Edzurira Zvakaitika no Mukadzi wa Roti

Roti wairarama no hama ya baba ake Abrahamu, ku Kanani. No kuhamba ke nguwa, Abrahamu na Roti akagara no zvinyama zvakawanda. Zvinyamezvo zvainga zvakawanda zvekuti zvainga zvisikacakwani pa mbuto imweyo. Ngo ndaa yazvo, Abrahamu wakabvunza Roti kuti: ‘Ndinoona kuti azvicaiti kuti tigare pa mbuto imweyo. Tinodikana kuparadzana. Unoda kuenda ku dii ripi? Ungasanangura. Kana ukasanangura kuenda ku dii iri, inini ndicaenda ku dii rimweni.’ Abrahamu aazi kuda kutanga ndiye kusanangura kuti agare no mbuto yakanaka. Hino wakasiya kuti Roti atange kusanangura. Iyena wakapangidza rudo rakakura andizvopi?

Hino Roti wakaona mbuto imweni ku Kanani yainga yakanaka maningi, yainga iri ku thaundi rinozwi Sodhoma. Mbuto ii yainga ino mvura yakawanda uye shango rakawanda. Ngokudaro, Roti wakasanangura kufuruka uye wakaenda ikona no mhuri yake.

Asi anhu e ku Sodhoma ainga akashata mwoyo maningi. Padhuze no Sodhoma, painga pano thaundi rimweni raizwi Gomora. Thaundi ro Gomora, rainga rakadzarawo no anhu akashata mwoyo maningi. Zvezvirokwazvo, anhu aya ainga akashata maningi zvekuti Djehovha akasanangura kutsakatisa mathaundi mairi aya. Asi Djehovha aida kuponesa Roti no mhuri yake. Ndiyo ndaa, Djehovha akatuma ngirozi mbiri kuti dziangwadze kuti: ‘Kasikai! Budai mu mbuto ino, ngokuti Djehovha ari kuda kutsakatisa thaundi.’

Asi Roti aazi kubuda paakabvunzwa no ngirozi. Iyena wakanonoka. Hino, ngirozi dzakabata moko wa Roti, we mukadzi wake uye we ana ake airi, uye dzakaatora nokukasika dzoenda koasiya kunza ke thaundi. Ngirozidzo dzakakhuwa dzeciti: ‘Gogomai! Ponesai upenyu wenyu, musaringire sure. Kana mukaringira sure, munofa!’

Roti no mhuri yake paakaguma ku thaundi raizwi Zowari, Djehovha akaita kuti ku Sodhoma no Gomora kumbwere muriro. Mathaundi mairi aya akatsakatiswa. Hino, mukadzi wa Roti aazi kuzwira Djehovha uye wakaringira sure. Paakaita izvona unoziya kuti zvinyi zvakazoitika? Iyena wakaphinduka ogara curu ce munyu. Roti no ana ake pamweni akatsukwara maningi ngo ndaa yazvo. Waona kuti ngei zvecikosha kuzwira Djehovha?