NYIKA YADZARA NO MATAMBUDZIKO

2 | Seenzesai Mare Yenyu Zvakanaka

NGEI ZVECIKOSHA?

Anhu akawanda anodikana kuseenza no simba mazuwa ese kuti aone zvekurarama nazvo. Zvinotsukwarisa kuti matambudziko ari mu nyika anoita kuti zviro zvinyanye kushupha. Ngei?

Matambudziko paanoitika, zviro kushupha maningi—kutobatanidzawo zvekurhya uye pekugara.
Matambudziko amweni anokwanisa kuita kuti pasaoneke mabasa uye kuita kuti anhu atambire mare padoko.
Tsawana dzinoitika dzoga dzingakwanisa kukuwadza kana kuti kutsakatisa bhizi re anhu, nyumba dzawo uye zviro zvimweni, zveciita kuti anhu akawanda agare arombo.

Zvamunodikana Kuziya

Kana imwimwi mukaziya kuseenzesa mare yenyu zvakanaka, zvicazoita kuti mukwanise kukunda dambudziko ramunozosongana naro.
Edzurirai kuti zviro zvamunazvo uye mare yamunotambira, zvinokwanisa kuzosama kukosha.
Kuno zviro zvakawanda zvekuti mare aikwanisi kutenga, hinga mupfaro uye mhuri yakabatana.

Zvamungakwanisa Kuita Zvino

Bhaibheri rinoti: “Kana tino cokurhya no cokupfeka, tinogutsikana nazvo.”—1 Timoti 6:8.

Kugutsikana kunobatanidza kusama kunyanya kurangarira ngezve zvido zvedu uye topfara nge kugara no zviro zvokurarama nazvo basi. Izvona zvinonyanya kukosha, maka-maka tisina mare yakawanda.

Kuti mupfare kana kugutsikana, pamweni munotodikana kurerusa upenyu wenyu. Kana imwimwi mukaseenzesa mare inodarika iya yamunotambira, mucatonyanya kugara musina mare.

ZVINYI ZVAMUNGAITA?—Mazano Anobetsera

Paya pamunobatana no matambudziko, mazano anoteera acamubetserai kuti museenzese mare yenyu zvakanaka

PUNGURAI ZVIRO ZVAMUNOTENGA

Itai urongwa wekuti mucaseenzesa kudini mare yenyu

Musatenge micini imweni ye magetsi uye macira, kana zvisikanyanyi kukosha kamuri. Dzibvunzisei kuti: ‘Ndinodikanadi kamare kutenga karu? Pane kuti ndigare ndecitenga micero no mishobo imweni ye masakani, zvakadini kuzvisima pa ruwanze?’
Musati matenga ciro, dzibvunzisei kuti: ‘Inini ndinodadi kamare ciro ici? Ciro ici ndinokwanisa kucipagari here?’
Dzitaririsei kuti mutambirewo rubetso rinobva ku govherno, kana urongwa uwona uriyo kamunogara.

“Hingana mhuri, takasanangura kuongorora mararamiro edu. Takathurudza mare yataiseenzesa pakudziwaraidza, uye takatosiya mishobo imweni yekudziwaraidza. Uyewo takatanga kubika zvekurhya zvisikanyanyi kudhura.”—Gift.

ITAI URONGWA WEKUTI MUCASEENZESA KUDINI MARE YENYU

Pungurai zviro zvamunotenga

Bhaibheri rinoti: “Urongwa we munhu unoseenza no simba unobudirira zvakana, asi ese anoita zviro nokukasika acapedzesera aa arombo.” (Zvierengo 21:5) Kuita urongwa kucamubetserai kuti musaseenzese mare kudarika iya yamunotambira.

Tangai kutara mare yamunoona pa mwedzi.
Itai mundandanda we zviro zvamunoseenzesa pa mwedzi uye onai kuti mucaseenzesa mare yakawanda kudini.
Ezanisai mare yamunoseenzesa no mare yamunoona. Onai kuti munodikana here kuthurudza kana kuti kutopfudza kamare zviro zvinganani zvisikanyanyi kukosha pa mundandanda wenyu.

“Mwedzi dzese, tinotara mare yese yaticaona uye yaticaseenzesa. Tinoedza kucengeta mare kuitira matambudziko anozooneka uye zviro zvimweni zvinozoitika mune ramangwana. Nge kuita kudaro, tinogara tisikadzirhyi mwoyo ngokuti tinonga taakuziya mushobo watinoseenzesa mare yedu.”—Carlos.

MUSAGARE NO MAGAA / CENGETAI MARE

Musagare no magaa / cengetai mare

Itai urongwa wakanaka kuti muthurudze magaa amunawo. Kana zveciita, petai masimba kuti musaite amweni. Pane kuita magaa, edzai kucengeta mare yamunoda musati matenga ciro.
Mwedzi dzese, cengetai kacimare kuitira zviro zvamusikakariri zvinozoitika mune ramangwana.

SEENZAI NO SIMBA / BATISISAI BASA RAMUNARO

Bhaibheri rinoti: “Kuseenza no simba kune zvakunobetsera.”—Zvierengo 14:23.

Seenzai no simba / batisisai basa ramunaro

Garai no maonero akanaka ngezve basa renyu. Kunyazi risiripi riya ramunoda, irona riciri kuita kuti muone zvekurarama nazvo.
Seenzai no simba uye garai munhu wakagondeka. Izvona zvicaita kuti murumbwe muno basa kana kuti zvicazomuitirai nyore kuona basa rimweni mune ramangwana.

“Inini ndinoseenza basa ripi haro randinogumira, kunyazi risiripi riya randinopfarira kana kuti ndisikapaswi mare yandaida. Ndinoedza kuita basa rakanaka kuita hingana ndiri kudziseenzera inini pacangu.”—Dmitriy.

Kana imwimwi muri kupsvaka basa . . .

Tangai ndimwi. Psvakai basa mu maempreza amaizoda kuseenza, kunyazi awona asiripi kupasa anhu basa. Bvunzai shamwari dzenyu uye anyaukama enyu kuti imwimwi muri kupsvaka basa.
Itai zvokukasika. Zvingamushuphirai kugumira basa rino zvese zvamaida.