Rute na Naomi

Pano nguwa yekuti ku Israeri kakaitika nzara, nge ndaa yazvo mwanakadzi umweni waizwi Naomi wakafuruka kuti aende ku Moabhi no mwamuna wake uye no ana ake airi o anarume. No kuhamba ke nguwa, mwamuna wa Naomi wakafa uye ana ake akawakawo anakadzi e ku Moabhi aizwi Rute na Orpa. No kuhamba ke nguwa, zvinotsukwarisa kuziya kuti ana airi a Naomi akazofawo.

Naomi paakaziya kuti ku Israeri kainga kaano zviro zvokurhya, iyena wakarangarira kuhwirireyo. Rute na Orpa akaenda naye. Asi paainga ari parhwendo, Naomi wakati kaari: ‘Imwimwi makagara anhu akanaka ku ana angu uye kandiri, ndinoda kuti muwakwezve. Hwirirai kumba ke madzibaba enyu.’ Awona akadaira Naomi kuti: ‘Isusu tinomudai! Atidi kumusiyai.’ Naomi wakarumbwa ecibvunza Rute na Orpa kuti ahwirire. Orpa wakasanangura kuhwirira ku anhu ake uye ku madzimwari ake. Hino Naomi wakabvunza Rute kuti ahwirirewo, asi Rute waida maningi Naomi. Rute wakadaira kuti: ‘Inini andizombomusii. Anhu enyu acagara anhu angu uye Mwari wenyu ucagara Mwari wangu.’

Hino, Rute na Naomi akaguma ku Israeri. Zuwa rimweni, Rute wakaenda koonongera tsangwa mu munda wa Bhoazi mwana wa Rakabhi. Bhoazi wainga azwa kuti Rute wainga ari shamwari ye zvirokwazvo ya Naomi. Ndiyo ndaa, wakabvunza aseezi ake kuti asiye Rute ecipsvaka tsangwa dzaaizokwanisa.

Rute paakaguma kumba co usiku, Naomi wakabvunzisa Rute kuti: ‘Waseenza kupi nyamasi?’ Rute wakadaira kuti: ‘Pazvirimwa zve mwanarume anodainzwa kuti Bhoazi.’ Uye Naomi wakati: ‘Bhoazi ndi hama ye mwamuna wangu. Rumbwa weciseenza ku munda wake no anakadzi amweni. Kweneyo apana acakushupha.’

Rute wakarumbwa eciseenza mu munda wa Boazi dakara paakazopedza kunongera. Bhoazi wakaona kuti Rute wainga ari mwanakadzi wakanaka maningi uye unoseenza no simba. Hino, Bhoazi wakawakana naye uye awona akagara no mwana unodainzwa kuti Obhedhi, wekuti no kuhamba ke nguwa wakazogara tsekuru a Mambo Dhavhidhi. Shamwari dza Naomi dzakapfara maningi zvekuti dzakamubvunza kuti: ‘Djehovha pakutanga akakupasa Rute wakanaka maningi uye pari zvino, iyena akupasa muzukuru. Ngatikudze Djehovha ngo zvese.’