ari kuenda kooponeswa,” masoko awona aizoita hingana masoko akanaka, hingana ari “kunuhwirira upenyu.” Asi ku azondi a Mwari aizoita masoko akashata hingana ari “kunuhwa rufu.” (2 Ako. 2:15, 16) Azondi awona anozonda masoko e Umambo, ngekuti masoko awona e Umambo anopangidza cokwadi—ngezve nyika ino yaanoda maningi. Nyika yakashata maningi inotongwa na Sathani yekuti nokukasika icatsakatiswa.—Juau 7:7; 1 Juau 2:17; 5:19.

Zvakanaka kuona kuti zvakapangidzwa 16:21 inobhuyawo kuti dutu iri re masanza, ‘raizogara rakakura maningi.’ Izvona pamweni zvinopangidza kuti pa dambudziko guru basa re kuparidzira ricanyasa kugara no simba kana kuti zina ra Djehovha ricanyasa kuziikanwa kudarika kare. (Ezek. 39:7) Kodi mumasure mekutsakatiswa ke Bhabhironi Guru, anganani acaona masoko awona ecipfadza hingana munuhwi unoyasa kunuhwirira zvakanaka here? Izvona zvingaitika. Pamweni awona angaedzurira uye kuziya kuti ke makore akawanda Apupuri a Djehovha aiziisa ngezve kutsakatiswa ke magereja e kunyepa.

Izvi zvinoita kuti, tiedzurire zvakaitika ku Edjipitu yo kare mumasure me Matambudziko Gumi. Mumasure mekuti Djehovha “[atsakatisa] anamwari ese e Edjipitu,” “anhu akawanda ainga asiripi Aisraeri” akabatana no anhu a Mwari. (Eki. 12:12, 37, 38) Anhu awona ainga asiripi Aisraeri, pamweni akagara ku dii ra Djehovha mumasure mekuti aona kuti zvese zvainga zvabhuiwa na Mozesi ngezve Matambudziko Gumi zvakaitikadi kamare.

Munhu wese ucagara ku dii ra Djehovha mumasure mekutsakatiswa ke Bhabhironi Guru, ucagara no mukana we kutsigira hama dza Kristu dzinonga dziciri pa nyika. (Mat. 25:34-36, 40) Zviri pamhene kuti mukana we kutongwa hingana mabira ucapera nguwa doko Amagedhoni isati yatanga akadzodzwa anonga ari pa nyika paacapaswa makomborero e kuenda kudenga.

Mazwisisiro aya mapsva anonyasa kupangidza rudo rakakura uye usisi wa Djehovha. Zvezvirokwazvo, “apana waanoda kuti atsakatiswe, asi anoda kuti anhu ese acinyuke.”—2 Ped. 3:9.