Panoitika matambudziko, bambisai ushamwari wamunawo no amweni ngo kuita izvi
BAMBISAI MUCATO WENYU
Bambisai mucato wenyu
Bhaibheri rinoti: “Anhu airi ari nani kupinda umwe basi . . . Ngokuti kana umwe wawo akambwera, umweni ungakwanisa kubetsera mudoni wake kumuka.” (Muparidzi 4:9, 10) Makazado anodikana kuita hingana atekenyi e ndeka anoseenza akabatana kuti agume ku mbuto imweyo; haiwa kuita hingana atekenyi e ndeka asikapindirani. Onai mazano amweni angabetsera makazado:
Garai makagadzirira kuti musabate mudoni wenyu nge mushobo wakashata kana kuti no shungu nge ndaa yo stress. Kugara no mwoyo unononoka kutsamwa uye kuzwisisa, zvinobetsera maningi.
Masumana ese, cedzesanai ngezve nyaya dzamunodikana kugadzirisa. Rhwisai dambudziko, haiwa kurhwisana imwimwi pacenyu.
Psvakai nguwa kuti muite zviro zvamunopfarira muri pamwepo no mudoni wenyu.
Rangaridzai nguwa yakanaka yamakagara muri pamwepo, pamweni ngo kuona mafoto e mucato kana kuti mafoto e migariro imweni yakamupfadzai.
“Pamweni paya makazado angasama kutenderana pa zviro zvese, asi izvona azvidi kureya kuti aadikani kuseenza pamwepo hinga cikwata. Mwamuna no mukadzi angaita zvisananguro ari pamwepo uye angapeta masimba kuti zvisananguro zvayo zvibudirire.”—David.
BAMBISAI USHAMWARI WENYU NO AMWENI
Bambisai ushamwari wenyu no amweni
Pane kuetsera basi kubetserhwa no shamwari dzenyu, rangarirai kuti imwimwi mungabetserawo kudini shamwari dzenyu. Pamunobetsera amweni, munotopedzesera nge kudzibetsera imwimwi pacenyu.
Mazuwa ese, cedzai no shamwari dzenyu kuti muziye kuti dzakadini.
Bvunzisai shamwari dzenyu kuti dzakakunda kudini matambudziko akada kuitawo hingana enyu.
“Pamunosongana no zvinetso zve upenyu, shamwari dzingakwanisa kupasa mazano anobetsera. Idzona dzingapangidza gwanza rakanaka rekuteera, kunyazi izvona zvecimuitisai kuti muedzurire zviro zvamaakutoziya kamare. Shamwari dzinonyasa kumurangarirai uye dzinoziya kuti imwimwi munonyasa kudzirangarirawo.”—Nicole.
BETSERAI ANA ENYU
Betserai ana enyu
Bhaibheri rinoti: “Munhu wese anodikana kukasika kuzwa, asi ononoka kureketa.” (Tiyago 1:19) Zvingaita kuti pakutanga ana enyu aadi kupanganidza zvaari kuthya uye zviro zvinoanetsa. Asi kana imwimwi mukaapurutana no mwoyo unononoka kutsamwa, izvona zvicaabetsera kuti awona afungure mwoyo yawo.
Betserai ana enyu kuti awona agare akasudzunuka kureketa nemwi zvaari kuzwa. Ana amweni aazwi akasudzunuka kureketa no abereki awo hope no hope. Pamweni awona anoona kuti zviri nyore kuita izvona paya paanonga akaarairhwa, hinga muezaniso, paanonga ari mu karu kana kuti paanonga ecihamba no abereki awo.
Ngwarirai kuti ana enyu asarumbwe eciona manotisiya akashata.
Bvunzai ana enyu zviro zvamuri kuita kuti mudziirire mhuri.
Garai makaronga no ana enyu zviya zvamucaita kana mukasongana no ngozi uye itai rowedzo nawo kuti angatondowedza kudini zano irona.
“Cedzai no ana enyu uye asiyei kuti apanganidze mazwiro awo. Pamweni awona ari kuthya, ari kudzirhya mwoyo kana kuti akanyangadzwa uye anoda kumufisirai izvona. Amudikani kupsveruka kubvunza ana enyu kuti muri kuzwawo zvimwezvo, asi abvunzeiwo kuti zvinyi zvamunosoita kuti muzvikunde.”—Bethany.