Anhu Asere uye Nyika Ipsva

Nowa no mhuri yake uye zvinyama akapinda mu areka. Pedzepo, Djehovha akafunga musuwo we areka uye kakatanga kunaya. Kakanaya maningi zvekuti nyika yakadzara no mvura uye areka yakaberuka padenga pe mvura. Anhu ese akashata ainga ari kunza akafa. Nowa no mhuri yake ainga akacengeteka mukati me areka. Unokwanisa kurangaridza mazwiro awo here?

Kakanaya ke mazuwa 40 uye usiku 40, pedzepo, mvura yakaima kunaya. Padoko no padoko mvura yakatanga kuterera. Hino, areka yakaima pamusoro pe dunhu. Asi nyika yainga icakadzara no mvura. Ndiyo ndaa, Nowa no mhuri yake akadikana kugarazve mukati me areka ke cinguwa.

Padoko no padoko mvura yese yakaoma. Nowa no mhuri yake ainga aa mukati me areka ke nguwa inodarika gore rimwe. Hino Djehovha akaabvunza kuti abude mu areka. Zvaiita hingana kuti aitopinda mu nyika ipsva. Zviro zvese zvakashata uye zvecisimba kainga kusisina. Nowa no mhuri yake akapfara maningi ngokuti Djehovha akaaponesa. Ndiyo ndaa, awona akasanangura kupasa Djehovha mupiro.

Djehovha akapfara maningi nge zvakaizwa na Nowa no mhuri yake. Hino, iyena akapikira kuti ainga asikazoseenzesizve ndambi kuti atsakatise zviro zviri pa nyika. Kuti Nowa no mhuri yake aedzurire nhiko ii, Djehovha akaita kuti paoneke muraraungu (kana kuti arco-íris) kekutanga. iwewe wakamboona muraraungu here? Pese paunoona muraraungu kudenga, edzurira ngezve nhiko ya Djehovha.

Mumasure mekuita mhiko ii, Djehovha akabvunza Nowa no mhuri yake kuti abare ana adzadze nyika.