Mwanarume no Mwanakadzi Wekutanga

Djehovha akaita munda mu mbuto imweni yaizwi Edheni. Munda iwona wainga wakadzara no maruwa, miti, uye zvinyama. Hino, Mwari akatora mataka padoko, uye akaita mwanarume wekutanga, Adhamu. Pedzepo, Mwari akafuridzira mwiya we kufema mu mhino dzake. Unoziya kuti zvinyi zvakaitika? Mwanarumewo wakagara mupenyu! Djehovha akapasa mwanarumewo zina rokuti Adhamu, uye akamupasa basa. Adhamu waidikana kucengeta mundewo uye kupsvaka mazina e kupasa zvinyama zvese.

Djehovha akapasa Adhamu mutemo unokosha. Iyena akamubvunza kuti: ‘Ungarhya mucero we muti upi hawo we mu munda; asi pano muti unokosha, mucero we muti uwona iwewe audikani kuurhya. Kana ukaurhya, iwewe ucafa.’

Mumasure me nguwa, Djehovha akabhuya kuti: ‘Ndicapasa Adhamu mubetseri.’ Hino, Mwari akaita kuti Adhamu abathwe no hope dzakakura. Pedzepo akabvisa mbabvu imwe ya Adhamu uye akamuitira mukadzi. Iyena waidainzwa kuti Evha. Adhamu na Evha akagara mhuri yekutanga. Asi Adhamu wakapfarira mukadzi wake here? Honde. Iyena wakapfara maningi zvekuti wakabhuya kuti: ‘Onai basi zvaizwa na Djehovha eciseenzesa mbabvu yangu! Ndaano munhu wakaezana na inini.’

Djehovha akabvunza Adhamu na Evha kuti abare ana, uye mhuri yawo yaidikana kudzadza nyika. Mwari aida kuti awona aseenze akabatana uye ecipfara kuti acinje nyika kuti igare paraizo. Cinyi cinozwi paraizo? Paraizo i mbuto yakarungama maningi, yakaita hingana munda we Edheni. Asi nyika aizi kugara paraizo. Ngei? Ngatione mu fundo inoteera.